Cov neeg ntseeg nyob Delhi sib koom thov Ntuj rau Is Ntias teb. Thov kev muaj vaj huam sib luag thiab kev tshaj lub Moo Zoo uas txaus ntseeg.

Kev sib sau zaum no yog lub Koom Haum cov ntseeg nyob Delhi npaj nyob hauv lub Cheeb Koom Txoos lub tsev sab laj nyob Gole Dak Khana, uas yog nyob nruab nrab hauv Delhi. Ze cov neeg ntseeg ntau lub tuam tsev tseem ceeb thiab cov Tswv Qhia Is Ntias lub tuam tsev. Cov hauj lwm no tau hu cov neeg ntseeg hauv cov tsev teev Ntuj, cov Koom Haum thiab lwm cov tuam tsev kom tau thov Ntuj, tau pe hawm, tau xav txog thiab tau muaj feem cuam. Tswv Qhia Couto nyob Delhi tus hais lus qhib cov kab ke, thov kom cov neeg ntseeg ua pov thawj txaus ntseeg rau lub Moo Zoo nyob hauv lawv lub neej. Tswv Qhia Couto tau hais txog kev xav ntawm Mahatma Gandhi’s hauv kev pauv ntxeev ntawm cov ua lub neej raws lub Moo Zoo tseeb tiag, thiab nws hais rau cov tuaj sib koom kom nyias rov tsom nyias tus kheej thiab nug tias : “Dab tsi ua kom peb sib tawg ? Dab tsi yuav pauv ntxeev ? Dab tsi uas yuav raug hloov ?” Nws txhib kom cov neeg ntseeg hloov pauv ntau dua no thiab taug lub Moo Zoo txoj kev kom rais ua yam tsim tawm tshiab. Kom pom txog lawv txoj kev ntseeg nyob hauv kev nyiam kev hlub, kev sib koom siab, kev ua tub txib thiab kev nqis tes ua. Nws muab Leej Ntshiab Tes Les Xas Lis Xyaws los ua piv txwv ib yam li cov paj ntoos me me. Tswv Qhia tseem tau hais txog kev tso siab rau Tswv Ntuj tseeb tiag. Nws hais tias : “Kev tso siab ntawm Tes Les Xas tsis yog kev tso siab xws li cov me nyuam, tab sis yog qhia txog kev cia siab tob nyob hauv Leej Pleev. Kev sib sau zaum no yog taw mus rau kev thaj yeeb thiab kev sib haum xeeb. Cov tuaj sib sau thov Ntuj pab rau cov neeg ntseeg, cov tsev teev Ntuj, cov yim neeg thiab pab rhuav tshem txhua yam kev phem uas tshwm sim los ntawm qhov sib txawv hauv kev nplua nuj, kab lis kev cai thiab lwm yam. Dhau no lawm tseem muaj kev thov Ntuj rau cov teb chaws uas muaj kev kub ntxhov hauv tsov rog thiab kev tsis sib haum xeeb. Thov kom cov thawj coj nyob ntiaj teb ua hauj lwm rau kev thaj yeeb, kev ncaj ncees, thiab kev sib haum xeeb los hloov kev phem. Cov tuaj sib koom thov Ntuj rau Is Ntias teb yav tom ntej, rau kev muaj vaj huam sib luag hauv lub teb chaws, rau kev sib haum xeeb hauv kev ntseeg, kev kav teb chaws zoo thiab kev ncaj ncees. Lawv tseem thov Ntuj rau cov poj niam thiab cov ntxhais uas ntsib kev phem, kev pluag txom nyem thiab kev raug tso pov tseg. Mus txog rau cov me nyuam yaus, cov yim neeg, cov pluag txom nyem, cov tsis muaj lub zoo caij, cov neeg raug ntxias thiab pab rau kev kawm ntawv. Kev sib sau hauv kev ntseeg zaum no, muaj nyeem ntawv Moo Zoo, pe hawm, hu nkauj sib xyaws, seev cev, suab paj nruag, ua yeeb yam luv luv thiab hais txog tej kab lis kev cai. Cov neeg ntseeg ntawm txhua txoj kev ntseeg tuaj sib koom, ua kom pom txog ntau yam ntawm lub Koom Txoos nyob hauv tuam ceeb Delhi. Tus txheej txheem zaus rau kev teev Ntuj txhawb nqa lub Koom Txoos thiab foom hmoov zoo, nrog rau kev ua tsaug thiab hu zaj nkauj hwm lub teb chaws. Kev sib sau txhib kev muaj vaj huam sib luag ntawm cov neeg ntseeg tias; tsis tas yuav muaj zoo ib yam. Cov tuaj sib koom ntawm cov tsev teev Ntuj thiab txhua yam kab lis kev cai, tau tuaj sib cog lus ua ke hauv kev teev Ntuj, kev ua tub txib thiab kev noj qab nyob zoo ntawm Is Ntias teb. Hais txog cov neeg tuaj sib koom teev Ntuj pub rau Is Ntias teb 2026, kuj yog kev nqua hu kom thov Ntuj pub rau lub teb chaws. Thiab thov kom xav tias cov neeg ntseeg puas muaj feem tsim kev thaj yeeb, kev sib haum xeeb, thiab zej zog kev sib haum xeeb tau li cas los ntawm lawv txoj kev ua pov thawj.