Lub koom haum Caritas nyob Fis Lis Pees tau tawm tsam kev ntov ntoo nyob Mas Nis Las. Lawv hu kev ua li no tias ‘yog kev phem ntawm yam muaj txoj sia’
Hauv kev sib tham hnub tim 25 lub 5 hlis tag los no, Tswv Qhia As Mis Nas Ntxas (Bishop Gerardo Alminaza) uas nws yog tus thawj tswj lub Koom Haum Caritas nyob Fis Lis Pees teb tau tham txog kev ntov cov ntoo laus kom tau qhib kev rau kev txhim kho. Nws hais tias “Yog kev ntxiv lub nra rau tsoom pej xeem uas tab tom tiv cov huab cua kub kub sov sov, huab cua phem thiab dej nyab.” Tswv Qhia As Mis Nas Ntxas hais ntxiv tias “Kev nto cov ntoo laus 10 tawm xyoo ntau ntau nyob raws ntug kev, yog kev ua phem txog yam muaj txoj sia rau cov neeg nyob Mas Nis Las. Cov ntoo no yog qhov chaw ntis tshav ntawm cov neeg taug kev mus los thiab cov neeg ib txwm nyob los ntev lawm. Ntoo pab ntis tshav thiab pab txhim kho txhua yam nyob ib puag ncig hauv lub nroog kom zoo tuaj.”
Lub Koom Haum Caritas nyob Fis Lis Pees tseem hais tias “Kev txhim kho tsis tsim nyog los nrog tsoom pej xeem kev txuag txhua yam nyob ib puag ncig tej kev txom nyem.”
Vim li cas kev txhim kho thiaj vam txog cov neeg pluag txom nyem tas mus li?
Tswv Qhia hais tias “Yog ib lo lus nug txog kev txhim nroog uas ntsia pom tias tsheb thiab tej kev pob zeb tseem ceeb dua neeg.” Caritas tseem hais txog Vaj Qhia Fas Ntshis Kus tsab ntawv Laudato Si uas yog hais txog kev saib xyuas txhua yam nyob ib puag ncig. Yog hais txog yam uas lawv hu ua ‘tej kev cai muab pov tseg’, uas neeg ua rau yam ntuj tsim thiab cov neeg txom nyem zoo li tej toob xib siv tas muab pov tseg.
Tswv Qhia hais tias “Teeb meem huab cua yog qhov tseeb uas zim txwv no yuav tau muab siab rau daws kho thiab yog qhov yuav tsum lees txais. Cov ntoo loj txhua tsob uas raug ntov, yog kev piam sij hauv kev ncaj ncees.”
Caritas nyob Fis Lis Pees teb thov kom cov tseem hwv thiab cov neeg ntov ntoo cia li tso tseg, rov los xav txog lub zeem muag hauv kev ncaj ncees ntawm yam muaj txoj sia, thiab nrog tsoom pej xeem uas lawv ntsib teem meem ntawm txhua yam nyob ib puag ncig sib tuav xam. Kev ntov cov ntoo nyob raws ntug kev tsheb hauv lub nroog Mas Nis Las raug zej zog xyav moo nyob hauv ob peb hnub dhau los no vim muaj kev tshaj tias “Ntau pua tsob ntoo loj ua teeb meem rau txoj kev tsheb khiav ceev mus rau yav qab teb.”
