Mas Tais sau nws phau ntawv rau cov Yus Das nyeem, nws xav pab cov Yus Das kom ntseeg tias Yes Xus yog tus Pleev uas cov Yaj Saub ib txwm hais tias yuav tuaj, Mas Tais thiaj piav zaj cov kws hnub qub tuaj hwm tus me nyuam Yes Xus, kom cov Yus Das paub tseeb tias Yes Xus yug los nyob lub zos Npes Les Hes thiab muaj cov neeg pej kum teb tuaj hwm nws xws li cov Yaj Saub hais.
Mas Tais kuj tseem xav qhia peb sawv daws kom paub txog Yes Xus txoj hauj lwm txhiv tas ntiaj teb neeg. Tos hais li no vim cov kws hnub qub yog tam tas txhua haiv neeg, lawv raug hu kom raws lub hnub qub qhov pom kev mus, ces lawv thiaj ntsib tus me nyuam Yes Xus. Yes Xus tseem yuav raug kev txom nyem ib yam li haiv His Xas Lais txheej thaud; xws li ua neeg tsiv teb tsaws chaw thiab rov los nyob hauv nws lub teb chaws.
Yes Xus yug yog lub caij Hes Los ua vaj txheeb kav xeev Yus Das, Is Dus Mes As, thiab Xas Mas Lias txij xyoo Los Mas 716 los rau xyoo 750. Raws li peb xam hnub nyoog mas yog xyoo 37 los rau xyoo 4 ua Yes Xus ntej. Hes Los muaj ntau tus tub tab sis 3 tug muaj suab npe dua cov yog ‘Fis Lis Pos’, ‘Hes Los As Kis Pas’ thiab ‘As Kes Los’. Fis Lis Pos kav lub xeev Is Tus Lias thiab Thas Kos Nis Tis, Hes Los As Kis Pas kav xeev Nkas Lis Lais thiab Pis Lias, As Kes Los kav lub xeev Yus Das. Xyoo 6 Los Mas muab As Kes Los txo thiab xa Kos Pos Nis Us tuaj ua vaj txheeb nyob Yus Das teb. Xyoo 9 Pis Las Tos mam tuaj ua vaj txheeb tswj lub xeev Yus Das.
Hais txog ‘cov kws ntawv’ mas lawv yog cov kws txoj cai los yog cov thoob xwm txoj cai, lawv ua kab xwm nthuav Ntawv Ntshiab thiab Mais Xes Txoj Cai rau cov Yus Das coj. Cov kws ntawv feem coob yog cov Fas Lis Xais.
Hais txog lub zos ‘Npes Les Hes’ mas yog lub zos thaum ub Npuag As thiab Luv sib yuav, yog lub zos Das Vis yug, thiab yog lub zos Xas Muas tuaj pleev Das Vis ua vaj. Li ntawd, lawv thiaj hais tias Npes Les Hes yog Das Vis lub zos. Lo lus ‘Npes Les Hes’ txhais tias ‘lub tsev muaj mov’.
‘Cov kws hnub qub’ mas peb tsis paub ntau yam txog lawv, qhov peb paub mas yog lawv tuaj Pes Xis teb tuaj, vim nyob Pes Xis teb mas muaj ib co Leej Choj saib kam cov hnub qub los ntaus txheeb saib neeg txoj hmoov. Peb kuj tsis paub tseeb tias muaj pes tsawg tus kws hnub qub, tab sis nyob nyob mas cov Koom Txoos xav teem ib lub hnub nyoog nco txog cov kws hnub qub ntawd, ces nyias xav nyias yam raws li nyias lub teb chaws; nyob Toob Fab Nrab lawv sau duab muaj 12 tug kws hnub qub, nyob Xib Fab lawv sau 3 tug hu ua Nkas Pas, Mes Nkhis Yos, thiab Npas Tas Xas. Lawv nqa cov paj tshab tuaj pub rau tus me nyuam Yes Xus. Cov paj tshab uas cov kws hnub qub nqa tuaj hwm tus me nyuam Yes Xus, mas muaj 3 yam xws li kub, txab ntoo xyab, thiab txab txiv yoov.
