Tus tub hluas Fis Lis Pees hais tias: kev ntseeg pab kom nws dim ntawm kev raug phais

Tus tub hluas Fis Lis Pees hais tias : kev ntseeg pab kom nws dim ntawm kev raug phais ntev li 11 teev.

Jesse Pitogo muaj 27 xyoo. Nws ua lub neej tiv nrog tus kab mob Crohn's, los yog mob hnyuv los ntev tshaj 10 xyoo lawm. Nws nyiaj thiab tiv nrog txhua yam kab mob txom nyem kawg. Kev mus kho nyob hauv tsev kho mob, kev soj ntsuam ntawm kws kho mob, kev siv tshuaj, kev pauv tej zaub mov noj thiab kev ua lub neej hauv niaj hnub. Hnub tim 11 lub 8 hli, nws tau ntsib ib yam uas nws piav tias; yog zoo li ntsuj rog loj tshaj hauv nws lub neej. Qhov ntawd yog kev phais nws tus mob ntev li 11 teev. Hnub no Jesse tig rov mus xav txog tej teeb meem ntawd tsis yog vim nws ntshai, tab sis yog kev ua tsaug thiab ris txiaj. Nws hais tias : “Ua ntej yuav phais, kuv xav tias ntshe kuv yuav nyob ntsiag to thiab tso tus kheej tseg.”

Tag kis sawv ntxov hauv kev teev Ntuj.

Jesse sawv los kwv yees 3 teev yuav kaj ntug, yog 2 teev ua ntej nws yuav raug coj mus rau chav tsev phais neeg. Thaum nws zaum tos nyob hauv tsev kho mob, nws nyiag thov Ntuj thiab muab tus kheej tso rau hauv Yes Xus, Niam Mab Liab thiab Leej Ntshiab Charbel txhais tes. Nws thov Ntuj rau cov kws kho mob uas lawv paub txog txoj hnyuv loj mus txog lub nplos qhov quav. Yog tus kws kho mob Estrada thiab tas nrho cov neeg pab nws. Thov kom Tswv Ntuj coj lawv txhais tes ua hauj lwm thiab pub lub tswv yim thoob tsib thiab lub zog rau lawv. Tom qab ntawd tus kws kho mob Gelo uas yog tus saib xyuas nws hais rau nws tias : “Thaum 5.30-6.00 teev mas cov kws kho mob yuav coj koj mus hauv chav tsev phais neeg mob.” Ces Jesse thiaj hais qhia nws niam nws txiv nkawd paub tam sid. Vam tias nkawd yuav tuaj txog ua ntej coj nws mus phais. Lawv kuj ua li ntawd, ces kwv yees 20 fiab ua ntej yuav coj Jesse nqes mus sab hauv, mas nws niam nws txiv thiab nws tus txiv hlob uas yog Bebong kuj tuaj txog. Nws txiv hlob yog ib tug paub txog fab kev lim plawv. Lawv sib koom thov Ntuj xws li ib tse neeg. Tom qab ntawd Jesse tig mus ntsia nws txiv hlob thiab hais tias : “Txiv hlob Bebong, ua koj tsaug os. Yog tsis muaj koj, mas peb yuav tsis muaj hnub no.” Thaum sij hawm kwv yees 5.30 teev, Jesse raug coj mus rau chav tsev phais neeg mob. Nws luag thiab co co tes rau nws niam nws txiv thiab nws tus txiv hlob. Thaum 7 teev sawv ntxov, nws raug tso tshuaj tsaug zog. Thaum nws tsim los cov kws kho mob twb phais tas lawm, thiab tus kws kho mob Estrada kuj tawm mus lawm. Jesse raug coj mus pw rau chav tsev pw tos, ces nws tsaug zog thiab cov tshuaj tsaug zog maj mam yaj. Thaum nws rov los txog ntawm chav tsev cov neeg mob pw, mas Jesse niam thiab nws ob tug phooj ywg nrog rau nws tus qub xib hwb qhia ntawv nyob ntawd tos nws. Nws ob tug phooj ywg yog Rogie thiab Gian. Nkawd tuaj nyob tos, mas ua kev zoo siab rau Jesse kawg. Tom qab sib tham me ntsis thiab thau duab tas, mas Jesse rov qab pw tsaug zog. Hnub ntawd txhua yam xaus rau qhov zoo.

Tso siab rau Tswv Ntuj thiab nws cov kws kho mob.

Jesse hais tias nws tsis ntshai tsis poob siab, vim nws paub tias kev phais yeej yuav mus tau zoo. Nws tso siab rau tus kws kho mob Estrada. Nws hais tias : “Kuv ntseeg tias nws yuav pub kuv rov muaj txoj siab thiab tau lub neej zoo dua qub.” Nyob hauv ntau hnub dhau los ua ntej yuav phais, Jesse thov Ntuj txhua txhua hmo kom Tswv Ntuj coj cov kws kho mob thiab pab kom lawv phais nws tiav. Thaum nws paub tias phais tas lawm, nws tsis xav dab tsi, nws tsuas yog zoo siab thiab ua tsaug xwb. Nws hais tias : “Kuv zoo siab uas kev phais mus tau zoo.” Niam txiv, kwv tij phooj ywg thiab cov txhawb nqa nws puav leej nrog nws zoo siab. Ntawm Jesse mas qhov phais tas, yog qhov tseem ceeb rau nws tsev neeg. Yog kauj ruam tseem ceeb rau peb tsev neeg thiab kuv rov dim ntawm kuv tus mob uas yog raug phais tiav tas.

