Hnub chiv tim 8 lub 12 hli ntuj 2024
Lus Kas 3:1-6
Lub lis piam 2 hauv Lub Caij Tos Huab Tais
“Nej npaj kev rau Huab Tais, nej ua kom nws txoj lw ncaj tuaj.”
Nyob zoo…
Cov kwv tij zoo nyiam sawv daws, ntawm no mas yog hnub chiv lub lis piam tim 2 hauv lub caij Tos Huab Tais. Lub ntsiab lus ntawm lub lis piam no yog kev thaj yeeb. Huab Tais Yes Xus yog kev thaj yeeb loj tshaj plaws ntawm tib neeg nyob thoob ntiaj teb no. Huab Tais Yes Xus yog kev thaj yeeb ntawm peb cov ntseeg sawv daws. Tos Yes Xus yog kev thaj yeeb tiag, mas peb thiaj li yuav tsum npaj yus lub neej lub siab lub ntsws kom txhij kom tsim nyog tos txais nws nyob hauv peb.
Hauv Ntawv Moo Zoo hnub no mas, peb pom lawm tias Zam Ntxuav Plig yog tus tuaj ua ntej tus Cawm Seej. Nws txoj hauj lwm tseem ceeb yog npaj txoj kev rau tus Cawm Seej. Zam Ntxuav Plig tawm tuaj qhia tsoom pej xeem kom nyias saib xyuas nyias lub neej, kom nyias ua nyias lub siab lub tswv yim kom zoo. Zam siv dej ua kab ke ntxuav lawv kom ntshiab huv Zam pab lawv lees txhaum kom Ntuj zam txhaum rau lawv, tshwj xeeb mas yog ntxuav lawv tsuj plig kom dawb kom huv. Tsis tas li ntawd, Lus Kas xav hais kom meej tias tus Zam Ntxuav Plig no muaj sia nyob tiag tiag, nws muaj sia nyob kwv yeej 2,000 tawm xyoo lawm. Nws yog tus ua tim khawv txog Huab Tais Yes Xus tus uas niaj teb neeg tab tom tos txais nws.
Hais li ntawd tas lawm mas, peb yuav npaj yus tus kheej npaum li cas, yuav tos txais tus cawm seej peb yuav npaj yus tus kheej zoo li cas? Yaj Saub His Xais tau hais piv txwv tias: “Nej tshav ncaws nws tej xub ke kom tiaj tus, thub av rau cov kwj ha,” zoo li tus vaj yuav tuaj xyuas peb zej zog, yog kawg peb yuav tsum kho kev, tu vaj tu tsev kom dawb kom huv, dai ntaub ntawv kom zoo nkauj, kom zoo saib chaws khib liab ua kom dawb kom huv tuaj. Peb yuav npaj txhua yam kom zoo tshaj plaws tos txais peb tus vaj. Yam twg tsis zoo, yam qias los yam tsis dawb tsis huv, peb kuj yuav tso pov tseg, puas yog? Zoo ib yam uas Zam hais txog kev npaj tos txais tus Tswv Ntuj tus Cawm Seej yog zaj uas tseem ceeb. Tab sis kev napj uas Zam hais txog yog kev npaj txoj kev sab hauv lub siab lub ntsws. Yog kev meem lub siab lub ntsws tsis ncaj kom xwm yeem kom zoo! Kev ua lub neej uas nkhaus mus nkhaus los yuav tsum taug kom ncaj. Lub siab lub ntsws uas tsis huv tsis ncaj yuav tsum ua kom huv kom ncaj tuaj. Kev npaj yam tseem ceeb yog npaj tej kev no. tej yam uas Zam ua tuaj ncig thoob Yos Las Das teb yog kev tshaj ib co kab ke ntxuav pab tig los yuav lub siab tshiab kom tau daws txhaum. Kab ke ntxuav plig yuav tsis muaj qab hau yog tsis muaj kev tig los yuav lub siab tshiab. Kev tig los yuav lub siab tshiab yog thawj yam ua npaj txais tus Cawm Seej tej yam no yog cov uas peb yuav npa nyob hauv 4 lub lis piam ua ntej Yes Xus yug los.
Peb yuav saib ntawm yus tus kheej zoo li zaj “kuv lees txhaum” pe bhais thaum pib koom thaj txi Ntuj; muaj lo lus hais tias “kuv lub siab xav txhaum, kuv lub ncauj hais txhaum, thiab kuv lub cev ua txhaum.” Zoo li no mas, kwv tij sawv daws, peb lub siab, lub ncauj, thiab lub cev xav ua txhaum zuj zus. Li ntawd, peb thiaj yuav tsum ceev faj peb lo lus hais, peb txoj kev xav los peb lub tswv yim, thiab yam peb ua rau yus tus kheej thiab rau luag.
Lub ntsiab lus ntawm lub lis piam tim ob hauv lub caij Tos Huab Tais no mas yog kev thaj yeeb. Vaj Qhia Francis muaj cov lus hais rau peb sawv daws li no tias: “thov kom peb yog qhov pom kev ci ntawm nroog Bethlehem, yog tus coj kev kaj siab lug thiab kev thaj yeeb rau qab ntuj neeg.” Ua li ntawd mas kwv tij hmoob sawv daws, thov Tswv Ntuj foom koob foom hmoov rau peb kom peb muaj kev thaj yeeb hauv peb lub siab lub ntsws thiab thov kom peb yog tus ua kom kev thaj yeeb tshwm sim tuaj hauv peb neej, hauv peb cov kwv tij neeg tsa sawv daws lub neej thiab mog. Amen.
