ZAJ NYEEM HNUB TIM 21 LUB 6 HLI 2026
HNUB CHIV, LIS PIAM 12 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 10: 26-33)
Kwv tij Hmoob sawv daws, kev ntseeg txog Yes Xus mas ntau zaus muaj kev ntxias ntau yam uas ua rau peb ua xyem xyav thiab ua rau peb tsis ntseeg ruaj khov. Tom qab Huab Tais Yes Xus nce mus saum ntuj lawm, cov ntseeg thaum hauv paus yeej raug luag hiam thiab rhuam hnyav kawg. Mas Tais thiaj sau ntawv Moo Zoo rau cov ntseeg Yus Das uas lawv raug luag hiam thiab rhuam vim lawv ntseeg txog Huab Tais Yes Xus tus sawv rov los. Nws sau tias “Nej txhob ntshai luag hem!.Nej txhob ntshai cov neeg tua nej lub cev, tab sis, lawv tua tsis tau nej tus plig. Nej yuav ntshai tus muaj peev xwm rhuav nej lub cev thiab tus plig hauv hav hluav taws.” Qhov no txhais tau tias yog peb txiav txim siab los txais lub Cim Ntxuav thiab ntseeg txog Yes Xus lawm, peb yuav tsum ntseeg kom ruaj, tsis txhob ua xyem xyav ntawm txoj kev ntseeg. Txhob ntseeg ua si xwb. Thaum yus ntseeg txog Yes Xus lawm, ces yus txhob muab lub siab tag nrho rau nyiaj txiag los tej khoom nyob ntiaj teb no xwb. Yus yuav tsum txawj tso siab los muab siab tag nrho rau Tswv Ntuj kom Tswv Ntuj saib xyuas yus txoj sia thiab tsuj plig.
Huab Tais Yes Xus paub zoo kawg txog txoj kev txom nyem no. Ua ntej nws nce mus saum ntuj, nws thiaj qhia kom nws cov thwj tim paub tias lawv yuav ntsib teeb meem los xwv txheej hnyav npaum cas vim Yes Xus lub npe.
Kwv tij zoo nyiam sawv daws, kuv ntseeg tias ntawm peb lub neeg, peb kuj raug kev ntxias ntau yam los ua rau peb ntshai, ua rau peb tsis tshua ntseeg ruaj khov los ua rau peb ua xyem xyav xwb. Thov kom peb nquag teev ntuj kom Tswv Ntuj kom pab peb kom ntseeg ruaj ruaj, thiab nquag tuaj koom thaj txi Ntuj txhua hnub chiv kom Tswv Ntuj txhab lub zog rau peb. Txawm tias peb tseem tsis tau ntseeg ruaj khov tiag tiag, kuj tsis ua cas. Tuaj koom thaj txi Ntuj, tuaj thov Ntuj, Tswv Ntuj yuav pab peb kom ntseeg ruaj zuj zus.
