Zaj nyeem hnub tim 10 lub 5 hlis 2026
Hnub Chiv, Lis Piam 6 caij Hla
Cov lus nyob hauv Zam Ntawv Moo Zoo (Z 14: 15-21)
Kwv tij zoo nyiam sawv daws, hnub no lub Moo Zoo qhia ncaj kha rau peb tias “ yog peb nyiam Huab Tais Yes Xus, yog peb ntseeg txog Huab Tais Yes Xus, mas peb yuav coj rawv Nws cov lus qhia.” Huab Tais Yes Xus qhia kom peb ua dab tsi? Yog mas, nws qhia peb kom muaj kev nyiam kev hlub, kom peb ua neej nyob hauv txoj kev nyiam kev hlub peb cov kwv tij neeg tsa tsis hais peb cov kwv tij txheeb ze los cov nyob ib puag ncig peb. Peb yuav tsum pom kev zoo uas peb ua rau tib neeg dua lwm yam. Peb yuav tsum pom tib neeg muaj nqes muaj meej mom tshaj dua lwm yam los tshaj dua khoom nyob ntiaj teb no uas tsis muaj nqe.
Txawm tias peb tsis pom Huab Tais Yes Xus lawm, nws tseem nrog peb nyob hauv nws lo lus. Nws tseem nyob hauv kev nyiam kev hlub. Leej Ntuj Plig Ntshiab yuav coj peb kom taug hauv qhov tseeb. Tej zaus, thaum peb ua zoo rau luag los peb nyiam luag, lub qab ntuj neeg tsis txais thiab tsis pom zoo hauv txoj kev nyiam luag tej, peb kuj yuav tsum yeej ua zoo ntxiv mus kom lawv pom tias peb yog Huab Tais Yes Xus cov thwj tim, peb ua tim khawv txog qhov tseeb.
Vaj Qhia Leo 14 ua tus piv txwv zoo rau peb pom. Nws tsis ntshai cov muaj hwj chim tshaj plaws zoo li Trump. Nws tshaj lo lus tseeb txog kev thaj yeeb, kev hlub cov pluag cov txom nyem, kev khuv leej rau cov raug mob tsov rog. Nws pov hwm lawv. Nws sawv nyob rau hauv pem ntej ntawm cov thawj coj muaj hwj chim thiab hais rau lawv tias qhov lawv ua yog qhov phem.
Kwj tij sawv daws, yog peb nyiam Huab Tais Yes Xus, kuj thov peb ua raws li nws cov lus qhia. Nws qhia kom peb sib nyiam sib hlub thiab hlub cov nyob ib puag ncig peb, kuj thov kom peb ua li nws qhia mog.
Nyob zoo sawv daws.
