Hnub Chiv Tim 13 Lub 4 Hlis Ntuj 2025
Lub Caij Plaub Caug 6 Hnub Chiv Nqaum Nplooj
Lus kas 19:28-40
“Tus Vaj uas Huab Tais xa tuaj nto koob meej. Nyob saum ntuj muaj kev thaj yeeb. Nyob saum cov txheej ntuj siab, yog lub koob meej.”
Nyob zoo…
Hnub no yogh nub Chiv Nqaum Nplooj. Pib hnub no, peb tab tom taug kev hauv lub lis piam Ntshiab lawm.
Hnub Chiv nqaum nplooj yog lub sij hawm uas peb nco txog Yes Xus yog peb tus Huab Tais, Yes Xus yog peb tus Vaj. Tiam sim, nws tsis yog tus vaj zoo li cov vaj nyob ntiaj teb no. Cov vaj ntawm ntiaj teb no coj kev yeej ntawm kev ua tsov ua rog. Tiam sim tus Vaj Yes Xus coj kev yeej ntawm kev txhaum thiab kev tuag. Huab Tais Yes Xus ua vaj cawm lawv kom dim ntawm kev txhaum thiab kev tuag, kom lawv tau txais kev cawm. Nws tsis tuaj cawm lawv kom dim ntawm cov Los Mas txhais tes xwb. Huab Tais Yes Xus yuav ua qhov loj dua ntawd. Nws yuav taug kev hauv txoj kev txom nyem, nws yuav tuag, ces nws yuav yeej kev tuag, nws yuav sawv rov los. Hnub no, peb nqa nqaum nplooj tuaj kom Txiv Plig foom hmoov zoo yog lub cim qhia kom peb paub tias Huab Tais Yes Xus tau cawm peb kom dim ntawm kev txhaum, kev phem lawm. Muaj ib hnub, yog peb poob rau hauv kev ntxias, thov kom peb tso siab rau Tswv Ntuj, kom Tswv Ntuj Lo Lus kaj peb lub siab, peb thiaj tsis yuam kev. Peb yuav tsis ntshai kev tuag ntxiv mus lawm, vim peb vam txog Huab Tais Yes Xus, peb tus Vaj. Peb nqa nqaum nplooj los txais nws, thiab npaj peb tus kheej kom txhij tos txais nws sawv rov los.
Cov kwv tij, peb paub zoo lawm tias Huab Tais Yes Xus yog tus vaj zoo li cas? Txhob xav yuam kev zoo li cov thwj tim thiab cov His Xas Lais uas lawv xav tau hwj chim nyob ntiaj teb no, uas lawv xav yuam kev tias Huab Tais Yes Xus yuav pub nyiaj txiag rau lawv, uas Huab Tais Yes Xus yuav pub suab npe rau lawv, los Huab Tais Yes Xus yuav coj cov His Xas Lais kom muaj hwj chim dua lwm cov haiv neeg. Huab Tais Yes Xus tsis yog tus vaj zoo li ntawd. Yog peb xav tias peb ntseeg Ntuj, mas peb xav kom Tswv Ntuj pub nyiaj txiag rau yus, yus xav tias Tswv Ntuj yuav foom hmoov zoo kom yus tsis raug kev txom nyem dab tsi, Tswv Ntuj yuav ua rau yus nplua nuj dua luag tej, yog peb xav li ntawd, peb kuj xav zoo li cov thwj tim thiab cov His Xas Lais hauv hnub no thiab. Yus tseem ntsib kev tu siab, teeb meem los kev txom nyem hauv yus lub neej, tiam sis yus tseem muaj Tswv Ntuj, nws yuav txhawb peb lub zog kom yeej tau. Huab Tais Yes Xus ua piv txwv rau peb. Nws mus pem Yes Lus Xas Les, nws paub tias thaum nws mus qhov chaw ntawd, lawv yuav muab nws tua, nws yuav raug kev txom nyem. Tiam sim nws tsis ntshai, txawm tias nws ntshai, nws kuj tsis rov qab los, nws yuav mus kom dhau kev txom nyem no, nws yuav yeej kom tau txoj kev txom nyem no. vim nws tso siab rau Tswv Ntuj, Tswv Ntuj pub lub zog rau nws.
Kwv tij zoo nyiam sawv daws, lub lis piam no, yog lub lis piam ntshiab, thov kom peb muab siab koom thaj txi Ntuj, thov kom peb muab siab nrog Huab Tais Yes Xus taug kev nyob hauv nws txoj kev txom nyem kom mus txog hnub uas nws yuav sawv rov qab los muaj txoj sia tshiab.
