Zaj Nyeem Hnub Chiv tim 25 lub 5 Hlis 2025
Lub lis piam 6 caij hla
Zam 14:23-29
“Yog leej twg nyiam kuv, nws yuav coj rawv kuv lo lus, ces kuv Txiv yuav nyiam nws.”
Nyob zoo…
Nyem no, peb tab tom nyob hauv lub caij Hla lub lis piam 6. Lub sij hawm no yog lub sij hawm ua ntej Huab Tais Yes Xus yuav tso nws cov thwj tim pov tseg lawm. Huab Tais Yes Xus yuav mus lawm saum Ntuj, nws cia li qhia nws cov thwj tim kom lawv ua raws li nws cov lus qhia. Yog cov thwj tim coj rawv Yes Xus lo lus, yog peb sawv daws uas yog Yes Xus cov thwj tim ua lub neej rawv Yes Xus cov lus qhia, Leej Txiv Tswv Ntuj yuav nyiam peb, thiab Leej Txiv thiab Huab Tais Yes Xus yuav los nyob ze peb, nkawd yuav ua tsev nyob hauv peb. Kwv tij sawv daws, nej puas ntseeg li ntawd? Huab Tais Yes Xus hais ntxiv tias “tus tsis khaws Yes Xus cov lus, tus ntawd tsis nyiam Yes Xus. Peb ne, peb puas nyiam Huab Tais Yes Xus? Yog peb nyiam nws, ces yuav tsum ua raws li nws lo lus mog!
Huab Tais Yes Xus lo lus qhia yog tias: Nyiam Tswv Ntuj tas siab tas ntsws, thiab nyiam luag tej zoo xws li yus nyiam yus tus kheej. Huab Tais Yes Xus lo lus qhia loj luv luv li no xwb. Tiam sis, peb yuav tsum coj mus ua kom tshwm sim tiag hauv peb lub neej, peb yuav tsum coj mus ua rawv kom kev sib nyiam sib hlub tawg paj txi txiv tiag tiag hauv peb lub neej, hauv yus vaj tse, hauv yus zej zog, hauv yus teb chaws, hauv yus lub Koom Txoos.
Tsis tas li ntawd, Huab Tais Yes Xus tseem qhia kom peb qhib siab tos txais Leej Ntuj Plig Ntshiab uas Leej Txiv yuav xa tuaj. Leej Ntuj Plig yuav tshoj peb lub siab, yuav ua kom peb nkag siab Tswv Ntuj Lo Lus. Nws yuav qhia kom peb to tau ib puas tsav yam uas Huab Tais Yes Xus tau qhia peb ntawd. Leej Ntuj Plig Ntshiab coj lub Koom Txoos Kas Tos Liv thiab cov neeg ntseeg sawv daws. Leej Ntuj Plig Ntshiab coj tus vaj qhia thiab txiv tswv qhia kom coj lub Koom Txoos taug kev hauv Tswv Ntuj txoj kev. Li ntawd, thov kom peb tso siab rau peb tus vaj qhia, peb tus tswv qhia, cov txiv plig, cov xib hwb, lawv coj peb hauv txoj kev ntseeg, kom peb tsis ntseeg yuam kev, kom peb tsis mus yuam kev. Leej Ntuj Plig Ntshiab yuav ua kom peb ua ib lub Koom Txoos, tsis yog ob peb lub koom txoos.
Kwv tij zoo nyiam sawv daws, txhob tsis nco qab Yes Xus lo lus, sib nyiam sib hlub xws li Yes Xus nyiam peb.
Nyob zoo sawv daws.
