‘Txoj kev hauv digital tseem nyob tos’ Lo lus no yog FABC tus thawj tswj fab kev xa xov hauv zej zog hais rau cov tub tshaj Ntuj Lus Online neeg As Xias. “Txoj kev hauv digital tseem nyob tos’.

Tswv Qhia Maralit hais li no nyob hauv kev sib tham txog ‘ntawm Algorithms mus txog lub thaj txi Ntuj. “Kev ua kom Synodal hauv kev ua pov thawj nyob ntawm digital As Xias sab nraud.” Hnub tim 11 lub 9 hlis hauv Radio Veritas Asia nyob hauv lub nroog Quezon City. Hauv kev sau siab 4 hnub txij hnub tim 10-13 lub 9 hlis, hauv lub ntsiab lus “Ntawm cov muaj hwm chim mus txog kev ua pov thawj. Thiab Synodal txoj kev rau cov hauj lwm Online nyob As Xias.” Tau sau tas cov tub tshaj Ntuj Lus Online, cov tub xov xwm thiab cov muaj hwm chim nyob thoob xeev ntuj.

Tswv Qhia Maralit hais tias : “Ib tsoom neeg nyob thoob As Xias tab tom ua lub neej, tshawb nrhiav, tsim kev sib raug zoo thiab nrhiav lub ntsiab lus nyob hauv Online. Tswv Qhia Maralit hais tias : “Kev sib cav xaus lawm. Lub Koom Txoos tau nkag mus nyob ntawd lawm.” Nws hais ntxiv tias : “Lo lus nug tsis yog tias lub Koom Txoos puas tsim nyog nkag mus rau digital ? Tab sis yog qhov tias tas ib tsoom neeg yuav tau ntsib Yes Xus zoo li cas nyob hauv digital ?” Nws txhib kom cov tuaj sau siab txhob sau ntsiab lus thiab ntsuas kev ua tiav los ntawm neeg saib coob los saib tsawg, kev nias taub teg thiab cov neeg raws qab. Tab sis cov hauj lwm digital phim yuav rais ua kev mus ua ke ntawm lub Cheeb Koom Txoos hauv kev sib mloog, kev sib ntsib, kev rov xav txog thiab kev tsim kom muaj cov neeg ntseeg. Nws hais tias : “Cov ntsiab lus hauv Online tsis phim yuav ua qhov chaw txhawb tus cuj pwm los yog lub npe hauv kev ua tub tshaj Ntuj Lus xwb, tab sis phim yuav ua lub qhov rooj mus txog Yes Xus thiab pab kom lwm tus tau ntsib lub Moo Zoo los ntawm cov neeg ntseeg kev ua pov thawj tiag tiag.” Tej kev txhawj xeeb no tseem ceeb kawg nyob As Xias, uas cov neeg Online ua kom pom txog kab lis kev cai, xeem lus, kev teev hawm thiab qhov tseeb hauv cov zej zog uas muaj ntau yam sib txawv. Tswv Qhia Maralit hais tias : “As Xias nyob nrog symphony uas ciaj sia.” Thiab nws hais tias cov hauj lwm nyob Online yuav nrhau cag nyob hauv kev sib tham nrog tej kab lis kev cai, kev ntseeg thiab hauv cov neeg pluag txom nyem. Nws tseem muab lub Moo Zoo thiab Algorithms los sib piv thiab. Thaum Algorithms muab paj tshab rau kev khiav nrawm, tej yam tshiab thiab kev tsis sib haum xeeb, mas lub Moo Zoo thov kom ua siab ntev, nyob sib ze, sib pom dej siab thiab kev sib raug zoo uas coj mus txog kev   pauv ntxeev. Li ntawd, cov tub tshaj Ntuj Lus Online thiaj tsim yog tiv kev ua ib feem ntawm cov suab nrhoo hauv Internet, thiab ua chaw rau kev sib tham tiag tiag. Tswv Qhia Maralit tau hais txog 4 yam ntawm cov neeg tuaj sau siab hais txog Synodal hauv kev thaj lub Moo Zoo nyob Online, xws li kev sib mloog, nrhiav kev sib tham, xyaum tuav xam ua tib zoo xav thiab txhawb nqa cov neeg ntseeg. Dhau no lawm nws tseem hais txog 5 yam hauv kev pauv ntxeev, xws li ntawm cov ntsiab lus mus txog kev sib tham, ntawm cov neeg saib mus txog zej zog, ntawm kev tshaj tawm saib mus txog kev ncaj ncees, ntawm kev sib tw mus txog kev sib koom siab thiab ntawm lub hwj chim mus txog kev ua pov thawj. Nws hais tias : “Kev sib xa xav hauv zej zog Online tsuas yog ib qho me me, lub Cim Yug yog lub hom phiaj tom hauv ntej.” Nws hais tias kev tshaj lub Moo Zoo  hauv digital tsim nyog coj neeg mus deb dua kev muaj feem cuam hauv Online, mus txog cov neeg ntseeg thiab lub neej hauv cov Cim Ntshiab. Hauv kev xaus nws cov lus tseem ceeb, Tswv Qhia Maralit hais rau cov tuaj sau siab tias : “Txoj kev loj hauv digital tseem nyob tos.” Nws hais tias : “Thov mus nrog lub tswv yim hauv lub siab, thov sawv ntseg hauv neeg lub meej mom, thiab thov qhia cov zaj hais txog kev ntseeg nyob As Xias.”