Lo lus ntawm lub neej hauv lub 3 hlis.
“Tswv Ntuj, thov koj tsim ib lub siab huv rau kuv. Koj tso dua ib lub tswv yim khov rau hauv kuv.” Lo lus hauv Ntawv Ntshiab uas hais rau peb nyob hauv lub Caij Plaub Cuag no, yog nyob hauv phau ntawv Nkauj Paj Nruag zaj 51 qib 12. Peb pom lo lus thov nyob siab thiab kev txo hwj chim ua neeg me hais tias :
“Tswv Ntuj, thov koj tsim ib lub siab dawb huv rau kuv, thiab koj tso dua ib lub tswv yim khov rau hauv kuv.”
Zaj Nkauj Paj Nruag no yog Nkauj Paj Nruag tu siab txog yus cov txhaum, los yog pab kom yus rov thim xav. Yog ib zaj uas tus vaj Das Vis siv los thov zam txhim txhaum, ces pom tias tsuas muaj Tswv Ntuj tib txog kev khuv leej xwb thiaj pab tau nws. Nws pib pom thiab nco txog tias nws tau ua txhaum nyob ntawm Tswv Ntuj xub ntiag, yog qhov phem zais ntshis nyob hauv nws nruab siab. Thiab Tswv Ntuj yog tus ncaj ncees nyob hauv nws cov lus. Tab sis Das Vis kuj tseem ua tej yam uas nws xav tau kom muaj feem koom nrog Tswv Ntuj yam puv npo. Yog lub qhov txhawv txiaj ntsim thiab kev khuv leej txhua yam. Thov kom Tswv Ntuj pab Das Vis rov mus nyob hauv Tswv Ntuj txoj kev cawm thiab kev zoo siab.
“Tswv Ntuj, thov koj tsim ib lub siab huv rau kuv. Koj tso dua ib lub tswv yim khov rau hauv kuv.” Zaj Nkauj Paj Nruag no yog sau tom qab ntawm ib co xwv txheej hauv Das Vis lub neej. Nws raug Tswv Ntuj hu nws ua vaj saib xyuas cov His Xas Lais thiab coj cov His Xas Lais nyob hauv Tswv Ntuj cov lus cog. Tab sis nws hla txoj cai, nws tsis kam ua cov hauj lwm Tswv Ntuj txib kom nws ua. Nws txeeb Npes Txas Npes uas yog Us Lis poj niam yuav. Us Lis yog haiv neeg Hus Tis. Nws yog ib tug thawj tub rog uas Das Vis yuam nws kom mus tuag nyob hauv tshav rog. Tus yaj saub Nas Taas thiaj ntuas Das Vis thiab qhia txog nws txoj kev txhaum. Nov yog thaum Das Vis lees txhaum thiab thov nrog Tswv Ntuj sib haum xeeb.
“Tswv Ntuj, thov koj tsim ib lub siab huv rau kuv. Koj tso dua ib lub tswv yim khov rau hauv kuv.” Zaj Nkauj Paj Nruag no, yog ib zaj uas Das Vis thov Ntuj los ntawm nws lub siab thiab yog kev tu siab rau cov txhaum tiag tiag. Thiab tso siab rau Tswv Ntuj txoj kev zam txim txhaum. “Thov koj ntxuav kuv cov txhaum”. “Thov koj rhuav tshem kuv tej kev phem tawm mus.” Yog qhov nco ntsoov tias Tswv Ntuj tib leeg xwb, thiaj tuaj yeem ua kom peb rov ua tau neeg tshiab tiag tiag. “Lub siab dawb huv”, yog tus ntsuj plig uas muaj Tswv Ntuj txoj sia nyob puv npo. Pub nws txoj kev zoo siab tseeb tiag rau peb, thiab hloov peb txoj kev sib raug zoo nrog Tswv Ntuj thiab nrog lwm tus.
