Cia siab rau Tswv Ntuj thaum ntsib teeb meem (Trusting God in Dire Straits)
Ib tsoom phooj ywg sawv daws, hnub no peb yuav los nyeem zaj hais txog Es Lias thiab tus poj ntsuam nyob hauv lub nroog Xas Les Fas. Zaj no yog ib zaj uas kuv nyiam kawg. Kuv xav tias zaj no yog ib lub pov haum zais nyob hauv Ntawv Cog Lus Qub zoo ib yam li lwm zaj nyob hauv Ntawv Ntshiab thiab. Zaj no nws hais ntxaws thiab tsis khav theeb, tiam sis nws muaj lub ntsiab tseem ceeb hauv fab ntsuj plig.
Txawm li cas kuj xij, thov kom nkag siab zaj no xwb. Peb rov mus saib me ntsis kom nkag siab txog Es Lias thiab nws tus kheej. Nco ntsoov tias Es Lias yog tus thuam cov His Xas Lais tus vaj As Has, tus vaj uas nto npe tias yog tus phem tshaj hauv cov His Xas Lais. Nws yuav Es Xas Npes thiab nws muab lub teb chaws los teev cov dab cuav. Nyob hauv Ntawv Ntshiab, mas yog qhov yuam kev loj kawg. Li ntawd, Es Lias thiaj tiv nws. As Has hais tias : “Kuv yuav tsis cia kom ua li ntawd.” Es Lias tshaj tias lub ntuj yuav qhuav. Kev tso Tswv Ntuj pov tseg yog txhais tias tso tus pub txoj sia.
Ib yam li As Das thiab Es Vas raug ntiab tawm hauv lub vaj Es Dees thiab mus nyob teb chaws quav poj. Tsis yog Tswv Ntuj siab tawv thiab muab txim, tab sis yog fab ntsuj plig. Yog tias koj muab qhov koj txoj sia txhawv los tso pov tseg, mas koj txoj sia yuav qhuav. Li ntawd, ntuj yuav qhuav loj kawg nyob saum npoo av ib yam.
Es Lias pom tias nws poob nyob hauv txoj kev phem thiab Tswv Ntuj hais tias : “Koj nce mus saum roob thiab koj haus cov dej nyob ntawd. Kuv yuav kom uab lag nqa dej los cawm koj nyob ntawd.” Li ntawd, nws thiaj tsis raug xa mus rau cov tsev txais qhua. Tab sis yog qhov chaw nyob nrug deb. “Haus cov dej ntawm tus dej no, kuv yuav tso uab lag nqa dej los yug koj.” Qhov tseem ceeb tshaj rau sawv daws, yog nyob hauv lub caij sim, kev txom nyem thiab tej kev nyuab siab. Es Lias raug hu kom tso siab, nws yog qhov tseem ceeb heev nyob hauv fab ntsuj plig. Muaj qee zaus peb qaug zog, qaug zog hauv lub neej. Koj yuav ua li cas yog koj poob nyob hauv lub caij qaug zog li no ?
Lub sij hawm zoo li no, koj raug hu kom tso siab rau Tswv Ntuj txoj kev saib xyuas. Peb tsis ntseeg peb lub zog, tab sis peb ntseeg Tswv Ntuj lub zog. Thaum caij ntuj qhuav thiab lub caij nyoog dhau mus lawm, tus dej me me ntawm no kuj yuav nqhuab thiab Es Lias pom tias nws rov tag kev cia siab. Tswv Ntuj pub txhiam xws thiab dej haus, tab sis tam sim no tej dej ntws me me kuj nqhuab tag, nws poob siab heev. Koj yuav pom tias yav tag los yam uas ua rau koj muaj kev sov siab, ua rau koj muaj sia nws tab tom yuav nqhuab mus, ces koj pib ntxhov siab. Thaum zoo li ntawd, koj yuav ua li cas ?
