ZAJ NYEEM HNUB TIM 26 LUB 10 HLI 2025
HNUB CHIV LIS PIAM 30 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 18: 9-14)
Kwv tij zoo nyiam sawv daws, peb yog neeg ntseeg, peb ntseeg txog Tswv Ntuj, peb yuav tsum teev Ntuj. Kuv lo lus nug yog tias thaum nej teev Ntuj, nej teev Ntuj zoo li cas? Nej puas paub nej yuav teev Ntuj zoo li cas?
Lub Moo Zoo hnub no caw peb kom siv sij hawm ib me ntsis saib ntawm yus tus kheej thiab nug yus tus kheej, yus yuav tsum teev Ntuj zoo li cas thiaj tsim nyog. Hauv zaj paj lug hnub no, peb pom tus Fas Lis Xais thiab tus sau se ua piv txwv rau peb. Tus Fas Lis Xais thaum teev Ntuj nws hais txog qhov zoo nws twb ua thiab nws hais lus saib tsis tau lwm tus. Nws hais tias “kuv pub ib feem kaum natwm tas txhia yam uas kuv khwv tau, kuv yoo mov, kuv ua ub kuv ua no. Nws tsa nws tus kheej loj dua luag lwm tus tshwj xwb yog loj dua tus sau se nyob ntawd vim nws xav tias nws yog neeg ncaj ncees, nws yog neeg zoo dua luag lwm tus. Tiam sis, tus sau se tsis ua li ntawd. Nws tu siab rau nws qhov txhaum, qhov tsis zoo uas nws tau ua rau nws tus kheej thiab rau luag. Nws txaj muag rau nws qhov txhaum, nws tsis muaj cuab kav tsa muag ntsia saum ntuj. Yam nws hais tsuas yog “Tswv Ntuj, thov koj khuv leej kuv, vim kuv yog neeg txhaum.” Nws hais li no xwb. Huab Tais Yes Xus hais tias tus sau se nqes rov mus tsev, nws ntshiab huv tuaj. Tiam sis, tus Fas Lis Xais tseem tsis tau ntshiab huv. Vim nws tseem tsis tau tu siab rau nws qhov txhaum, nws tsis lees txais nws kuj yog neeg txhaum thiab.
Kwv tij sawv daws, ntawm peb mas peb teev Ntuj zoo li cas? Ntau zaus, peb teev Ntuj zoo li tus Fas Lis Xais los peb teev Ntuj zoo li tus sau se? Peb saib ntawm yus tus kheej, yus kev txhaum los peb saib ntawm luag tej kev txhaum kev tsis zoo?
Raws li Kas Tos Liv kab lis kev cai mas, thaum hais txog kev teev Ntuj, mas muaj 4 nqe los 4 yam hauv ib zaj teev Ntuj.
Yam tim 1 peb cav txog Tswv Ntuj, peb lees txais Tswv Ntuj lub hwj chim, Tswv Ntuj yog tus siab zoo.
Yam tim 2 peb lees tias peb yog neeg txhaum, tej zaus peb ua lub neej tsis zoo, peb thov Tswv Ntuj khuv leej peb.
Yam tim 3 peb ua Tswv Ntuj tsaug rau lub txiaj ntsim, txhua yam zoo Tswv Ntuj pub rau peb. Peb ua Tswv Ntuj tsaug uas nws foom koob foom hmoov zoo rau peb lub neej.
Thiab Yam tim 4 peb thov Tswv Ntuj kom pub yam uas peb tsis tau muaj. Thiab peb thov Tswv Ntuj rau luag tej thiab.
Nej puas pom kev teev uas kuv hais no tsis yog tus Fas Lis Xaiv kev teev Ntuj, tiam sis yog zoo li tus sau se kev teev Ntuj.
Thov kom lub Moo Zoo hnub no pab peb kom txawj teev Ntuj thiab coj mus ua tiag tiag hauv peb lub neej. Thov Tswv Ntuj nrog nraim peb sawv daws txhua leej txhua tus mog!
Nyob zoo sawv daws.
