Hais lo lus tias “Ua li” rau Tswv Ntuj mus ib sim neej. (Saying yes to God forever)

Hais lo lus tias “Ua li” rau Tswv Ntuj mus ib sim neej. (Saying yes to God forever)

Muaj ib tug ntxhais hluas nkauj Nyab Laj tau txiav txim siab meej kawg, nws muab nws lub neej cob rau Tswv Ntuj hauv ib tsoom neeg uas teev hawm Phus Thas, nyob toob fab pej hauv Thaib teb. Lub zos Thabom, yog ib lub zos nyob nrug deb lub xeev Loei sab toob fab pej. Tau rais ua tim khawv tseem ceeb hauv pab Leej Phauj Assumption li keeb kwm nyob Thaib teb los tau 40 tawm xyoo.

Suav txij hnub pab Leej Phauj Assumption tau pib cov hauj lwm nyob Thaib teb, cov Leej Phauj Assumption tau cog lus zaum kawg nyob Thaib teb thiab yog thawj zaug. Hnub tim 9 lub 12 hlis, Leej Phauj Regina ntawm tus Ntoo Cuam tau zeem tseeb txog nws txoj kev ntseeg nyob hauv lub Cim Yug ua kab ke cog lus mus tag ib sim neej. Muaj Tswv Qhia Luechai Thatwisai uas yog tus Tswv Qhia saib lub Cheeb Koom Txoos Udon Thani ua tus coj lub Txoos ua cov kab ke. Cov xwm no hais tau tias yog qhov tseem ceeb kawg nyob hauv cov Leej Phauj Assumption nyob Thaib teb. Cov kab ke yog ua nyob hauv lub tsev teev Ntuj hwm tus Tshiab Las Fais, uas sau cim tseg tias pab Leej Phauj tuaj txog ntawm thaj chaw no xyoo 1875.

Leej Phauj Regina hais tias : “Kuv pom tias kev ua lub neej Leej Phauj nyob Thabom, yog lub zog txhawb nqa kom kuv hais lo lus tias ‘Ua li’ rau Tswv Ntuj mus tag ib sim neej.” Leej Phauj Regina hais tias : nws tau ntsib kev nyiam kev hlub nyob Thabom nrog cov neeg teev hawm Phus Thas. Lawv sib nyiam sib hlub, sib muab siab rau saib xyuas yam sov siab, qhov no yog qhov lawv ua rau nws pom. Leej Phauj Deanna uas yog tus thawj coj lub tsev kawm ntawv Leej Ntshiab Zam nyob Thabom thiab ib tug Leej Phauj uas nws yog thawj pab tuaj txog Thabom hais tias : “Qhov chaw nyob ntawm kev tshaj Ntuj Lus, ua rau lawv tau txais kev paub hauv lub teb chaws.” Nws hais tias : “Tsis muaj haiv neeg twg, tsis muaj xeem lus twg uas yuav cais tau peb ncaim ntawm peb cov neeg txhua fab hauj lwm, cov neeg hauv zej zog, peb cov phooj ywg uas zaum ua ke tib lub rooj noj mov.”

Cov Leej Phauj Assumption tuaj txog Thaib teb thawj zaug hauv xyoo 1980, raws li Tswv Qhia Pietro Luigi Carretto nyob Surat Thani hauv Thaib qab teb cov lus caw. Xyoo 1998, tau pib cov hauj lwm hauv lub tsev kawm ntawv Leej Ntshiab Zam, nyob Thabom. Yog lub tsev kawm ntawv qib nrab nyob npuas lub tsev kawm ntawv qib qis uas yog pab Tus Cawm Seej ua tus kav.

4 xyoos tom qab, cov Leej Phauj Assumption tau teeb tsa pab neeg qhia kev ntseeg nyob Thabom, uas lub caij ntawd yog ib lub zos me me raug teeb meem los ntawm zej zog thiab kev lag luam. Vim kev siv yeeb siv tshuaj nthuav dav nyob hauv zej zog. Cov tswb hauv zej zog nrov txhua hnub kom tau ceeb toom txog cov neeg tuag hauv zej zog. Txawm li cas kuj xij, tab lawv lub npe tsis muaj dab tsi li, tsis kav cov neeg zej zog kuj sib sau ua ke kom tau nrhiav ib thaj av uas zim txwv no yog lub tsev kawm ntawv. Tam sim no thawj yam uas tseem ceeb ntawm lub tsev kawm ntawv, yog pab txais cov me nyuam uas lawv yog cov neeg pluag txom nyem. Muaj coob leej tau tuaj kawm ntawv nyob hauv lub tsev kawm ntawv thiab them nqi kawm ntawv qis dua.

Leej Phauj Deanna hais tias : “Cov xib hwb qhia ntawv hauv tsev kawm ntawv Thabom, feem coob yog teev hawm Phus Thas. Hnub no yog kev paub ntawm peb hauv kev paub qee yam loj uas peb hu ua “kev teev hawm” los yog lub Koom Txoos.”