Koj yuav tso siab rau Tswv Ntuj lub zog.
Ntu ob, Es Lias kuj hnov Tswv Ntuj lub suab hu tias : “Koj mus hauv lub nroog Xas Les Fas uas nyob hauv Xis Doos thiab koj nyob ntawd. Kuv yuav kom ib tug poj ntsuam yug koj.” Tam sim no peb nyeem zaj no nyob hauv tiam 21 thiab peb hais tias : nws yog qhov tsim nyog thiab zoo kawg. Nyob rau hauv Es Lias tiam neeg, nws zoo tsis tas. Es Lias mus rau lub nroog Xas Les Fas uas yog ib lub nroog me me nyob Xis Doos, nws nyob nrug deb ntawm His Xas Lais. Ces Es Lias saib zoo li nws tag kev cia siab nyob hauv nws lub teb chaws. Nws mus nyob xyaw ib co neeg uas tsis hais nws xeem lus, tsis muaj nws tej kab lis kev cai thiab tsis coj tib txoj kev teev hawm, ces nws ntxhov siab. Tab sis Tswv Ntuj hais tias nws yuav xa ib tug poj ntsuam tuaj yug Es Lias nyob ntawd. Tsis muaj leej twg muaj hmoo cuag tus poj ntsuam, vim nyob rau txheej thaud cov poj ntsuam uas lawv tus txiv tuag lawm, yog cov poob nyob hauv txoj kev phem. Yog tias koj tus txiv tuag lawm thiab koj tsis muaj kev pab dab tsi li, tej zaum koj tsev neeg yuav tso koj tseg thiab khiav koj mus, ces koj tsis tshuav dab tsi li.
Li ntawd, peb paub tias Es Lias tab tom raug teeb meem loj, nws yoo tshaib thiab tsis muaj dej haus. Es Lias thiaj tshais chaw khiav mus rau lub teb chaws tshiab, txawv kab lis kev cai, txawv zej zos thiab nws mus nrhiav ib tug poj ntsuam. Tus poj ntsuam ntawd yog tus Tswv Ntuj xa tuaj pab Es Lias. Es Lias nkag mus hauv lub nroog Xis Doos, nws mus txog ib lub nroog me me hu ua Xas Les Fas. Nws tau ntsib ib tug poj ntsuam ib yam li lwm tus uas nyob sib ze. Tus poj ntsuam ntawd tab tom ntsib kev txom nyem los ntawm ntuj qhuav. Nws tab tom yoo tshaib, nws tsis muaj dab tsi noj.
Li ntawd, Es Lias thiaj mus ntsib nws thiab thov dej thov ncuav mov noj. Tus poj niam hais tias : “Tus Tswv Ntuj muaj txoj sia, kuv tsis muaj dab tsi yuav noj, tsuas tshuav ib co poov xab me me nyob hauv qab hub thiab ib qho roj hauv qab hwj xwb.” Nws yuav npaj ib pluas mov kawg rau nws thiab nws tus tub. Es Lias tab tom xav dab tsi ne ?
Es Lias pom meej tias vim li cas nws thiaj ntxhov siab. Tswv Ntuj xa kuv mus txawv teb chaws, nws xa kuv mus ntsib tus poj ntsuam no thiab sawv daws yeej pom tias nws tsis muaj dab tsi, nws yog tus neeg muab tsis tau txhiam xws rau kuv noj.
