Tus Txiv Plig neeg Irish thov kom cov tuaj sau siab fab digital, kom ua qhov chaw tos txais Tswv Ntuj cov Lus.
Tus Txiv Plig Columba Jordan CFR hais rau cov tub xov xwm thiab cov tub tshaj Ntuj Lus Kav Tos Liv Online li ntawm 100 tawm leej nyob thoob As Xias teb, hauv kev sau siab 4 hnub ntawm Radio Veritas Asia, hauv lub nroog Quezon City nyob Fis Lis Pees teb. Hauv lub ntsiab lus nws hais ‘ntawm yus txoj kev ntseeg mus txog kev ua pov thawj tseeb tiag’, uas yog soj ntsuam tias cov tub tshaj Ntuj Lus Online puas yuav hla dhau kev nrhiav suab npe rau tus kheej thiab ntshai ua qhov chaw saib tau li cas, kom tau rais ua pov thawj tseeb tiag uas coj ib tsoom neeg mus txog Leej Pleev. Kev sau siab no yog lub pwm tsav cov Tswv Qhia As Xias FABC-OSC thiab RVA koom tes nrog Vas Tis Kas lub rooj ntawv xov xwm ua tus npaj los ntawm Fully Present Network. Kev sau siab yog npaj nyob hauv hnub tim 10-13 lub 9 hlis, hauv lub ntsiab lus “ntawm tus kheej mus txog kev ua pov thawj; lub neej hauv kev muaj feem cuam rau cov hauj lwm Online nyob As Xias.” Thaum hais txog nyias txoj kev paub ntawm cov hauj lwm nyob Online, mas Txiv Plig Jordan hais txog thawj yam kev ntxhov siab uas yog qhuas tus kheej thiab kev raug ntxias kom saib txoj hauj lwm ntawd yog yus ntiag tug. Nws kuj hais txog ib qho kev txaus ntshai thiab, qhov ntawd yog ntshai tus kheej ntau dhau ces yuav ntis lub txiaj ntsim uas Tswv Ntuj pub. Nws hais tias lo lus teb tsis yog kev ntxuav tus kheej tus cuj pwm, tab sis yog kev qhib siab rau Tswv Ntuj tau ua hauj lwm nyob hauv tus cuj pwm ntawd. Txiv Plig Jordan muab cov tub tshaj Ntuj Lus los piv ua qhov chaw tos txais Tswv Ntuj cov Lus. Nws muab Niam Mab Liab los ua piv txwv tias : Tswv Ntuj ua hauj lwm hauv kev ua neeg ntawm Niam Mab Liab. Yog lub Cim ntawm Yes Xus kev yug los ua neeg. Ua ke ntawd txhua tus tub tshaj Ntuj Lus kuj muab lawv tej kev paub, txoj hmoo thiab tus cuj pwm ntawm nws coj los siv ua kev tshaj lub Moo Zoo. Nws hais tias : “Lub Moo Zoo kheev kheev yog tawm los ntawm ib tus neeg twg tas mus li.”
Txawm li cas kuj xij, kev ua pov thawj tseeb tiag yog pib ntawm kev lees cia lub Moo Zoo nkag los nyob hauv yus. Txiv Plig Jordan piav txog qhov uas ib tug Txiv Plig qhia kom nws hloov lo los nug Tswv Ntuj tias : “Tswv Ntuj, koj xav kom me yaus hais dab tsi rau lawv ?” Muab hloov los ua lo lus tias : “Tswv Ntuj koj tab tom hais dab tsi rau me yaus ?” Kev hloov pauv ntawd pab kom nws tuaj yeem hais tau nws tej kev paub ntau dua qhov tsuas yog qhia lwm tus xwb. Nws txhawb dej siab rau cov tub tshaj Ntuj Lus Online kom rov nug tus kheej ua ntej yuav sau cov ntsiab lus tias : “Yam no hloov pauv kuv tau li cas, lub Moo Zoo puas tau tshwm sim muaj qab muaj quag nyob hauv kuv lub neej ?” Txiv Plig Jordan tseem tau hais txog kev qaug zog, tshwj xeeb tshaj yog thaum tshaj lub Moo Zoo rau cov tub ntxhais hluas uas lawv paub tias qee leej tab tom hais lus rau lawv. Kev ua pov thawj tseeb tiag hais txog sib faib qee yam uas yog qhov tseeb, nrog rau kev kawm ntiag tug, kev puas tsuaj thiab kev paub kev ntseeg. Nws hais txog Vaj Qhia Zam Paj Lug Ob tsab ntawv thiab hais tias cov tub tshaj Ntuj Lus Online tsis yog raug hu kom los sau cov ntsiab lus xwb, tab sis yuav qhia qee yam ntawm lawv tus kheej rau lwm tus kom mus ntsib Yes Xus tau. Nws tseem txhawb kom cov tuaj sau siab xav txog yam nyob hauv Ntawv Ntshiab los yog tej kev paub hauv lawv txoj kev ntseeg, uas lawv pom tias yog qhov txaus siab los yog nyuab heev. Lub caij zoo li no, nws hais tias yuav rais ua cov ntsiab lus tseeb tiag hauv kev ua pov thawj nyob Online tau. Nws xaus lus tias ; kev mus los hauv cov hauj lwm digital, yog kev hloov tus cuj pwm thiab kev ntshai mus txog kev xav txog Tswv Ntuj kev nyob, kev sib ntsib ntiag tug thiab kev ua pov thawj tseeb tiag.
Cov tub tshaj Ntuj Lus Onine yuav rais ua pov thawj txog Yes Xus tus muaj txoj sia, yog thaum lawv qhia tej kev paub uas lawv tau txais, thiab tso cai rau lwm tus kom pom tias Yes Xus tseem nyob thiab tseem ua hauj lwm hauv lawv lub neej.
