Hnub Chiv tim 23 Lub 2 Hlis Ntuj 2025
Lub lis piam 7 hauv lub Caij Nyob Nruab Xyoo
Lus Kas 6:27-38
“Nej yuav hlub luag tej ib yam li nej Txiv hlub neeg.”
Kwv tij zoo nyiam sawv daws, lub Moo Zoo peb hnov hnub no yog zaj txuas ntu zaj lub lis piam dhau los uas hais txog txoj hmoov zoo. Cov pluag, cov uas nyem no tshaib, cov uas nyem no quaj, cov uas raug neeg ntxub lawv, cov uas rau luag hiam thiab cem lawv, lawv txoj hmoov zoo vim Ntuj lub Ceeb Tsheej yog lawv tug. Mas hnub no Huab Tais Yes Xus qhia ntxiv tias cov yuav tau txais Ntuj lub Ceeb Tsheej yuav tsum ua li cas? Huab Tais Yes Xus piav cov lus qhia tseem ceeb rau nws cov thwj tim mloog thiab ua raws. Nws cov lus qhia tsis yooj yim kiag li. Nws cov lus qhia hais tias “Nej yuav nyiam nej cov yeeb ncuab, nej yuav ua zoo rau cov neeg ntxub nej” ua rau Yes Xus cov thwj tim nyuaj siab kawg, vim tias thaum ntawd cov lus qhia no yog lo lus qhia tshiab, tsis muaj leej twg, los tsis muaj xib hwb twg qhia li ntawd. Kuv xav tias niaj hnub no cov lus qhia no tseem tshiab thiab nyuaj rau peb kom ua raws thiab.
Cov kwv tij, txawm tias Huab Tais Yes Xus cov lus qhia tsis yooj yim uas peb yuav ua raws, tab sis mas, Yes Xus cov lus qhia kuj tseeb tiag tiag. Huab Tais Yes Xus hais tias “Yog nej nyiam cov neeg nyiam nej, mas lawv yuav nco nej txiaj ntsim li cas? Tab yog cov neeg txhaum, lawv kuj nyiam cov uas nyiam lawv. Yog nej ua zoo rau cov neeg ua zoo rau nej, mas lawv yuav nco nej txiaj ntsim li cas? Cov neeg txhaum kuj ua tau ib yam li ntawd thiab. Nej sim xav tswv yim twm txog saib puas yog zoo li Huab Tais Yes Xus hais?
Txawm li cas kuj xij, lub ntsiab lus hauv lub Moo Zoo hnub no uas kuv xav hais kom tseeb kom meej yog cov lus uas Huab Tais Yes Xus hais tias, “Nej yuav hlub luag tej ib yam li nej Txiv hlub neeg.” Thiab nws hais ntxiv tias, “nej tsis txhob txiav txim , Ntuj thiaj yuav tsis txiav txim rau nej.” Cov lus no yog cov lus qhia tseem ceeb tshaj plaws uas peb yuav tsum ua raws kom tau. Txhob txiav txim peb cov kwv tij neeg tsa, txhob txiav txim luag tej, txhob muab txim rau lawv. Txawm tias qhov peb hnov yog qhov tseeb los qhov cuav, peb kuj txhob txiav txim rau luag. Cia kom Tswv Ntuj txiav txim lawv, peb tsis yog Tswv Ntuj, li ntawd, mas peb txiav tsis tau txim luag. Yog peb tseem ua txhaum, peb tsis txhob txiav txim peb cov kwv cov tij. Yog peb ua li no, yog peb tsis txiav txim peb cov kwv tij, kuj txhais tau tias yus hlub lawv, yus khuv leej lawv raws li Huab Tais Yes Xus qhia peb kom “hlub luag tej ib yam li peb Txiv (nyob saum ntuj) hlub neeg.” Ua li no, mas Yes Xus cov lus qhia kuj tsis nyuaj dhau.
Kwv tij sawv daws, peb ua neej nyob mas peb hu peb tus kheej Kas Tos Liv los neeg ntseeg kuj txhais tau tias peb yog Huab Tais Yes Xus cov thwj tim thiab Yes Xus cov thwj tim yuav tsum raws nws qab, ua raws li cov lus qhia, peb thiaj yog tseeb thwj tim. Li ntawd, thov kom peb ua raws li Yes Xus ua, hlub luag tej vim tias Leej Txiv Tswv Ntuj hlub peb.