Tus neeg tsis muaj dab tsi thiab raug xa mus ntsib ib tug neeg tsis muaj dab tsi, nws yuav zoo li cas ne ? Kawg tso siab rau Tswv Ntuj xwb, vim qhov ntawd yog lub zog txhawb siab. Es Lias tso siab rau Tswv Ntuj thiab nws hais tias :
“Ua li, kuv yuav ua raws li koj hais. Tab sis ua ntej no kuv xub thov ib lub ncuav mov.” Tus poj niam ntawd xav tias Es Lias lag ntseg, nws hais tias kuv nyuam qhuav hais rau koj tias : kuv tsis muaj dab tsi li. Kuv tsuas muaj txaus npaj ib pluas mov rau kuv tus tub wb noj xwb. Noj tas ces wb yuav tuag. Es Lias hais tias koj kav tsij mus npaj pluas mov kawg rau neb noj ua ntej neb yuav tuag. Tab sis ua ntej koj yuav ua li ntawd, thov puab ib lub ncuav mov me me rau kuv. Qhov Es Lias ua li ntawd, yog Tswv Ntuj lub tswv yim, nws yog lub hom phiaj ntawm Tswv Ntuj.
Es Lias thiab tus poj ntsuam nkawd tsis muaj dab tsi li, vim nkawd pluag txom nyem ib yam. Tab sis Es Lias thiab tus poj ntsuam ntawd nkawd sib pub noj. Tus poj ntsuam puab ib lub ncuav mov me me rau Es Lias, vim nws tsuas muaj li ntawd xwb. Nws muab tas yam nws muaj coj los faib rau lwm tus. Qhov no thiaj yog lub ntsiab nyob hauv zaj no. Tus poj niam ntawd pom tias nws cov poov xab thiab cov roj tsis muaj tas li. Nws txhab ntxiv ntau zuj zus tuaj txaus yug nws thiab nws tus tub thiab Es Lias lawv. Ces lawv thiaj hla dhau lub caij ntuj qhuav thiab kev txom nyem.
Nov yog sob lus nyob hauv fab ntsuj plig. Nej cov uas mloog kuv los ntau xyoo paub zoo tias : kuv nyiam hais txog Vaj Qhia Zam Paj Lug Ob cov lus.
“Koj kev ua neej nyob yuav txhab ntxiv raws li qhov koj faib.”
Li ntawd, cia zaj no txeem mus nyob hauv koj nruab siab, vim nws yog sob lus qhia tseem ceeb. Kuv pom tias ntau xyoo dhau los, kuv tau rov mus nyeem txhua zaj hauv lub neej. Muaj ntau yam nws nyuab thiab txom nyem. Tab sis thov tso siab nyob hauv kev ntseeg thiab muab siab rau ua raws li Tswv Ntuj qhia. Saib seb thaum xub thawj Es Lias txom nyem, nws mus haus tus dej me me, nws vam tias yuav muaj neeg muab txhiam xws pub nws noj. Leej twg yuav xav li ntawd ? Tab sis Tswv Ntuj tau ua tej yam txawv thiab xav tsis txog. Thaum Es Lias poob hauv kev txom nyem, nws mus rau ib qho chaw deb thiab tsis muaj neeg pub mov rau nws noj. Tab sis Tswv Ntuj xa nws mus thiab nws muab siab rau txog tus xa nws mus, ces nws hla dhau tej kev txom nyem ntawd. Thaum koj ntsib tej tus neeg hauv xov tooj los sis ntsib tej tus neeg uas koj tsis nco ceev faj, koj yuav xav tias : “Ua cas tus neeg ntawd yuav tuaj ntsib kuv zim txwv no ?” Tej zaum koj yuav xav tias tus neeg ntawd pab koj tsis tau yam koj xav tau. Tab sis yog Tswv Ntuj xa tus neeg ntawd tuaj thiab tej zaum nws yuav pab koj tau ntau tshaj qhov koj xav. Tej zaum qee yam koj muaj tab tom yuav ploj mus, tab sis koj yuav pom tias nws txhab ntxiv li 30-60 npaug. Ces koj yuav nco ntsoov zaj hais txog Es Lias thiab tus poj ntsuam nyob Xas Les Fas. Koj yuav nrhiav qee yam hauv lub neej fab ntsuj plig nyob hauv zaj no. Thov Tswv Ntuj foom hmoov zoo rau nej !
