Cov thawj coj lub Koom Txoos Mias Mas thiab Thaib, lees txog kev muab siab rau saib xyuas cov neeg thoj nam nyob raws ciam teb.
Tswv Qhia Celso Ba Shwe uas nyob hauv lub Cheeb Koom Txoos Loikaw, nyobMias Mas teb. Tau tuaj tsham tus Tswv Qhia tshiab Suphot nyob Chiangmai hnub tim 3 lub 8 hli no, kom tau txhawb nqa cov hauj lwm saib xyuas cov neeg thoj nam nyob ntawm ciam teb. Kev sib ntsib thiab sib tham nyob hauv lub tsev tshaj Ntuj Lus nyob Chiangmai, tau nco txog kev sib koom tes los ntau caum xyoo ntawm 2 lub Cheeb Koom Txoos hauv kev pab cov neeg thoj nam thiab cov tsiv teb tsaws chaw nyob raws ciam teb. Txiv Plig Phe Bya tus ib txwm tshaj lub Moo Zoo hauv cov zej zog tsiv teb tsaws chaw nyob Mae Hong Son, tau hais txog kev sib raug zoo fab kev saib xyuas cov neeg tawg rog nyob ntawm Mias Mas thiab Thaib ciam teb. Muaj tsoom pej
xeem ntau txhiab leej, tshwj xeeb tshaj yog cov neeg Karen thiab cov Karenni. Lawv tau tsiv los nyob raws tus ciam teb, vim tej kev phem uas tseem muaj nyob Mias Mas teb. Cov Txiv Plig Kav Tos Liv thiab cov Leej Phauj tau mus ua lub thaj txi Ntuj rau lawv, pub lub Cim Yug, kev sau siab, cov hauj lwm tub ntxhais hluas thiab lwm yam kev saib xyuas. Txiv Plig kheev kheev mus kev deb hla tej toj roob hauv pes khwv kawg, kom tau mus txog txhua lub yeej thoj nam.
Lub Koom Txoos cov hauj lwm tau txais kev txhawb nqa los ntawm lub Koom Haum tib neeg kev ncaj ncees, nrog rau Kav Tos Liv lub Koom Haum pab neeg txom nyem COERR, thiab Yes Xus Is lub Koom Haum pab neeg thoj nam nyob Asia Pacific. Uas lawv txhawb nqa fab kev pab cuam, txhawb nqa fab ntsuj plig, txhawb nqa kev khwv nyiaj txiag thiab xyaum ua liaj ua teb. Cov me nyuam tau txais kev saib xyuas tshwj xeeb, vim muaj cov me nyuam yaus muaj coob dua ib nrab ntawm cov neeg thoj nam. Lub Koom Txoos tau nrhiav chaw nyob nyab xeeb rau lawv, pub kev kawm thiab xyaum kom lawv txawj pov hwm cov me nyuam kom txhob raug luag caij tsuj. Tsis tas li ntawd, tseem npaj txhij yuav kho lub neej tom ntej los yog thaum lawv rov qab mus lawv teb chaws, yog tias ua tau.
Kev sib tham ntawm ob tug Tswv Qhia hais meej txog kev muab siab rau hauv kev ua hauj lwm kom ntseeg tau tias ; kev tsis sib haum xeeb thiab kev tsiv teb tsaws chaw tsis yog teeb meem ntawm cov neeg pluag txom nyem, uas lawv yuav tau txais kev txhawb nqa fab kev ntseeg, kev ncaj ncees thiab fab ntsuj plig.
