Kev sib tua saum nruab ntug ua rau cov tsev teev Ntuj nyob Mias Mas piam sij, tab sis Tswv Qhia hais tias kev ntseeg tseem ruaj khov
Cov Txiv Plig Kav Tos Liv nyob Mias Mas, tau thov kom muaj kev cia siab thiab sib pab txuag kev ntseeg, tom qab cov tub rog siv dav hlau tua nyob saum nruab ntug. Ua rau lub tsev teev Ntuj Tus Vaj Yes Xus Pleev nyob hauv lub nroog Falam, xeev Chin piam sij xyoo tas los.
“Lawv tau rhuav sab phab ntsa tsev teev Ntuj thiab kev ntseeg, tab sis kev ntseeg ntawm peb tseem nyob ruaj khov. Tswv Ntuj cov neeg nyob hauv lub nroog Falam tseem ntseeg khov kho thiab muaj kev cia siab. Cov neeg ntseeg yuav rov txhim lub tsev teev Ntuj Tus Vaj Yes Xus Pleev dua tshiab. Sawv daws nyias yuav ua nyias txoj hauj lwm kom zoo.” Cov lus no yog Tswv Qhia Lus Xias Hre Kung hais nyob hauv lub caij nws mus saib lub tsev teev Ntuj tej kev puas ntsoog.
Lub tsev teev Ntuj Tus Vaj Yes Xus Pleev txhim tiav thiab qhib siv nyob hauv lub 11 hlis xyoo 2023. Muaj cov neeg ntseeg 1,000 leej nyob hauv lub nroog Falam. Tab sis lub hlis tom qab, poob nyob hauv kev sib ntaus sib tua ntawm cov tub rog Chinland los yog CDF thiab cov tub rog Mias Mas. Thaum cov tub rog CDF nkag mus txeeb lub nroog Falam, mas cov tub rog Mias Mas tau siv dav hlau tua saum nruab ntug ncaj rau thaj tsam no, ces thiaj ua rau lub tsev teev Ntuj nyob hauv lub zos piam sij tas. Kev sib tua ua rau lub tsev teev Ntuj hwm Yes Xus Lub Siab Ntshiab nyob hauv lub nroog Mindat piam sij tas. Lub tsev teev Ntuj hwm Yes Xus Lub Siab Ntshiab yog lub tsev teev Ntuj loj uas raug teeb tsa ua lub tuam tsev teev Ntuj yav tom ntej ntawm lub Cheeb Koom Txoos Mindat. Nyuam qhuav teeb tsa hnub tim 25 lub 1 hlis xyoo 2025 no xwb, tab tsis twb raug tua puas ntsoog lawm.
