Zaj nyeem hnub tim 24 lub 5 hlis 2026
Hnub Leej Ntuj Plig nqes los
Cov lus nyob hauv Zam Ntawv Moo Zoo (Z 20: 19-23)
Kwv tij Hmoob sawv daws, hnub no peb hwm hnub Leej Ntuj Plig Nqes Los. Peb paub tias thaum Huab Tais Yes Xus nqes mus saum ntuj lawm, nws xa Leej Ntuj Plig Ntshiab los nrog cov thwj tim thiab cov ntseeg nyob. Peb tsis pom Leej Ntuj Plig Ntshiab ntawm peb qhov muag. Tiam sis, peb paub tias Leej Ntuj Plig nyob tiag tiag vim peb ib leej tau txais lub txiaj ntsim muaj peev xwm los rab peev xwm ua tau ntau yam.
Zoo li hnub no, hauv zaj nyeem ob, Leej Ntshiab Paj Lug hais tias: Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb. Muaj ntau txoj kab xwm, tab sis yog tuaj ntawm tib tug Huab Tais tuaj. Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg.
Peb txhua leej txhua tus tau txais Tswv Ntuj lub txiaj ntsim lawm; Leej Ntuj Plig tau pub lub txiaj ntsim rau peb lawm. Ntawm peb mas peb yuav tsum siv lub txiaj ntsim ntawd kom muaj qab hau tshwm sim tuaj tiag tiag. Siv lub txiaj tsim ntawd ua Tswv Ntuj txoj hauj lwm tshaj Ntuj Lus, siv lub txiaj ntsim ntawd kom tsob hwb luag tej, tsis txhob khaw cia rau yus tus kheej xwb. Yog ua li ntawd, tsis muaj qab hau dab tsi. Leej Ntuj Plig pub txiaj ntsim rau peb kom siv tsob hwb luag tej, cov kwv tij neeg tsa: yus tsob hwb lawv, lawv tsob hwb yus hauv txoj kev nyiam kev hlub. Ua li no, mas kuj yog kev tshaj Ntuj lus lawm.
Thaum lub caij cov Hauv Paus Xa Lus, thaum lawv tau txais Leej Ntuj Plig lub txiaj ntsim lawm, yam tim ib uas lawv ua yog tshaj Ntuj Lus, tshaj lub Moo Zoo rau txhua leej txhua tus kom paub Tswv Ntuj. Lawv siv lub txiaj tsim uas Leej Ntuj Plig pub rau lawv pab lawv tshaj Ntuj Lus kom tawg paj txi txiv.
Txawm tias ib leej ib leej muaj txawv lub txiaj ntsim, tab sis lawv muaj kev haum xeeb; lawv sib koom siab. Qhov no yog Leej Ntuj Plig Ntshiab lub txiaj ntsim loj tshaj plaws. Li ntawd, thov kom peb siv lub txiaj tsim uas Leej Ntuj Plig Ntshiab pub rau peb kom muaj qab hau tshaj plaws rau luag rau peb cov kwv tij neeg tsa tshwj xeeb rau cov pluag txom nyem.
Nyob zoo sawv daws.
