Lo lus hauv lub neej, lub 4 hlis 2026.
“Nrog wb nyob mas ! Yuav tsaus ntuj lawm, lub hnub twb yuav poob qho.”
(LK 24 : 29)
Ntawm txoj kev mus rau lub zos Es Mas Ws, yog txoj kev uas Yes Xus ob tug Thwj Tim tab tom taug. Lawv tu siab vim Lawv txoj kev npau suav, tej hauj lwm thiab lub sij hawm uas tau nrog lawv tus xib hwb tag lawm. Nkawd tab tom taug kev rov mus nkawd lub zos thiab rov mus ua lub neej xws li thaum tsis tau ntsib Yes Xus. Nyuam qhuav peb hnub xwb uas Yes Xus raug ntsia saum Ntoo Cuam. Kev tu siab, kev ntshai thiab kev ua xyem xyav npog rawv Yes Xus cov Thwj Tim. Lawv tab tom khiav tawm hauv Yes Lus Xas Les thiab tso kev npau suav uas tsis yog qhov tseeb tseg rau tom qab, nyob nrug deb ntawm Leej Pleev thiab nws cov lus qhia. Lawv tu siab, vim lawv txiav txim siab tso cov hauj lwm uas lawv raws Yes Xus pov tseg. Nov yog tas nrho peb uas yuam kev nyob hauv kev quab yuam kom yuav tsum xaiv. Hauv lub neej peb kheev kheev xav tias kev tawm yog kev tig nrob qaum, ua tus swb thiab tso tseg. Zoo li nov yog tib txoj kev xaiv uas yuav kho tau peb tej kev tu siab. Nyob hauv peb puas muaj leej twg tseem tsis tau swm yam tshwm sim nyob hauv lub tsev txais qhua hauv lub nroog Es Mas Ws ? Puas muaj leej twg uas tsis tau taug dua txoj kev no, thaum yuav tsaus ntuj uas saib zoo li txhua yam tag kev cia siab ?
“Nrog wb nyob mas ! Yuav tsaus ntuj lawm, lub hnub twb yuav poob qho.”
Ntawm tog kev muaj ib tug txiv neej txawv ntsej muag tau nrog ob tug Thwj Tim mus kev ua ke, thiab saib zoo li nws tsis paub txog yam uas nyuam qhuav tshwm sim. Nws pib nug tej lo lus uas ua rau lawv tej kev ntxhov siab tawm los. Thaum ntej nws mloog nkawd thiab nws pib nthuav Ntawv Ntshiab. Nws yog kev sib tham ntawm lawv. Kev sib ntsib tau ua rau nkawd nco tsis tau Yes Xus, tab sis nkawd kuj cheem kom Yes Xus nrog nkawd nyob, vim yuav tsaus ntuj lawm. Lo lus hauv lub neej no, tej zaum yog ib lo lus thov Ntuj zoo uas peb pom nyob hauv ntawv Moo Zoo. Yog thawj lo lus thov Ntuj tawm los ntawm cov Thwj Tim lub siab rau tus Tswv Ntuj muaj txoj sia. Thiab yog kev zoo siab uas peb caw tau Yes Xus zoo li no. Thov kom Yes Xus nrog peb nyob thiab nyob nruab nrab hauv peb. Thaum Yes Xus ntais lub ncuav mov, mas ob tug Thwj Tim lub qhov muag qhib plho thiab zoo siab uas nkawd nco tau Yes Xus. Qhov kawg nkawd rov mus Yes Lus Xas Les kom tau piav tej ntawd rau lwm cov Thwj Tim paub.
“Nrog wb nyob mas ! Yuav tsaus ntuj lawm, lub hnub twb yuav poob qho.”
Tej zaum tsis muaj lwm lo lus yuav piav tau txog qhov Yes Xus nrog peb nyob zoo dua cov lus no, uas peb tau txais txij thaum pib los.” Chiara Lubich sau tseg tias :
“Vim thaum Yes Xus nrog peb nyob, tab txawm tias yog tus ntsuj plig nyob xwb, tsis kav Yes Xus piav Ntawv Ntshiab rau peb mloog. Thaum ntawd peb lub siab kub lug vim nws txoj kev nyiam kev hlub uas yog txoj sia. Thaum peb paub txog nws txoj kev nyob lawm, peb nyob tsis tau yog tsis muaj nws. Nws yog hmo uas tsaus ntuj tshaj plaws. 3 hmos yog lub Cim hauv qhov tsaus ntuj, qhov tsis paub, tsis muaj qhov pom kev uas peb nrhiav pom. Vim peb tsis ntseeg txog Yes Xus kev nyob uas tseem nrog peb nyob mus li. Qhov tsaus ntuj yog qhov qhwv peb lub ntiaj teb uas muaj qhov txhab thiab raug kev puas tsuaj los ntawm tsov rog thiab nyiaj txiag lub hwj chim. Qhov tsaus ntuj yog plhom leej neeg tej kev paub uas tsis muaj suab tawm tsam kev tsis ncaj ncees thiab kev caij tsuj ntxiv mus. Peb yuav paub txog Yes Xus kev nyob tau li cas ?
Thaum Yes Xus tsis tau tawm tuaj raws li qhov peb xav, peb yuav nkag siab tau li cas tias Yes Xus nrog peb mus kev ua ke thiab pab kom peb paub txog lub Cim ntawm nws kev nyob ? Thiab dhau ntawd lawm, peb yuav muaj dab tsi los ua kom Yes Xus nthuav tawm nws tus kheej thiab nrog peb nyob tau li cas ? Nov yog lo lus nug uas peb tsis paub lo lus teb. Tab sis yog lo lus nug uas txhib kom peb txhob tso kev nrhiav Yes Xus tseg. Kom peb muab siab rau saib peb cov phooj ywg mus kev ua ke uas peb kheev kheev ntsia tsis pom, kom tau paub Yes Xus tus uas tuaj nrog peb nyob. Yog peb ua lub neej hauv kev sib nyiam sib hlub, mas txoj kev mus rau Es Mas Ws yog lub Cim ntawm peb txhua txoj kev. Yog txoj kev mus cuag Tswv Ntuj. Yog txoj kev muab kev sov siab rau peb lub siab thiab coj peb rov mus rau cov zej zog uas ntseeg, kom peb tau koom ua pov thawj tias ; Leej Pleev sawv rov qab los lawm.
