Bolawan Buyog ib leeg niam uas yog neeg Mawv Xis Lim nyob Marawi, tseem nco tau kev pab cov yim neeg ntseeg uas nyob sib ze kom khiav dim thaum cov neeg phem tuaj vij cov nroog nyob Fis Lis Pees qab teb xyoo 2017. Nws thiab nws tsev neeg khiav nkaum tau 11 hnub mam tawm khiav nrog cov yim neeg ntseeg mus rau qhov chaw nyab xeeb. Buyog piav tias : “Peb muab khaub ncaws Mawv Xis Lim rau lawv hnav, kom lawv tau khiav dim ntawm tej kev phem.” Nws tus tub hlob Abdul Jabbar ploj thaum tab tom muaj kev ntaus sib tua thiab tseem ploj txog tav no. Nws tsev neeg tseem poob vaj tse thiab liaj teb huv si. Kev sib tua 5 lub hlis ntawm tseem hwv cov tub rog thiab tog ntxeev siab cuam tshuam txog pab Islam uas tua neeg tuag tshaj 1,200 leej. Ua rau 17,000 yim neeg khiav tsiv teb tsaws chaw thiab lub nroog Marawi raug rhuav piam sij ntau kawg. 8 xyoo tom qab cov neeg tuag coob leej tseem taij thov kev ncaj ncees, thov nqi taub hau thiab kev lees txais. Tirmizy Esmail Abdullah tus kws txuj fab liv xwm hauv lub tsev kawm txheej siab nyob Mindanao’s hais tias : “Kev tsiv teb tsaws chaw thiab kev tsis txaus siab tseem tsis tau raug daws kho, tseem yog teeb meem tseem ceeb hauv kev thaj yeeb.” Kev sib tua no lub keeb hauv cov liv xwm muaj ntau dua ntawd. Cov neeg Moro sib hais los ntev lawm hais txog lawv cov av, txoj cai thiab kev teeb tus kheej. Txawm li cas kuj xij, tom qab kev sib tua hauv hnub tim 11 lub 9 hlis 2001, mas kev sib tua no raug ntsia tias yog ‘tsov rog tiv kev tsim kev kub ntxhov hauv ntiaj teb.” Ua rau muaj kev ua xyem xyav txog cov Mawv Xis Lim ntau dua qub, yog hais raws li cov kws tshawb fawb hais. Tab txawm muaj kev phem li no, tsis kav cov thawj coj Kav Tos Liv kuj tseem txhawb nqa kev sib tham thiab kev sib koom tes ntawm cov kev teev hawm. Tswv Qhia Orlando Quevedo tus qub Tswv Qhia nyob Cotabato tau siv sij hawm ntau caum xyoo hauv kev txhawb nqa kev thaj yeeb thiab kev sib tham ntawm cov neeg ntseeg thiab cov Mawv Xis Lim. Tswv Qhia Antonio Ledesma uas yog cov Yes Xus Is tus qub Tswv Qhia nyob hauv lub nroog Cagayan de Oro kuj tau txhawb nqa kev sib tham thiab nws kuj tawm tsam txog cov dab neeg uas piav txog kev tsis sib haum xeeb tias : “Yog tsov rog ntshiab hauv kev ntseeg ib yam.”
Kev sib sau siab uas Tswv Qhia Ulama npaj los kom tau txhawb nqa kev sib koom tes ntawm cov thawj coj kev teev hawm thiab cov neeg ntseeg, tau rais ua kev sab laj ntawm cov thawj coj kev teev hawm nyob Mindanao’s. Qhov platform no tau coj tas cov thawj coj Mawv Xis Lim, cov Kav Tos Liv, cov Plos Tes Taas thiab cov neeg nyob txum tim. Nrog rau cov poj niam thiab cov tub ntxhais hluas, kom sib pab txhawb nqa kev thaj yeeb, kev sib hais haum thiab nrog txhim kho zej zog.
Txawm li cas kuj xij, hais txog ntawm cov neeg dim siav ciaj, xws li Buyog thiab tus neeg txhawb nqa xws li Abdullah, mas kev thaj yeeb tseem nyob nrog tib neeg kev ncaj ncees, kev txhim kho thiab txoj cai ntawm cov neeg tsiv teb tsaws chaw hauv kev ua lub neej tshiab. Raws li Tswv Qhia Ledesma tau hais tseg tias : “Peb yuav tsum txhawb nqa kev sib tham ntawm cov kev teev hawm tsis tu ncua.” Uas yog hais txog kev sib koom tes thiab kev tso siab tias ; yog qhov tseem ceeb rau Mindanao’s yav tom ntej.
