Hnub Chiv tim 1 Lub 12 Hlis Ntuj 2024
Lub lis piam tim 1
Lub caij Tos Huab Tais Yes Xus
Lus Kas 21: 25-28, 34-36
“Nej ua ib co neeg feeb meej, nej teev Ntuj tsis tseg, nej thiaj yuav muaj zog hla dim ib puas tsav yam uas yuav tshwm sim tuaj.”
Cov kwv tij zoo nyiam sawv daws, hnub no yog thawj hnub chiv hauv lub caij Tos Huab Tais Yes Xus. Lub Koom Txoos Kas Tos Liv pib siv xyoo tshiab ntawm Kas Tos Liv kab ke teev Ntuj. Xyoo no yog xyoo C hauv Kas Tos Liv kab ke teev Ntuj. Lub caij Tos Huab Tais Yes Xus lo lus As Kiv hu tias “Advent” txhais tias “los” “tab tom los,” lo lus no thaum ub muaj lub ntsiab lus hais txog kev rov qab los zaum ob ntawm Huab Tais Yes Xus. Li ntawd, lub caij Tos Huab Tais Yes Xus yog lub caij peb tos txais Huab Tais Yes Xus rov qab los. Lub caij Tos Huab Tais Yes Xus thiaj muaj 3 lub ntsiab lus. Nqe 1 peb nco txog hnub uas Huab Tais Yes Xus yug los hauv lub nroog Bethlehem. Peb npaj peb tus kheej tos txais hnub ua hmoov tsuj xeeb Yes Xus yug los, peb hu ua hnub Christmas, nqe 2 peb tos txais Huab Tais Yes Xus yug los nruab nrab peb, tos txais Nws yug los hauv peb cov ntseeg lub siab, nqe 3 peb tos txais Huab Tais Yes Xus rov qab los zaum 2 los yog hnub kawg. Li ntawd, ntawm peb, mas lub caij Tos Huab Tais Yes Xus no, yog lub sij hawm uas peb npaj yus tus kheej kom txhij, npaj yus lub siab lub ntsws kom zoo, npaj yus tus cuj pwm thiab lub tswv yim kom zoo.
Hauv Ntawv Moo Zoo hnub no Huab Tais Yes Xus qhia peb sawv daws tias “Nej ua ib co neeg feeb meej, nej teev Ntuj tsis tseg, nej thiaj yuav muaj zog hla dim ib puas tsav yam uas yuav tshwm sim tuaj, nej thiaj yuav sawv taus ntsug ntawm Neeg Leej Tub xub ntiag.” Li ntawd, Huab Tais Yes Xus thiaj ntuas peb tias “nej ceev faj mog, kom nej lub siab txhob qaug rau txoj kev phem kev tsis zoo, rau kev luab cawv kom qaug, thiab rau lub neej tej kev txob xeeb.” kwv tij zoo nyiam sawv daws, Huab Tais Yes Xus tab tom ntuas peb kom ua lub neej nyob hauv lub sij hawm “tam sim no” kom zoo, kom peb paub yus tus kheej tias tam sim no yus tab tom ua dab tsi, yus ua neej tam sim no zoo li cas, tam sim no, yus hloov yus tus kheej kom zoo tuaj los tseem tsis tau hloov dab tsi, tseem ua phem ua tsis zoo li qub rau luag. Txhob txhawj siab txog qhov tseem tsis tau tuaj txog, los txhob ntxhov siab txog qhov uas yog “nag hmo” lawm, los yog tej yam yav dhau los uas peb ua neej tsis tshua zoo. Txhob txhawj siab txog qhov ntawd. Lub sij hawm no yog lub sij hawm peb yuav tsum ceev faj rau qhov tam sim no, ceev faj rau lub neej tam sim no, hais tias peb yuav npaj yus tus kheej zoo li cas thiaj kom txhij kom zoo tos txais Huab Tais Yes Xus yug los.
Hais txog qhov no mas, ces peb yuav npaj zoo li cas thiaj tsim nyog tos txais Huab Tais Yes Xus hauv lub caij no?
Yam tim ib thov peb nquag thov Ntuj. Huab Tais Yes Xus hais tias “nej teev Ntuj tsis tseg, nej thiaj yuav muaj zog hla dim ib puas tsav yam uas yuav tshwm sim tuaj.” Thaum yus thov Ntuj mas, yus tab tom nrog Tswv Ntuj sib tham. Thaum yus nquag teev Ntuj mas yus yuav paub tias Tswv Ntuj nyob nrog nraim yus. Hauv yus lub siab lub tswv yim yuav muaj Tswv Ntuj tib leeg xwb. Tswv Ntuj pov hwm yus, Tswv Ntuj yuav foom koob hmoov rau yus kom dim ntawm kev ntxias kev phem kev tsis zoo.
Yam tim ob thov peb nyeem ntawv Ntshiab los Tswv Ntuj Lo Lus. Txawm tias yus nyeem ib qib ib zaj luv luv xwb kuj zoo kawg li lawm. Tswv Ntuj Lo Lus txawm tias ib lo lus los ob peb lo lus xwb kuj muaj hwj huam muaj hwj chim hloov yus lub neej tshaj lawm. Zoo li Huab Tais Yes Yus hais tseg, Tswv Ntuj lo lus yuav ua kom peb muaj zog, pab peb kom yeej teeb meem, kom yeej kev txom nyem kev nyuaj siab tau.
Yam tim peb, koom thaj txi Ntuj. Cov neeg ntseeg lub siab lub tswv yim yog Huab Tais Yes Xus lub cev thiab cov ntshav hauv thaj txi Ntuj. Thaum yus tsis xyeej, yus yuav tsum nrhiav sij hawm mus teev Ntuj hauv hnub chiv. Hauv lub thaj txi Ntuj mas, yus tau ntsib Tswv Ntuj thiab cov kwv tij neeg ntseeg sawv daws thiab.
Yam tim 4 no mas, yus yuav tsum sim hloov lub neej qub uas tsis zoo los ua neej tshiab kom xis Tswv Ntuj siab yog tias taug kev hauv Tswv Ntuj txoj kev nyiam kev hlub. Yam twg uas tsis tshua zoo, thov kom peb tso pov tseg, ces pib lub neej tshiab ua kom ncaj kom ncees. Siv Tswv Ntuj lo lus coj peb lub neej. Yog kev meem lub siab lub ntsws tsis ncaj kom xwm yeem kom zoo! Kev ua lub neej uas nkhaus mus nkhaus los yuav tsum taug kom ncaj. Lub siab lub ntsws uas tsis huv tsis ncaj yuav tsum ua kom huv kom ncaj tuaj. Kev npaj yam tseem ceeb yog npaj tej kev no.
Qhov no, yuav pab peb kom npaj yus tus kheej kom txhij txais Huab Tais Yes Xus. Thiab yog peb pab yus lub neej kom txhij lawm mas, Lub Caij Tos Huab Tais Yes Xus yuav muaj qab hau muaj txiaj ntsim rau peb txoj kev ntseeg. Peb txoj kev ntseeg thiaj hlob tuaj zuj zus.
Thov nej sawv daws npaj siab tos tus cawm Seej uas yuav tuaj mog!
