Hnub Chiv tim 19 Lub 1 Hlis Ntuj 2025
Lub lis piam 2 hauv lub Caij Nyob Nruab Xyoo
Zam 2:1-12
“Yes Xus kom nej ua yam twg, mws nej ua huv tib si mog.”
Cov kwv tij zoo nyiam, hauv Ntawv Moo Zoo peb mloog hnub no, Zam piav txog Yes Xus, Mab Liab thiab Yes Xus cov thwj tim mus noj tshoob hauv zos Kas Nas. Tsuas yog Zam ib leeg xwb qhia peb kom paub txog rooj tshoob hauv zos Kas Nas. Ntawm no, Huab Tais Yes Xus ua thawj hwj huam yees ntxwv los Yes Xus ua thawj lub cim; nws ua kom dej txia ua cawv. Nws ua nws lub hwj chim tawm los rau pom, ces nws cov thwj tim ntseeg txog nws.
Hauv lub Moo Zoo Zam piav tias hauv rooj tshoob tsis muaj cawv ntxiv lawm, niam Mab Liab thiaj hais rau Yes Xus kom pab, tiam sis, Yes Xus teb rau nws niam tias “niad, tsis yog wb hauj lwm. Kuv lub sij hawm tseem los tsis tau txog.” Peb pom tias Yes Xus tsis xav ua vim nws paub tias “nws lub sij hawm tseem los tsis tau txog.” Cov kwv tij, nej saib, niam Mab Liab hais dab tsi ntxiv; nws hais tias “Yes Xus kom nej ua yam twg, mws nej ua huv tib si mog.” Niam Mab Liab hais li no, Yes Xus ua dab tsi tsis tau ntxiv, nws yuav tsum pab lawv kom muaj cawv. Niam Mab Liab thov kom Yes Xus pab lawv, txawm tias nws paub tias Yes Xus lub sij hawm los tsis tau txog kuj vim tias cawv yog ib yam ua tseem ceeb tshaj plaws hauv rooj tshoob ntawm cov His Xas Lais kab lis kev cai. Cawv muaj lub ntsiab lus txog “kev zoo siab,” “kev lom zem,” “kev noj qab nyob zoo,” “kev tawg paj txi txiv,” thiab “kev nyiam kev hlub.” Cawv ua kom cov qhua los cov tuaj koom noj tshoob muaj kev lom zem, sib faib sib tham, muaj kev lom zem xyiv fab. Yog tsis muaj cawv lawm, lub rooj tshoob yuav yog zoo li cas. Niam Mab Liab paub zoo txog qhov no, nws thiaj yuam kom nws tus tub ua thawj lub cim pab lawv kom muaj cawv pub cov qhua hauv lub rooj tshoob. Ces, Huab Tais Yes Xus ua raws li nws niam taij thov nws.
Cov kwv tij zoo nyiam, Vaj Qhia Francis hais tias muaj 3 yam tseem ceeb ntawm niam Mab Liab uas peb tsim nyog twm txog. Yam tim 1 yog Mab Liab kev ua niam. Niam Mab Liab muab siab rau nkauj muam nraug nus. Thaum lawv tsis muaj cawv pub cov qhua lawm, niam Mab Liab pab lawv. Cawv yog kev zoo siab, kev lom zem, kev nyiam kev hlub, tej zaus, hauv ntau yim neeg tsev neeg tsis muaj cawv lawm los tsis muaj kev zoo siab, kev nyiam kev hlub, kev noj qab nyob zoo lawm vim tias kev kho siab, poob hauj lwm, kev mob kev nkeeg, thiab kev txom nyem ntau yam ua kom tsis muaj cawv pub txoj sia ntxiv lawm. Niam Mab Liab pom thiab mob siab thiab saib xyuas cov tsis muaj “cawv” hauv lub neej lawm.
Yam tim 2 Niam Mab Liab tso siab rau Tswv Ntuj thiab ib txwm thov Ntuj. Zoo li Niam Mab Liab taij thov Huab Tais Yes Xus kom pab lawv. Hauv peb yim neeg tsev neeg, peb yuav tsum ib txwm thov Ntuj, qhia peb cov me nyuam kom paub Tswv Ntuj, qhia lawv kom txawj thov Tswv Ntuj thiab tso siab rau Tswv Ntuj, yog peb cov ua niam ua txiv tsis qhia lawv, kuj tsis muaj leej twg qhia tau lawv thiab.
Yam tim 3 niam Mab Liab txaus siab ua raws li Huab Tais Yes Xus hais, los yog Niam Mab Liab txaus siab mloog Huab Tais Yes Xus Lo Lus. “Yes Xus kom nej ua yam twg, mas nej ua huv tib si mog.” Cov no yog cov lus niam Mab Liab hais rau peb sawv daws thiab. . “Yes Xus kom nej ua yam twg, mas nej ua huv tib si mog.” Kwv tij sawv daws, peb yuav tsum muab siab rau Yes Xus Lo Lus hais rau peb hauv lub Moo Zoo, hauv Ntawv Ntshiab. Peb yuav tsum ua raws li Huab Tais Yes Xus hais rau peb. Nws hais rau peb kom muaj kev sib nyiam sib hlub, kuj thov kom peb ua raws li nws hais mog