“Tswv Ntuj, thov koj tsim ib lub siab huv rau kuv. Koj tso dua ib lub tswv yim khov rau hauv kuv.” Peb yuav muab lo lus ntawm lub neej no coj mus siv li cas ? Thawj yam yuav nco ntsoov tias peb yog neeg txhaum, peb xav tau txais kev zam txim txhaum los ntawm Tswv Ntuj. Thiab peb yuav tso siab rau Tswv Ntuj txoj kev khuv leej.
Kev rov ua txhaum tas zog, ua rau peb qaug zog thiab ntxias dag kom peb tus kheej yuam kev dua qub. Thaum muaj tej yam li no tshwm sim, peb tsim nyog yuav maj mam qhib peb lub siab me me. Nyob hauv cov xyoo 1940, Keira Lubić tau sau hais txog kev xav uas tsis tuaj yeem hla dhau qhov tseeb tias ; nws tau ua txhaum thiab txaj muag heev. Keira hais tias : “Peb yuav tshem tas peb txoj kev xav tsis zoo tawm hauv peb lub siab mus.” Peb yuav ntseeg tias Yes Xus txav los nyob ze peb, vim kev lees txhaum uas txo hwj chim ua neeg me ncaj ncees thiab muaj kev nyiam kev hlub nyob hauv peb. Yam twg uas peb muaj thiab ua tau ntxim ntxub, Tswv Ntuj tsis tau cib nyeej peb nyob hauv kev khuv leej. Peb tus ntsuj plig yuav koom ua ib tug nrog Tswv Ntuj nyob hauv kev cev Tswv Ntuj ua paj tshab rau peb. Nws yog tib qho paj tshab rau peb, tsis yog txoj kev coj ncaj ncees, tab sis yog peb cov txhaum. Yes Xus nqes los hauv ntiaj teb, nws yug los ua neeg, yog tsuas ntshaw ib yam xwb, yog ua tus cawm seej, ua kws kho mob. Nws tsis xav tau dab tsi ntxiv.
“Tswv Ntuj, thov koj tsim ib lub siab huv rau kuv. Koj tso dua ib lub tswv yim khov rau hauv kuv.” Thaum nyob ywj pheej thiab tau txais kev zam txhaum, nco txog kev pab uas peb tau txais ntawm luag tej, vim cov neeg ntseeg muaj qhov ruaj khov nyob hauv lawv. Kom peb pib nyiam cov neeg nyob ze peb raws kev ncaj ncees, tsis hais lawv yog leej twg kuj xij.
Keira sau tias : “Yam uas nug txog peb, yog kev rov sib nyiam sib hlub uas ua luag tub txib thiab sib nkag siab. Sib faib kev nyuab siab, kev txhawj xeeb thiab kev sov siab ntawm peb cov kwv tij.”
Nov yog txoj kev nyiam kev hlub uas kav tas txhua yam, zam tas txhua yam thiab yog kev nyiam kev hlub ntawm kev ua neeg ntseeg. Qhov kawg, Vaj Qhia Fas Ntshis Kus hais tias : “Kev zam txim ntawm Tswv Ntuj, yog lub cim loj ntawm Tswv Ntuj txoj kev khuv leej. Yog cov paj tshab uas cov neeg txhaum tau txais, thiab thov kom sawv daws txawj zam txhaum rau cov neeg txhaum uas lawv tau ntsib. Cov neeg uas Tswv Ntuj tso nyob ze ntawm peb ib sab, xws li tsev neeg, phooj ywg, cov Txiv Plig thiab cov Leej Phauj. Sawv daws xav tau kev khuv leej ntawm Tswv Ntuj ib yam peb.
Tau txais kev zam txim txhaum yog ib qho zoo kawg. Koj kuj ib yam, yog tias koj tau txais kev zam txim txhaum, koj kuj yuav zam rau luag thiab. Kev zam raug luag, yog koom ua pov thawj txog kev zam ntawm Tswv Ntuj. Ua kom peb lub siab kaj lug thiab peb lub neej pauv ntxeev.”
