Thaib cov tub kawm ntawv Kav Tos Liv ua hmoov tsuj xeeb txwm 60 xyoo hauv kev kawm ntawv.
Kev sau siab los yog sab laj li no, tau sau tas cov sawv cev 565 leeg hauv 11 lub Cheeb Koom Txoos, hauv lub ntsiab lus ua raws Vas Tis Kav cov lus kom ‘sau daim theej teb hauv kev cia siab tshiab.’ Cov tuaj sau siab tau tuav xam txog cov tub kawm ntawv Kav Tos Liv yav tom ntej ntawm Technology kev pauv ntxeev mus sai, AI lub tswv yim tsim tawm thiab zej zog tej kab lis kev cai uas hloov mus. Txiv Plig Chaowarit Sasai tus thawj tswj pab neeg ua hauj lwm hais tias ; Kav Tos Liv kev kawm yuav tsum mus deb dua tej kev paub, kom tsim cov neeg muaj tswv yim, muaj kev ncaj ncees thiab kev ua hauj lwm uas siv Technology rau txiaj ntsim qab hau hauv zej zog.
Tswv Qhia Boonlert Phromsena tus thawj coj cov Txiv Plig ntawm CECT hais tias : “Kev kawm tsim nyog tsim tej tus neeg muaj kev txawj ntse txhua yam. Tsis hais fab tswv yim, fab kev ncaj ncees, fab ntsuj plig thiab zej zog.” Nws hais txog Vas Tis Kas tsab ntawv Antiqua et Nova tias : AI lub tswv yim tsim tawm tsis tuaj yeem hloov kev ncaj ncees, kev nyiam kev hlub, kev khuv leej, kev zam txim txhaum thiab kev muab tus kheej los ua hauj lwm ntawm tib neeg tau.
Tswv Qhia Peter B.Well tus sawv cev Vaj Qhia nyob Thaib teb, txhib kom cov tsev kawm ntawv Kav Tos Liv coj nyias tus cuj pwm thiab ua nyias cov hauj lwm. Nws hais kom cov xib hwb pub kev kawm uas ntseeg tau tias kev sib raug zoo, txoj cai thiab kev qhia ntawm lawv yog qhov pom txog Yes Xus meej tseeb. Yog lub plawv tseem ceeb ntawm Kav Tos Liv txoj kev kawm. Kev sau siab xaus rau kev muab siab rau txog kev vam meej ntawm Technology kom haum nrog Ntawv Ntshiab qhov muaj nqis. Ua ke ntawd kuj tsim Kav Tos Liv tus yam ntxwv hauv tsev kawm ntawv thiab npaj cov tub ntxhais hluas kom ua neeg zoo hauv zej zog uas muaj kev lees paub thiab muaj kev khuv leej.
