ZAJ NYEEM HNUB TIM 3 LUB 3 HLIS 2024 HNUB CHIV LUB LIS PIAM 3 CAIJ PLAUB CAUG (ZM 2: 13-25)
“Nej rhuav lub Tsw Ntshiab no. Peb hnub tom qab, mas kuv rov txhim tau.” Nyob zoo ib tsoom niam txiv kwv tij neeg tsa nyob thoob qab ntuj… Hnub no yog hnub chiv lub lis piam 3 hauv caij plaub caug lawm, peb tab tom taug kev hauv lub caij uas peb yuav tsum ntsia ntawm yus tus kheej, soj ntsuam yus tus kheej yus ua neej hauv txoj kev ntseeg zoo li cas lawm. Hnub no, Huab Tais Yes Xus mus pem Yes Lus Xas Les. Nws ntiab cov tub luam hauv lub Tuam Tsev Teev Ntuj. Lub Tuam Tsev Teev Ntuj no mas yog lub tuam tsev teev Ntuj tseem ceeb tshaj plaws ntawm cov His Xas Lais vim rau qhov hais tias Tswv Ntuj Cog Lus nyob ntawd. Thiab lub Tuam Tsev teev Ntuj no yog qhov chaw uas cov His Xas Lais cev khoom rau Tswv Ntuj. Tswv Ntuj so ntawm no. Thaum Yes Xus pom cov tub luam muag nyuj muag tshis thiab lwm yam mas Yes Xus npau taws heev li. Nws ntiab lawv tawm mus. Kwv tij sawv daws, lub Tsev teev Ntuj yog ib qho chaws tseem ceeb, yog ib qho chaws ntshiab, peb yuav tsum hwm lub tsev teev Ntuj. Tswv Ntuj lub cev nyob ntawd. Lub cim ntshiab uas yog Yes Xus lub cev nyob ntawd.
Thaum peb nkag mus hauv lub tsev teev Ntuj, peb yuav paub tias qhov chaws no ntshiab, peb yuav tsum ntsiag to, txhob hais lus nrov nrov, peb yuav tsum hwm Huab Tais Yes Xus hauv lub Cim Ntshiab thiab. Yes Xus hais ntxiv txog lub Tuam Tsev Teev Ntuj uas nws yuav rov txhim tau. Qhov tiag mas, nws tsis hais txog lwm lub tuav tsev teev Ntuj uas tib neeg txhim, tab sis mas, nws hais txog nws tus kheej. Nws hais txog nws txoj kev txom nyem, kev tuag thiab kev sawv rov los. Ntxiv mus yav tom ntej, Huab Tais Yes Xus yog lub Tuam Tsev Teev Ntuj tseem ceeb tshaj plaws, tsis yog lub Tuam Tsev Teev Ntuj uas tib neeg txhim lawm. Kwv tij sawv daws, ib qho chaws ntshiab tsis yog lub tsev teev Ntuj xwb, tab sis yog ib qho chaws uas cov ntseeg sawv daws teev Ntuj ua ke, ib qho chaws uas cov neeg ntseeg nyeem Ntawv Ntshiab thiab mloog Tswv Ntuj Lo Lus ua ke, ib yam li Yes Xus hais “Thaum ob leeg los peb leeg sib sau ua ke tuav txog kuv lub npe, mas kuv nyob hauv nruab nrab lawv.”
Ib qho chaws ntawd yog ib qho nthiab tiag. Ua li ntawd mas, kwv tij sawv daws, thaum peb mus teev Ntuj rau tus mob, los rau me nyuam yug tshiab, los rau tus tis npe tshiab, rau tus tis npe laus, los lwm cov ntseeg, peb yuav tsum mus ua ke. Txhob tso kom txiv plig los xwb hwb nkawd mus nkawd xwb. Peb yuav tsum npaj siab thiab rau siab mus ua ke. Peb mus teev Ntuj rau peb cov kwv tij, peb mus txhawb lub zog, txhawb lub siab rau peb cov kwv tij. Peb cov kwv tij thiaj paub tias qhov tiag mas Huab Tais Yes Xus nyob nruab nrab lawv lawm tiag.
