Cov Rohingya ua hmoov tsuj xeeb txwm 9 xyoos hauv kev ua neeg thoj nam, nyob hauv lub caij muaj kev tshaib nqhis thiab lub neej tsis ruaj khov.

Cov neeg thoj nam Rohingya li ntawm 1 plhom 200 txhiab leej yog nyob hauv cov yeej thoj nam nqaim nqaim li ntawm 30 lub hauv lub nroog Cox’s Bazar. Lawv feem coob khiav tawm ntawm Mias Mas teb tom qab cov tub rog cheb ntxuav hauv xyoo 2017. Thaum ua cov kab ke nco txog hauv lub lis piam tag los, cov neeg tawm tsam tau thov kev ncaj ncees rau tej kev phem uas cov tub rog tau ua rau cov Rohingya. Thiab lawv thov kom lawv tau rov mus lawv qub teb qub chaw yam kaj siab lug.

Txhua lo lus xws li ‘kev ncaj ncees ntawm cov Rohingya, kev cia siab yog lub tsev. Thiab kev ncaj ncees uas taij thov peb txoj cai.” Yog lo lus uas ua tawm nyob hauv kev sib sau tawm tsam los ntawm lub Koom Haum neeg Rohingya. Sayed Ullah tus thawj tswj pab neeg hais tias : “Cov neeg thoj nam xav rov qab mus rau Mias Mas teb, tab sis tos tsis taus kev sib tham ntawm cov teb chaws kom kheev lawv rov mus qub teb chaws ntxiv.” Txawm li cas kuj xij, qhov yuav tau rov qab mus lawv teb chaws yam kaj siab lug ntshe yuav tsis muaj. Vim tseem muaj kev sib tua rog tsis tu ncua nyob hauv lub xeev Rakhine. Cov tiam lis nyob Npees Las Des teb hais tias : “Kev tsis sib haum xeeb heev zuj zus, kev sib tua saum nruab ntug, thiab kev txwv kev pab cuam fab tib neeg kev ncaj ncees, ua kom tsis muaj kev tso siab txog qhov yuav tau rov mus lawv teb chaws. Kev ncaj ncees hauv Npees Las Des cov yeej thoj nam kuj phem zuj zus, vim tsis muaj peev xwm nyiaj txiag thiab txhiam xws noj kuj tsawg dua qub. Cov me nyuam yaus yog cov coob tshaj nyob hauv cov neeg thoj nam. Lub Koom Haum txuag cov me nyuam hais tias ; cov neeg thoj nam Rohingya 1 leeg hauv 3 leeg yuav raug kev tshaib nqhis txij lub 9 hli mus txog lub 12 hlis. Cov me nyuam tub ntxhais loj hlob nyob hauv qhov chaw tsis muaj kev kawm thiab kev tsis ruaj khov txhab ntxiv. Hais txog cov neeg thoj nam feem coob, mas hnub txwm xyoo li no rov ua rau lawv nco txog tej kev mob hauv kev phem uas nias kom lawv tso vaj tse tseg. Cov dim siav caij piav txog kev tua neeg, kev ua phem mos deev cov poj niam, kev hlawv vaj hlawv tsev thiab vaj tse piam sij nrog rau lawv tej liaj teb. Npees Las Des thov kom cov Rohingya rov qab mus Mias Mas teb yam kaj siab lug thiab rov muaj meej mom. Thiab lawv hais tias lub teb chaws tab tom muab siab rau yuav saib xyuas cov pej xeem thoj nam ntau txhiab leej. Hauv kev cheb ntxuav xyoo 2017, cov Rohingya tej vaj tse raug hlawv thiab tsoom pej xeem raug tua tuag coob, yog kev cheb ntxuav tua neeg uas lub tuam tsev kev ncaj ncees ntawm cov teb chaws nyob Hague tab tom hais txog.