Zaj nyeem hnub tim 26 lub 4 hlis 2026
Hnub Chiv, Lis Piam 4 caij Hla
Cov lus nyob hauv Zam Ntawv Moo Zoo (Z 10: 1-10)
Kwv tij sawv daws, hauv lub Moo Zoo hnub no Huab Tais Yes Xus hais txog tus zov yaj zoo thiab tus tub sab tuaj nyiag, Huab Tais Yes Xus xav qhia peb kom mloog lus tus thawj coj tseeb thiab ceev faj tus thwj coj cuav. Tus tseem thawj coj yuav tsob hwb nws cov kwv tij phooj ywg, nws ua neeg ncaj ncees, nws mloog nws cov kwv tij neeg tsa lo lus hais. Thiab lawv kuj mloog nws lus. Zoo xws li cov yaj mloog tus zoo tswv zov yaj lub suab. Tus thawj coj cuav tsis quav ntseg luag lwm tus. Nws tsuas saib ntawm nws tus kheej xwb. Nws yog tub sab, nws tuaj nyiag thiab tuaj lwg xwb.
Huab Tais Yes Xus qhia peb tias nws ib leeg xwb yog cov yaj lub qhov rooj; nws ib leeg xwb yog tus zoo tswv zov yaj. Vim Huab Tais Yes Xus hlub peb tshaj plaws. Nws tuav peb ib leeg zuj zus lub npe, nws coj peb mus, nws coj peb kom ua neeg nyob hauv nws cov lus qhia. Thiab nws mus ua ntej, peb lawv nws qab. Nws pov hwm peb kom dim ntawm ntau yam xwv txheej.
Kwv tij sawv daws, peb yog cov yaj thiab Huab Tais Yes Xus yog tus coj peb, nws yog lub qhov rooj. Peb yuav tsum nkag ntawm lub qhov rooj no mus thiaj muaj txoj sia. Thov peb twm txog lub Moo Zoo hnub no kom zoo mog thiab saib tias peb ua neeg zoo li cas? Ntawm peb lub neej, Huab Tais Yes Xus puas yog tus coj peb los peb cia kom lwm yam coj peb lub neej? Lo peb cov neeg ntseeg puas lawv Huab Tais Yes Xus qab, kom Huab Tais Yes Xus coj peb hauv kev ua neeg?
