Cov Kav Tos Liv nyob Nyab Laj teb, yog tus coj kev tiv thaiv hais txog huab cua phem ntawm roj hmab

Lawv txoj kev ua hauj lwm los yog lub zog los ntawm lawv txoj kev ntseeg, tab tom txhawb nqa tsis yog yam muaj txoj sia xwb. Nws tseem hais txog kev cia siab ntawm cov neeg txheej tom ntej thiab. Cov neeg ntseeg nyob hauv lub Cheeb Koom Txoos Hue, lawv nqa khaub rhuab thiab thoob rau tej yam qias neeg. Lawv tab tom ntsib teeb meem loj nyob hauv lub teb chaws. Ntawd yog huab cua phem los ntawm roj hmab. 

Muaj tej toob xib roj hmab ntau kawg los ntawm neeg cov hauj lwm thiab cov tuam tsev tsim toob xib. Nws poob nyob hauv hiav txwv ntau qhov chaw, hauv tej niam dej thiab raug cua tshuab mus khuam nyob ntawm tej ntug dej ntug hiav txwv. Cov neeg ntseeg tsis kam swb, lawv ua kom lawv tej av thiab tej ntug dej hiav txwv rov huv tuaj. Lawv khaws tej hnab roj hmab thiab tej toob xib roj hmab ib daim zuj zus, lawv khaws txhua lis piam. Le Van Phuoc uas nws yog ib tug neeg ntes ntses, muaj 52 xyoos. Nws kuj nkag mus koom cov neeg khaws hnab roj hmab raws ntug hiav txwv. Lawv khaws deb li 3 kis los mev nyob ze lub tsev teev Ntuj Sao Cat. Vim kev muab siab rau thiab nquag, ces pab neeg no tuaj yeem khaws tau toob xib roj hmab ntau pua kis los. Tsis hais tej hwj roj hmab, hnab roj hmab, plhaub qwj, tej tsig cuab ntes qub qub thiab lwm yam uas seem pov tseg.