Leej phauj hais tias : “Peb sawv daws yog ib feem hauv lub ntiaj teb, leej twg yog tus saib lub ntiaj teb no ? Peb hu nws ua Tswv Ntuj. Tej zaum ib hnub twg lawv yuav hu nws ua Leej Txiv thiab.” Peter Monthienvichienchai tus lwm thawj tswj ntawm Signis thiab nws txiv yog tus koom tes txhim tsa lub tsev kawm ntawv ; lub tsev kawm ntawv Thabom yog tus sawv cev ntawm lub ntsiab lus tias : “Kev nyob hauv lub Cim Yug uas tab tom ua lub Koom Txoos cov hauj lwm. Kev muab siab rau ntawm cov Leej Phauj, kev txhawb nqa ntawm tsoom pej xeem hauv zej zog thiab cov tub ntxhais lub zog hauv tsev kawm ntawv.” Dhau ntawd lawm, kev ua tus coj tawv qhawv ua kom pom cov poj niam lub zog txhawb nqa nyob hauv ntau caum xyoo dhau los yog qhov tseeg tiag. Kev tsuj xeeb nyob Thabom, tsis yog tias ua kom pom txog kev muab siab rau ntawm Leej Phauj Regina xwb, nws tseem tsom pom txog kev sib koom tes thiab yam sawv daws nyiam ua ke nyob hauv kev teev hawm thiab tej kab lis kev cai.

Leej Phauj Lerma Victoria uas nws yog tus pwm kev teev hawm ntawm Assumption nyob As Xias Pacific hais tias :

“Kab ke cog lus ua Leej Phauj ib sim neej, yog lub Cim ntawm kev cia siab.”

Ib tug Leej Phauj Nyab Laj tau txiav txim siab cog lus ua Leej Phauj mus tag ib sim neej nyob Thabom. Nyob Thabom muaj ntau yam tshwj xeeb yuav pub rau peb tus Leej Phauj hluas hluas, thiab qee yam tau pab kom lawv txiav txim siab uas yog zaum tseem ceeb kawg. Nws yog qhov tshwj xeeb thiab zoo tshaj plaws. Yog lub Cim ntawm kev cia siab rau yav tom ntej.

Leej Phauj Aranya Kitbunchu tus thawj coj ntawm cov Leej Phauj nyob Thaib teb cia siab tias cov kab ke cog lus no yuav ua kom pom tias muaj ib tug poj niam hauv txheej neeg nyem no uas nws kheev kheev hnov qab txog kev teev hawm, nws tau muab nws lub neej thiab nws txoj kev ntseeg coj los cev rau Tswv Ntuj. Ntawm cov teev hawm Phus Thas xws li tus pog Kannattha Siriphen uas nws yog tus xib hwb loj hauv lub tsev kawm ntawv Leej Ntshiab Zam nyob Thabom hais tias : “Qhov tau pom Leej Phauj cog lus zaum kawg, ua rau nws zoo siab thiab los kua muag.”

Nws cov lus hais li no : “Yav tag los kuv tau pom nyob hauv lub tshaj xyam los yog TV xwb, tab sis nyem no nws tshwm sim nyob hauv peb lub zos kiag thiab yog qhov tseeb tiag, ces kuv zoo siab thiab los kua muag.”

Nyob li ntawm Leej Phauj Regina, mas kev nyiam kev hlub thiab muaj ntau yam kev txhawj xeeb txog nws lub teb chaws uas nws yug los xws li Nyab Laj teb. Nws tau ua ib tug Leej Phauj nyob hauv Assumption. Yam uas nws xav tau yog pub kev nyiam kev hlub thiab txoj kev txhawj xeeb ntawd rov rau Thaib teb. Kev ua lub neej hauv kev teev hawm ntawm cov thwj tim, yog ib tug qauv ntawm kev ua lub neej cev rau Tswv Ntuj nyob hauv lub Koom Txoos. Cov tim xyoob yuav cog lus tias lawv ua neeg dawb huv, ua neeg pluag thiab mloog cov neeg zej zog los sis cov neeg ntseeg kev pom zoo. Kev ua lub neej nyob koom nrog zej zog, yog qhov tseem ceeb hauv kev ua lub neej cev rau Ntuj. Thaum cog lus thiab ua lub neej nyob hauv zej zog, txhua tus tub koom tes yuav rov ua pov thawj txog lub neej koom nrog Yes Xus, nrog lub Koom Txoos thiab rov sib pab lawv. Txawm tias cov neeg ntseeg txhua qhov chaw nyias muaj nyias lub Cim, tsis kav thaum los nyob ua ke lawm, lawv yuav rais ua qhov chaw txhawb siab uas muaj zog rau lub Koom Txoos tas nrho. Nyob hauv cov lus nthuav ntawv hais txog ntuas cov qhia kev ntseeg Vita Consecrata uas Vaj Qhia Zam Paj Lug Ob hais txog cov neeg ntseeg tias : “Kev ua tim khawv zoo thiab muaj ntau haiv neeg, nws ua kom pom txog ntau yam paj tshab uas Tswv Ntuj pub rau tus txhim tsa thiab tus pib. Qhib siab rau Leej Ntuj Plig Ntshiab ua hauj lwm thiab tuaj yeem mem tau cov Cim txheej tshiab, ua tau raws li txheej neeg tshiab xav tau. Cov poj niam thiab txiv neej uas lawv muab lawv lub neej los cev rau Tswv Ntuj, lawv yog Yes Xus tus duab nyob hauv Tswv Ntuj. Kom lawv lub neej muaj cov Thwj Tim tus ntsuj plig nkag mus nyob hauv thiab ua cov Thwj Tim tej hauj lwm nyob hauv kev xyuam xim thiab ua tib zoo xav.”

