Zaj nyeem hnub tim 18 lub 1 hlis 2026 (Daily reflection) Zam 1:29-34
Kwv tij zoo nyiam sawv daws, hauv lub Moo Zoo hnub no, Zam cov lus uas nws hais rau Huab Tais Yes Xus yog yam yooj yim tiam sis tob kawg nkaus li. Nws hais tias “Nej ntsia Tswv Ntuj tus Yaj, tus daws qab ntuj neeg cov txhaum.” Zam tsis hais txog nws tus kheej, nws tsis pom tias nws yog tus tseem ceeb, tiam sis nws hais kom meej tiag tiag tias tus tseem ceeb tshaj plaws yog Huab Tais Yes Xus. Qhov no yog qhov tseem ceeb ntawm txoj kev ua neeg ntseeg. Cov neeg ntseeg yuav tsum txawj ua neeg me, txhob tsis ua neeg loj. Zam Ntxuav Plig ua tim khawv txog Huab Tais Yes Xus tias Huab Tais Yes Xus yog Tswv Ntuj tus Xaiv. Zam ua tim khawv txog lub sij hawm kawg lawm. Tam sim no mus, nws cov thwj tim, cov pej xeem yuav tsum mloog Huab Tais Yes Xus cov lus; lawv yuav tsum ua raws li Huab Tais Yes Xus tus piv txwv, tsis yog ua raws li Zam lawm.
Kwv tij zoo nyiam sawv daws, Zam Ntxuav Plig yog tus piv txwv zoo rau peb sawv daws thiab. Peb txoj hauj lwm tseem ceeb yog ua tim khawv txog Huab Tais Yes Xus. Peb yuav tsum ua tim khawv txog Huab Tais Yes Xus hauv peb lub neej. Tsis yog ntawm kev hais lus xwb, tab sis yog tuaj ntawm peb lub neej tuaj. Huab Tais Yes Xus mus tshaj Ntuj Lus hais txog Tswv Ntuj kev nyiam kev hlub, thiab nws kuj nyiam thiab hlub cov neeg txom nyem cov neeg pluag, cov neeg tsis muaj leej twg rau siab. Ntawm peb mas, yog peb xav ua tim khawv txog Huab Tais Yes Xus, peb kuj yuav tsum ua raws li nws ua thiab, yog tias nyiam thiab hlub luag tej, sib pab sib txhawb nqa luag tej. Ua li no, mas Tswv NTuj txoj kev nyiam kev hlub thiaj tshwm sim tau hauv peb lub neej tiag tiag. Qhov no yog kev ua neej ua tim khawv txog Huab Tais Yes Xus zoo li Zam Ntxuav Plig ua hnub no. Nyob zoo sawv daws.
