Hais txog Mab Liab thiab Mas Tas.
Zaj hais txog Mab Liab thiab Mas Tas uas Lus Kas sau tseg, mas kheev kheev muab txhais dav kawg tias ; yog ib zag ntxim siab uas qhia txog qhov tseem ceeb hauv lub neej fab ntsuj plig thiab kev sib raug zoo nrog Yes Xus ntau dua txhua yam nyob ntiaj teb. Raws li ntawv sau tseg, Mab Liab zaum nyob ntawm Huab Tais ko taw thiab nws mloog Huab Tais cov lus. Hos Mas Tas rau siab ntso lis ntau yam dej num. Kev txhais muaj qee yam ua kom pom txog kev kiam meej tseeb. Tej zaum kuj pom zoo txog Mas Tas txoj kev lis dej num, los hais tias nkawd 2 yam hauj lwm yog qhov tsim nyog lawm. Txawm li cas kuj xij, kev txhais li no qhia kom pom txog cov neeg ntseeg fab ntsuj plig los ntawm cov Txiv Plig ntau dua hauv Ntawv Ntshiab.
Thawj lo lus nthuav hais txog cov lus no ntawm Origen, nws txhais tias Mas Tas yog lub Cim ntawm lub neej kev muab siab rau thiab Mab Liab yog tus mloog Huab Tais lus. Tom qab no Nqes Nkos Lis qhuas tias Mab Liab yog tus piv txwv zoo ntawm kev ua lub neej neeg ntseeg. Nyob hauv lub ntsiab lus hauv Ntawv Cog Lus Tshiab, qhov uas cov xib hwb zaum ntawm tus tswv ko taw, yog qhov ua tawm meej tseeb txog kev ua thwj tim. Hauv tus tiam lis cov hauj lwm, Paj Lug tau siv lo lus no los piav txog kev ua Nkas Mas Lias thwj tim. Lus Kas muab siab rau txog Paj Lug cov lus piav hais txog Mab Liab, nws yog qhia tias Mab Liab yog thwj tim.
Kev nco txog zaj no ua kom muaj kev hloov, thiab pab kom txawj zam kev txhais tej lo lus uas ua teeb meem. Xws li xav tias nov yog kev sib cav sib ceg hauv yim neeg, ua kom Yes Xus txiav txim rau nws ob tug phooj ywg poj niam. Tsis tas li ntawd, qhov nws txuag pov hwm Mab Liab, ua kom pom tias Yes Xus saib kev tos txais thiab kev ua hauj lwm qis. Yog qhov muaj nqis hauv Yes Xus kev txhawb nqa tseeb tiag. Tshwj xeeb tshaj yog nyob hauv zaj ntawv Moo Zoo no uas hais tias :
“Kuv nyob nruab nrab hauv nej, hauv kev ua tub txib.”
Kev muab siab rau cov ntsiab lus thiab xeem lus pab kom kev nyeem sib txuas zoo tuaj. Zaj piav no yog pib nyob hauv qhov Lus Kas rov hais dua. Ntawd yog Yes Xus thiab cov raws nws tab tom mus kev. Zaj no thiaj teeb tseg luv luv tsuas tshuav ob tug neeg ua yeeb yam xwb, nws yog Mas Tas thiab Yes Xus. Hauv cov lus uas nkawd sib tham, Mas Tas yog tus tos txais Yes Xus. Qhov Mas Tas tos txais Yes Xus ua rau nws haum rau cov neeg nyiam Yes Xus, ces nkawd lub neej tau pauv ntxeev.
Tom qab no Paj Lug tau hais txog qhov piav tsis tau ntawm Has Nplas Has thiab Xas Las raug nthuav tawm txhij txhua. Yam piav tsis tau uas raug kaw tseg los ntau tiam neeg. Tab sis tam sim no raug nthuav tawm rau Tswv Ntuj haiv neeg. Mab Liab thiab Mas Tas kuj poob nyob hauv txoj kev piav tsis tau no. Mas Tas yog thwj tim, nws tos txais Yes Xus yog zeem tseeb txog qhov no. Qhov no ua kom zaj no hloov mus. Ob tug poj niam nkawd muab nkawd tus kheej cev rau Yes Xus. Kev ua tub txib ntawm Mas Tas, tsis raug teeb tseg tias ua tub txib hauv tsev xwb. Mas Tas lub siab ntxhov hnyo, yog hais txog ntau yam uas nws ua raug kav. Tsis yog meem txom los ntawm qhov tsis muaj neeg pab. Muaj tseeb tiag uas Mas Tas cov lus qhia txog kev txhawj xeeb tob dua ntawd. Xws li qhov xav tias nws raug tso tseg thiab tu siab, los yog nws ntxhov siab txog Mab Liab. Yes Xus cov lus teb kheev kheev xav tias yog kiam nws tias : “Mas Tas, koj txhawj thiab ua siab fab lis ntau yam.” Qhov hu nws lub npe ntau zaus, kuj yog qhia txog kev hlub mos nyoos. Yes Xus zeem tseeb txog yam Mab Liab tab tom ua, nws yog qhov tsim nyog. Mab Liab tau xaiv qhov zoo tshaj, yuav tsis txhob muab tshem ntawm nws. Sawv daws kheev kheev xav tias Mab Liab tau xaiv yam zoo tshaj, Mab Liab xaiv qhov zoo, tsis yog tias saib tsis taus Mas Tas. Zaj no yog tshwm sim tom qab zaj hais txog tus Xas Mas Lias siab zoo. Yog qhov zeem tseeb txog kev muab siab rau thiab kev khuv leej yog qhov tseem ceeb nyob hauv ntawv Moo Zoo.
