Tus Tswv Qhia nyob Bangkok txhib kom pab neeg hauv lub pwm tsav ua siab ntev thiab muab siab rau, tab txawm txhua yam mus tau qeeb.
Hnub tim 3 lub 9 hlis no, nyob hauv lub tsev teev Ntuj hwm Leej Ntshiab Mis Kas Ees. Yog lub tsev qhuab qhia kev tshaj lub Moo Zoo hu ua Phu Waan, lub nroog Samphran, nyob Thaib teb. Kev sau siab yog lub pwm tsav Synodal ntawm cov Tswv Qhia As Xias los yog FABC ua cov npaj. Tau sau tas cov Tswv Qhia, cov Txiv Plig, cov Leej Phauj, cov Leej Tij, thiab cov thawj coj cov neeg ntseeg li ntawm 60 tawm leej nyob thoob As Xias teb tuaj, kom tau sib faib txog tej hauj lwm thiab soj ntsuam txog kev ua hauj lwm los txhawb nqa Synodal hauv zej zog. Tswv Qhia Vira tau hais txog lub ntsiab lus hauv kev ua tiav. Nws hais tias : “Kev ua tiav tseeb tiag tsis yog soj ntsuam los ntawm lub suab npe, kev nplua nuj los yog lub chaw zaum, tab sis yog los ntawm kev muab siab rau, kev loj hlob ntiag tug thiab yam zoo zoo uas yus tau ua rau lwm tus. Thiab nws hais ntxiv tias ; kev ua tiav tsis yog tshwm sim nyob hauv ib hmos.” Thiab nws kuj hais txog kev ua siab ntev, tus cuj pwm, kev ua xwm yeem thiab txaus siab yuav kawm kom paub los ntawm tej kev piam sij. Nws hais nrog nws cov lus nyob hauv ntawv Moo Zoo, uas yog hais txog cov Thwj Tim ua hauj lwm tas hnub tas hmo, tab sis lawv puav tsis tau ntses. Lawv puav tau ntses ntau yog tom qab lawv ua raws Yes Xus cov lus kom rov tso lub puav ntses rau hauv dej. Hais txog pab neeg nyob hauv lub Cheeb Koom Txoos, mas nws hais tias ; zaj no yog qhov qhia lub siab kom txhob tso cov hauj lwm tseg, vim qhov tau los tsis ua kom pom kiag tam sid. “Tsis muaj dab tsi yuav ua tsis tau, yog tias muaj kev ntseeg.” Nws hais ntxiv tias : “Tib neeg kev muab siab rau, yuav tsum ua nrog kev tso siab rau Tswv Ntuj.” Tswv Qhia Vira tau xav txog zaj paj lug hais txog tus tseb noob nyob hauv Mas Kos zaj 4. Txiv Plig Clarence Devadass tus lwm thawj tswj Synodal hauv lub Koom Txoos Anglican tau hais nyob hauv nws cov lus xaus lub rooj sau siab. Nws hais tias : “Daim duab uas cov noob poob rau saum txhua thaj av, ua kom pom txog kev mus kev ntawm Synodal, uas yog vam txog kev ua siab ntev thiab kev cia siab tias : “Kev muab siab rau hnub no, txog qhov kawg nws yuav txi txiv.” Txiv Plig Clarence Devadass tau txhawb dej siab rau cov tuaj sib koom sau siab, kom lawv coj cov noob uas tau txais hauv lub rooj sau siab rov mus rau hauv lawv lub tsev teev Ntuj thiab muab tseb. Kev sau siab yog hais txog kev sib koom tes, kev txhawb nqa txhua lub Cheeb Koom Txoos thiab kev pab kom Synodal yog ib feem hauv cov tsev teev Ntuj lub neej niaj hnub. Cov tuaj sau siab hais tias : “Synodal tsis yog lub Koom Haum los yog tej ntaub ntawv, tab sis yog kev sib mloog, kev sib tuav xam thiab kev ua hauj lwm ua ke.” Thaum sawv daws npaj rov mus tsev, mas Tswv Qhia Vira tau txhawb dej siab rau lawv tias : “Kom sawv daws txhob qaug zog “ rau kev piam sij los yog qhov uas txhua yam mus tau qeeb. Nws hais tias : “Kev piam sij tej zaum yog lub sij hawm hauv kev kawm kom paub thiab kev rov txhim kho.” Cov lus xaus rov hais tias : “Tab txawm tias tib neeg yuav tseb noob thiab pov vas, tsis kav qhov yuav loj hlob thiab yuav tau sau qoob yog nyob ntawm Tswv Ntuj.” Kev sau siab zaum no yog FABC ib feem ntawm kev muab siab rau ua ntu zus, hauv kev txhawb nqa kev sib tham thiab kev mus kev ntawm cov Cheeb Koom Txoos nyob As Xias. Yuav tsim kev sib koom siab, kev muaj feem cuam thiab kev tshaj lub Moo Zoo kom mus thoob xeev ntuj.