3 lo lus nyob hauv kev cog lus : yog ua neeg dawb huv, ua neeg pluag txom nyem thiab sib mloog. Yog 3 lo lus cog uas cov Txiv Plig siv los cog lus. Thaum muab los ua ke lawm, cov lus cog no yuav rais ua tus cag hauv kev ua lub neej cev rau Tswv Ntuj tseeb tiag nyob hauv lub Koom Txoos. Yog ua lub neej raws cov lus cog lawm, cov Leej Phauj yuav vam txog zej zog kom lawv cov hauj lwm tiav, vim txhua yam nws yog qhov tseem ceeb hauv kev sib sau ua ke. Kev cog lus hais txog kev sib mloog ua rau cov Leej Phauj coj raws Tswv Ntuj lub hom phiaj. Leej Phauj tus thawj coj ua tawm thiab nrhiav yam zoo zoo rau cov Leej Phauj thiab zej zog tas mus li.

Vaj Qhia Zam Paj Lug Ob tau piav txog cov lus nyob hauv Vita Consecrata tias : “Qhov ntshiab huv ntawm cov nkauj xwb yog qhia txog kev cev tus kheej rau Tswv Ntuj los ntawm lub siab tsis muaj qhov cais. Yog qhia txog kev nyiam kev hlub tsis muaj tag ntawm cov neeg ntshiab nyob hauv Huab Tais 3 leeg. Kev nyiam kev hlub uas muab lub siab tso rau Leej Ntuj Plig Ntshiab.” Txhib kom muaj kev ua hauj lwm nyob hauv kev nyiam kev hlub uas muaj rau Tswv Ntuj thiab cov kwv tij.

Kev pluag qhia tias Tswv Ntuj yog tib lub cuab tam muaj nqis rau tib neeg. Thaum kev pluag ua mus raws Yes Xus tus piv txwv, tab txawm nws yuav nplua nuj, tsis kav nws rais ua neeg pluag txom nyem.

Kev sib mloog yog ua raws Yes Xus tus piv txwv. Yes Xus cov txhiam xws, yog ua raws Leej Txiv lub hom phiaj. Ua kom pom txog qhov zoo nkauj ntawm kev daws tso thiab sib vam khom, tsis yog kev ua tub txib, tab sis yog kev rov sib vam khom. Muaj kev sib ntseeg siab ua qhov pom txog kev sib koom tes hauv kev nyiam kev hlub ntawm 3 tus neeg ntshiab.

Cov zej zog ntseeg txhua txhia lub tau txais koob hmoov uas yog paj tshab ntawm Leej Ntuj Plig Ntshiab hu ua “Charism”, yog qhia txog qhov zej zog raug hu kom raws Yes Xus. Charism hauv zej zog fab kev ntseeg qhia txog kev ua lub Koom Txoos cov hauj lwm uas yog kev ua lub neej hauv zej zog thiab kab lis kev cai uas yog lub Cim.

Nyob hauv lub Koom Txoos Kav Tos Liv muaj ntau tus ntsuj plig uas yog los ntawm cov thawj coj fab ntsuj plig yav tag los. Tus ntsuj plig ntawm Dominican, Franciscan thiab Marian. Yog 3 tug nyob hauv cov ntsuj plig hauv lub Koom Txoos. Cov ntsuj plig no yog hais txog tib qho kev muaj txiaj ntsig, lub hom phiaj thiab kev sib koom ua ke ntawm lub neej uas ua los tau ntau tiam ntawm Leej Ntshiab Dominican, Leej Ntshiab Franciscan thiab Leej Ntshiab Teresa. Txhua tus ntsuj plig yog taw mus rau kev ncaj ncees thiab qhov tseem ceeb ntawm fab ntsuj plig.

Tus ntsuj plig ntawm txhua pab Txiv Plig ua kom muaj txiaj ntsim rau ib pab zuj zus txij lub hauv paus los. Nyob hauv kev ua lub neej raws qhov tseeb ntawm lub Koom Txoos Kav Tos Liv thiab kev cog lus hauv lub neej ua neeg ntseeg. Kev cev tus kheej yog kev teev Ntuj ua qhov tseem ceeb ntawm cov hauj lwm. Thiab qhia txog kev ua lub neej nyob hauv niaj hnub. Tas txhua yam no puav leej yog hais txog tus ntsuj plig uas cov neeg ntseeg tau txais.