‘Kub’ yog paj tshab pub rau tus ua vaj, ‘txab ntoo xyab’ yog paj tshab cev rau Tswv Ntuj, ‘txab txiv yoov’ yog tshuaj pleev tus tuag lub cev kom txhob lwj. Peb yam paj tshab no thiaj muaj lub ntsiab tias Yes Xus yog Tswv Ntuj, nws xeeb lub cev nqaij ua neeg mas muaj ib hnub nws yuav raug tuag tab sis nws yuav sawv rov los, thiab nws yuav ua tas qab ntuj neeg tus vaj mus li.
Peb tseem hnov hais txog ‘lub hnub qub’ thiab. Ib txwm mas tas lub qab ntuj neeg xav tias ib tug huab tais los ib tug vaj tuaj saum ntuj tuaj, mas phim nws yuav muaj nws ib lub hnub qub nyob saum ntuj qhia sawv daws tias nws muaj hwj chim tshaj tas txhia leej. Tswv Ntuj paub tias neeg zoo siab ntseeg li ntawd, Tswv Ntuj thiaj ua hwj huam pab sawv daws hwm nws Leej Tub nqes los ua neeg. Raws li ntawv piav mas lub hnub qub coj cov kws hnub qub kev, yog ib lub hnub qub txawv. Lub hnub qub no siab tsis txij cov hnub qub tsheej ntuj saud, thiab lub hnub qub no txawj txav mus nyob saum ntuj.
Tos cov kws hnub qub paub tias lub hnub qub lawv pom no yog lub hnub qub qhia txog ib tug vaj Yus Das, mas tej zaus yog lawv tau hnov cov Yus Das piav txog; vim nyob hauv cov His Xas Lais kwv huam mas hais tias 1,300 xyoo ua ntej mas tus dab Npas Las foom hmoov zoo rau saum cov His Xas Lais nyob teb chaws suab puam tias “Kuv pom ib lub hnub qub sawv los nyob hauv Yas Kos, lub hnub qub ntawd yuav sawv los ua vaj (XP 24: 17-19).
Niaj hnub no peb yuav muab lub hnub qub los piv rau Ntuj lub txiaj ntsim ua kom peb pom kev tuaj cuag Yes Xus thiab peb tseem muab piv rau lub Moo Zoo tuaj coj cov haiv neeg mus cuag Yes Xus. Peb kuj yuav ua zoo li cov kws hnub qub raws lub hnub qub mus kom pom Yes Xus, ces peb ntseeg tias Yes Xus yog peb tus vaj, yog Tswv Ntuj Leej Tub.
Tus Tshiab hais hauv npau suav kom Yos Xes coj tus me nyuam Yes Xus thiab leej niam tsiv mus nyob Hais Nkws Tos teb, lawv sawv kev mus li 6 hnub tej thiaj mus txog Hais Nkws Tos. Lawv nyob ntawd ntev li hli puav xwb, vim tias tus vaj Hes Los tuag lub caij cov Yus Das npaj ua lub hnub nyoog Hla ze ze ntawd.
Nyob hauv tus Yaj Saub Os Xes phau ntawv hais txog Huab Tais Tswv Ntuj hu haiv His Xas Lais khuam nyob Hais Nkws Tos teb kom rov qab los nyob Kas Nas Has teb. Os Xes saib haiv His Xas Lais yog zoo li Huab Tais Tswv Ntuj ib tug tub, ces Os Xes hais tias Tswv Ntuj hu Tswv Ntuj tus tub tawm Hais Nkws Tos teb los. Mas Tais tau muab Os Xes lo lus no los txhais hais txog Yes Xus.
Nyob hauv qib 23 Mas Tais sau tias “Yos Xes thiab Mab Liab coj tus me nyuam Yes Xus los nyob ruaj hauv ib lub zos Nas Xas Les, qhov ntawd tshwm sim kom muaj raws li cov yaj saub xub hais tias luag yuav hu nws ua neeg Nas Xos Les.” Lo lus ‘Nas Xos Les’ no txhais tias ‘tus uas luag thuam’. Qhov no kuj yog tsom txog Yes Xus lub neej yav tom ntej tias yuav muaj neeg thuam Yes Xus.
