Hnub chiv tim 29 lub 12 hli ntuj 2024
Lus Kas 2:41-52
Lub Caij Yes Xus Yog Los (hmoov tsuj xeeb Yim Neeg Ntshiab)
“Vim li cas neb nrhiav kuv? Neb tsis paub tias kuv yuav leg kuv Txiv cov hauj lwm lod?.”
Kwv tij zoo nyiam sawv daws, hnub chiv no yog hnub peb ua hmoov tsuj xeeb Yim Neeg Ntshiab. Thaum piav txog Yim Neeg Ntshiab, peb paub tias yog Huab Tais Yes Xus yim neeg, uas muaj Yos Xes, Mab Liab thiab Yes Xus. Peb paub lawm tias Yes Xus yim neeg yog yim neeg ntshiab, Tswv Ntuj lub txiaj ntsim nyob hauv lawv, Tswv Ntuj nyob nruab nrab lawv. Txawm li cas kuj xij, lawv yog yim neeg ntshiab, tsis txhais tias lawv tsis muaj teeb meem dab tsi, tsis txhais tias hauv lawv lub neej tsuas muaj kev noj qab nyob zoo, muaj kev vam meej, muaj kev lom zem xwb. Tsis yog li ntawd tiag! Qhov tiag mas yim neeg ntshiab kuj muaj kev ntxhov siab, muaj kev kub ntxhov, muaj teeb meem ntau yam thiab. Thaum Yes Xus tseem me me xwb, vim ntshai Hes Los tua, Yos Xes thiab Mab Liab nkawd coj Yes Xus ua neeg thoj nam khiav mus Hais Nkws Tos teb. Peb paub tias kev ua neej thoj nam tsis yooj yim kiag li, muaj teeb meem ntau yam, yus yuav noj li cas, yus yuav pw li cas, yus yuav ua hauj lwm li cas, luag saib tsis tau yus li cas, kuv ntseeg tias yim neeg ntshiab no tau ntsib kev nyuaj siab thiab teeb meem li hais no lawm tiag. Zoo li peb hnov hauv lub Moo zoo hnub no, niam Mab Liab thiab Yos Xes nrhiav tsis pom Yes Xus. Nkawd nrhiav tsis tau nws, 3 hnub thiaj nrhiav tau Yes Xus nyob hauv lub Tuam Tsev Teev Ntuj. Nej sim xav, ob tug niam thiab txiv, nkawd yuav ntxhov siab hnyav npaum li cas uas nkawd nrhiav tsis tau nkawd tus tub twm zeej. Mab Liab thiab Yos Xes tsis to taub Yes Xus cov lus hais rau lawv tias “Vim li cas neb nrhiav kuv? Neb tsis paub tias kuv yuav leg kuv Txiv cov hauj lwm lod?.” Ib yam li Yes Xus tsis to taub tias Mab Liab thiab Yos Xes ntxhov siab npaum li cas? Mab Liab kuj ua tsis tau dab tsi li, nws khaws tej ntawd huv tib si cia rau nruab siab. Li ntawd mas peb yuav hais tau li cas tias yim neeg ntshiab tsis muaj teeb meem dab tsi, puas yog?
Kwv tij zoo nyiam sawv daws, qhov tseem ceeb tshaj plaws yog qhov tias yim neeg ntshiab: Yos Xes, Mab Liab thiab Yes Xus, qhia dab tsi rau peb yim neeg? Yim neeg ntshiab yog piv txwv rau peb cov ntseeg txog Tswv Ntuj txhua leej txhua tus. Txawm muaj teem meem, muaj kev nyuaj siab hauv yus yim neeg, yus yuav tsum ntseeg txog Tswv Ntuj kom ruaj, yus txhob ua xyem xyav. Yus yuav tsum vam khom rau Tswv Ntuj. Txawm tias peb tab tom nyob hauv kev kub ntxhov, kev nyuaj siab ntau yam tsis hais hnyav npaum li cas, tiam sis, peb yuav tsum muaj kev vam thiab kev tso siab. Tswv Ntuj yog kev tso siab ua kom peb tsis muaj chaw khuv xim, vim Leej Ntuj Plig Ntshiab, uas Ntuj pub rau peb, nws hliv Tswv Ntuj txoj kev nyiam rau hauv peb lub siab. (Los Mas. :5).
Kwv tij zoo nyiam sawv daws, xyoo no mas Vaj Qhia Franscis tshaj tawm tias yog lub xyoo ntshiab 2025, yog lub xyoo ntawm kev tso siab, kev tso siab ua kom peb tsis muaj chaw khuv xim. Vaj Qhia Francis caw peb sawv daws kom muaj kev tso siab rau Tswv Ntuj, zoo li Yos Xus thiab Mab Liab tso siab rau Tswv Ntuj. Nkawd tso kom Tswv Ntuj coj nkawd txoj kev mus. Thov yim neeg ntshiab: Yes Xus, Mab Liab, Yos Yes pov hwm peb yim neeg kom muaj dag muaj zog yeej kev nyuaj siab thiab teeb meem hauv lub neej, thov Tswv Ntuj lub txiaj ntsim puv nyob hauv peb mus li.