Kev ua thwj tim muaj ntau txoj kev. Qhov tseem ceeb yog yuav tsum nkag mus txog tus neeg uas peb xav tsis txog, xws li tus Xas Mas Lias thiab ob tug poj niam nyob hauv Lus Kas ntawv Moo Zoo uas rov hais txog kev sib koom ntawm cov raug cais. Xws li cov neeg pluag txom nyem, cov raug caij tsuj saib tsis taus thiab cov raug ntiab.
Yes Xus tshaib nqhis txhua tus neeg thiab yog lub Moo Zoo rau txhua tus. Cov poj niam uas yog neeg pluag lub caij ntawd hais nyob hauv Lus Kas ntawv Moo Zoo ntau dua 3 phau ntawv Moo Zoo muab los sib sau ua ke. Xws li Mas Tais, Mas Kos thiab Zam ntawv Moo Zoo. Raws txoj cai ntawm cov Yus Das, cov poj niam tsis tas yuav thov Ntuj los kawm Ntawv Ntshiab. Lawv tsuas yog nyob hauv cov tsev Txoos los tsev teev Ntuj xwb. Xav tias thawj pab neeg ntseeg yog ua raws li tus qauv no. Tab sis zaj no ua kom Mab Liab thiab Mas Tas tuaj yeem txiav txim siab. Qhov uas Yes Xus zeem tseeb txog Mab Liab txoj kev xaiv, tej zaum nws yog tib txog kev ua thwj tim uas muaj qhov pheej hmoo ntau dua. Yog lub Cim hauv kev pauv ntxeev cov Yus Das txoj cai. Nws tuaj yeem xaiv tau thiab kev xaiv ntawd yuav tau txais koob meej.
Lub ntsiab tseem ceeb hauv zaj no, yog kev phooj ywg ntawm Yes Xus thiab ob tug poj niam no. Vim nkawd tuaj yeem nrog Yes Xus sib tham tau ywj siab thiab sib faib cov hauj lwm. Nyob ntawm no, peb yuav pom yim neeg tshiab uas Yes Xus hais txog. Nws nyob siab dua kev sib raug zoo koom hlab ntsha, thiab nrog tus uas tau hnov Tswv Ntuj cov lus thiab ua raws. Nkawd ob viv ncaus yog thwj tim thiab nkawd kuj sib faib, raws li zaj nyeem ob tau hais tseg tias :
“Kev nplua nuj ntawm kev nto koob meej no, yog Yes Xus nyob hauv nej.”
Nyob hauv ntawv Kos Los Xais, Paj Lug hais tias nyob hauv Yes Xus, “tsis muaj Hes Laas los Yus Das, tsis muaj tus qhev los tus tub txib ntxiv mus. Vim Yes Xus Pleev yog txhua yam thiab nws nyob hauv txhua yam.”
Kwv tij Hmoob sawv daws ! Hnub no peb tham txog lub Koom Txoos xa tawm mus, los xaus li no xwb. Peb yuav nco ntsoov zaj hais txog Mab Liab thiab Mas Tas. Mab Liab xaiv qhov zoo tshaj, nws zaum nyob ntawm Yes Xus ko taw thiab mloog Yes Xus. Hos Mas Tas txhawj thiab nws siab fab lis ntau yam hauj lwm. Peb txhob saib lwm yam tseem ceeb dua kev mloog Yes Xus. Peb yuav xaiv yam zoo tshaj xws li Mab Liab xaiv, vim peb yog neeg ntseeg txog Tswv Ntuj.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !
Lwm zaus peb mam sib ntsib dua, nej sawv daws nyob zoo
