Tus Los Pas Mawv Xis Lim uas yog neeg Npees Las Des, tsim kev sib raug zoo ntev tshaj 40 tawm xyoo nrog cov Kav Tos Liv.
Tau 40 tawm xyoo lawm uas Mohammad Abdur Rashid 73 xyoos, tau qhib lub tsev muag duab nruab tsom iav hu ua ‘Rashid Glass’ nyob ntawm lub tsev teev Ntuj Kav Tos Liv Tejgaon ib sab hauv tuam ceeb Dhaka. Nws muag cov duab Yes Xus nruab tsom iav, duab Niam Mab Liab thiab duab Yes Xus tsev neeg. Cov duab Leej Ntshiab thiab qhov kawg, mas yog Vaj Qhia Leo 14 tus duab.
Rashid hais tias : “Yam uas nws xub pib ua nyob hauv kev ua lag luam xyoo 1988, yog maj mam tsim kev sib raug zoo uas sib ntseeg siab nrog cov neeg Kav Tos Liv nyob hauv zej zog. Kuv lub khw muaj cov Txiv Plig, cov Leej Phauj thiab qee zaus Tswv Qhia kuj tuaj tsham xyuas. Lawv hais lus zoo rau kuv thiab kuv zoo siab uas tau ntsib lawv.”
Lub khw yog teeb nyob ntawm lub tsev teev Ntuj Tejraon ib sab, yog qhov chaw uas muaj cov neeg ntseeg Kav Tos Liv nyob coob tshaj 10,000 leej. Ua rau lub khw no rais ua qhov chaw swm rau cov neeg tuaj teev Ntuj uas xav yuav duab mus pe hawm. Rashid tus tub kuj pab nws ua cov hauj lwm no, thiab nws xav tias 80 feem pua ntawm cov neeg tuaj yuav, yog cov Kav Tos Liv. Subir Gomes uas yog tus neeg tuaj yuav tas li qhuas txog Rashid txoj kev tos txais tias :
“Tab txawm Rashid yog ib tug Mawv Xis Lim, tsis kav nws tos txais cov neeg ntseeg zoo kawg, ces peb qhuas txog qhov nws ua.”
Npees Las Des teb muaj tsoom pej xeem 170 plhom leej, yog xam nrog cov neeg ntseeg Kav Tos Liv li ntawm 450,000 leej huv tib si. Kev sib raug zoo ntau caum xyoo ntawm Rashid thiab cov neeg ntseeg Kav Tos Liv, ua kom pom tias kev sib ntsib hauv niaj hnub muaj kev sib ntseeg siab, kev sib hwm thiab kev tos txais zoo. Tej yam no ua tus choj tuam rau cov neeg ntseeg tau li cas.