Thaum kev phais yog tib txoj kev tawm.

Jesse tsev neeg tau siv sij hawm ntau xyoo los kho nws tus mob Crohn's los yog mob hnyuv, uas yog kho raws li sawv daws kho kam. Kev phais zaum no thiab kev nrog cov kws kho mob tuav xam ntau zaus, kev mus kho hauv tsev kho mob, kev soj ntsuam ntshav, kev tsom tshuab hluav taws xob, kev siv tshuaj thiab kev hloov zaub mov noj. Jesse piav tias : “Lawv xav tias kuv yuav tsis raug phais, tab sis qhov kawg kev phais kuj yog tib txoj kev tawm xwb. Tab txawm tias yav tag los peb xav kho raws li tej kev paub, tsis kav kev phais kuj yog tib txoj kev uas yuav ua kom kuv dim siav ciaj.” Thaum cov kws kho mob phais nws, mas lawv kuj muab nws hlub tsib hlais lawm thiab, vim cov kws kho mob pom tias hauv nws lub tsib muaj 3 lub pob zeb nyob hauv. Jesse hais tias nws tus kws kho mob twb xub qhia rau nws ua ntej lawm tias; tsim nyog yuav tsum hlais tsib pov tseg, vim yuav ua rau nws muaj mob loj. Qhov muaj pob zeb nyob hauv nws lub tsib, yog vim cov ntshav khiav tsis zoo.

Kev xyaum kom swm nrog txoj hnyuv cuav.

Kev pauv ntxeev tseem ceeb zaum no tseem muaj ib yam tshwm sim tom qab phais tas, yog Jesse txoj hnyuv cuav. Yog txoj hnyuv cuav me ntawm lub plab txuas rau txoj hnyuv quav uas raug thau tawm nyob sab nraud. Hais txog Jesse mas kev xyaum kom swm nrog txoj hnyuv cuav yog lub cev thiab lub siab. Jesse hais tias : “Hais tiag tiag tias kuv muaj ntsis ntshai txog nws tus yam ntxwv.” Qhov uas pom ib qho hnyuv tawm nyob sab nraud, mas yog qhov lees txais nyuab thiab nyuab siab kawg. Tab sis nws hais tias cov nqaij ntawd tsis ua kom mob, vim tsis muaj cov hlab ntsha xaus. Tam sim no nws maj mam ib hnub zoo zuj zus. Nws tab tom ua kom swm thiab saib lub qhov txhab kom zoo.

Lub caij nyoog zaum ob.

Zaj hais txog Jesse tsis yog hais txog qhov nyuab ntawm cov kws kho mob xwb, nws tseem yog hais txog kev ntseeg, kev tso siab thiab kev cia siab huv tib si. Nws txoj kev mus kev tau txais kev txhawb zog los ntawm cov kws kho mob, hauv tsev neeg, cov phooj ywg thiab cov txhawb nqa. Thiab kev ntseeg kuj pab kom nws muab yam nws tswj tsis tau los tso rau hauv Tswv Ntuj xib teg. Ua ntej yuav phais, nws thov Ntuj pub rau nws tus kws kho mob. Hnub phais nws thaum sawv ntxov, nws nrog nws tsev neeg teev Ntuj ua ke. Tom qab ntawd nws nyob ntsiag to thiab tso siab rau kev coj nws mus hauv chav tsev phais neeg. Hais txog Jesse mas kev phais tiav tas yog qhov pib ntawm yam nws npaj siab tseg. Kev kho tej mob tej zaum yuav ua rau nws rov muaj zog, txhawb lub cev ntaj ntsug thiab rov muaj lub neej zoo li thaum nws tsis tau mob. Qhov maj mam zoo tseem muaj ntxiv, kev ua kom swm nrog txoj hnyuv cuav thiab tej teeb meem hauv kev siv sij hawm ntev los phais. Jesse xav txog yav tom ntej thiab ua tsaug rau tus kws kho mob uas saib xyuas nws. Ua tsaug rau tsev neeg uas nyob rawv ntawm nws ib sab thiab tej lus thov Ntuj pab nws. Hais txog nws, mas kev phais tau qhib lub qhov rooj rau yam nws hu ua lub caij nyoog zaum ob hauv lub neej, thiab lub peev xwm uas yuav ua lub neej kom txaus nkaus.

Kwv tij Hmoob sawv daws ! Hnub no peb tham txog Jesse raug phais los xaus li no xwb. Kev ntseeg pab kom nws txawj tswj tus kheej, txawj tso siab rau cov kws kho mob thiab muaj kev cia siab. Kev ntseeg yog qhov pab cawm nws txoj sia.

Li ntawd, peb yuav nco ntsoov teev Ntuj thiab thov Tswv Ntuj pab peb. Peb tso siab rau Tswv Ntuj mog ! Thov Peb tus Huab Tais Yes Xus Pleev lub txiaj ntsim nrog nej nyob, ua nej siab kaj lug ! Lwm zaus peb mam sib ntsib dua, nej sawv daws nyob zoo