Tswv Ntuj kev khuv leej (God is love)
Kev khuv leej yog dab tsi ? Leej Ntshiab Tos Mas hais tias :
“Kev khuv leej yog kev sib pom dej siab txog lwm tus txoj kev txom nyem, kev ntxhov siab.” Vim li ntawd, Tswv Ntuj kev khuv leej yog hais txog kev khuv leej uas Tswv Ntuj muab rau peb thaum peb ntsib kev txom nyem. Tam sim no kuv xav kom koj nco ntsoov tias thaum peb tab tom nyeem Ntawv Moo Zoo hauv lub lis piam no, nws yog nyob hauv Zam ntawv Moo Zoo thiab yog zaj hais txog Yes Xus tawm tuaj. Yes Xus sawv hauv cov tub tuag los thiab nws yees tawm tuaj rau cov Thwj Tim pom. Peb yuav saib seb zaj no yog pib li cas.
Thawj hnub ntawm lub lis piam thaum yuav tsaus ntuj, cov qhov rooj kaw tag thiab cov Thwj Tim nyob hauv tsev, vim lawv ntshai cov His Xas Lais. Hais txog kev ntshai, kuv xav tias tej zaum peb hnov qab lawm. Thaum Yes Xus raug tua nyob saum ntoo cuam, cov Thwj Tim khiav tas, peb kuj nkag siab txog. Lawv ntshai tsam cov His Xas Lais tuaj nrhiav ntes lawv thiab muab lawv ntsia nyob saum ntoo cuam xws li Yes Xus. Lawv yog lub cim ntawm kev ntshai thiab peb kuj ntshai. Li ntawd, thov muab txhua yam uas koj ntshai tshem tawm mus, tsis hais hauv koj tsev neeg los yog koj txoj hauj lwm thiab koj lub cev ntaj ntsug kuj xij. Koj yuav nkag mus saib hauv Yes Xus cov Thwj Tim, uas lawv raug kaw nyob hauv txoj kev ntshai, lawv tsis kam txav chaw. Tab txawm lawv kaw cov qhov rooj qhov rais tas, tsis kav Yes Xus kuj yees tawm tuaj nyob nruab nrab hauv lawv. Yes Xus yeej txoj kev tuag thiab sawv rov los, nov yog qhov sawv daws ua xyem xyav. Yes Xus tuag thiab sawv rov qab los, nws muaj zog dua peb txoj kev ntshai. Dab tsi kuj xij uas ua rau peb ntshai, qhov ntawd yog lub moo zoo ntawm kev sawv rov los. Yog lub moo zoo ntawm kev ntseeg. Thaum peb saib saum tus ntoo cuam, mas peb ntshai tas txhua yam. Tab sis Yes Xus txoj kev sawv rov los, ua rau peb paub tias Tswv Ntuj txoj kev hlub muaj zog thiab loj tshaj tej ntawd, ces nws yuav tsoo tej qhov rooj kev ntshai nyob hauv peb lub siab. Yes Xus hais rau nws cov Thwj Tim tias : “Kev thaj yeeb nyob hauv nej”, los yog hais tias Shalom. Shalom txhais tias txhua yam yog kev thaj yeeb. Yog qhov Tswv Ntuj xav tau thiab Tswv Ntuj pub rau nws haiv neeg ib txwm los. Thiab Yes Xus kuj hais lo lus no rau nws cov Thwj Tim.
Thaum Yes Xus hais li no, Yes Xus kom lawv ntsia nws lub ntsej muag thiab nws lub qhov txhab. Yes Xus muab nws lub qhov txhab rau cov Thwj Tim saib, txhais tias Yes Xus yog Tswv Ntuj nqes los ua neeg thiab peb tua nws. Tswv Ntuj nqes los nyob nruab nrab hauv peb, ces peb yuav tsum muaj kev sov siab puas yog ? Sawv daws yuav zoo siab tos txais kom zoo puas yog ? Tab sis Tswv Ntuj ntsib dab tsi ? Nws ntsib kev ntxeev siab, kev tsis lees txais, kev ntxub ntxaug thiab kev khiav nkaum.
Qhov phem tshaj ntawd, yog qhov lawv tab tom ntsia Yes Xus nyob saum ntoo cuam. Li ntawd, Yes Xus lub qhov txhab ua kom pom tej yam txawv nyob hauv peb. Yog peb muaj sia hauv sab ntsuj plig uas peb ntsia tsis pom peb cov txhaum, mas yog peb plam txoj kev ntseeg uas yog kev cawm. Muaj tus cawm seej los pab cawm peb ntawm tas txhua yam, yog peb mloog nws lub suab, mas peb yuav zoo siab puas yog ? Tej zaum peb yuav hais tias : Tsis yog, nws tsis yog kuv li kev txhaum, nws yog lwm tus li kev txhaum, nws yog lawv li kev txhaum. Ntawm kuv, kuv zoo txhua yam. Vim kuv noj qab nyob zoo, txhua yam ntawm kuv puav leej zoo tas. Yog koj xav li no, mas koj yuav tsis muaj txoj sia hauv fab ntsuj plig. Yes Xus lub qhov txhab yog qhov txhib peb lub siab, nws yog qhov txiav txim ntawm koj, yog qhov txiav txim peb cov txhaum. Tswv Ntuj nqes los, tab sis peb muab nws tua. Nws yog qhov phem kawg, peb cov txhaum nyob tob npaum cas.
Nyob hauv Yes Xus lub qhov txhab, peb ntsia pom txog peb cov txhaum, peb kuj tau hnov Shalom, peb tua Yes Xus. Tab sis Yes Xus sawv rov los nyob hauv txoj kev nyiam thiab zam txhaum rau peb. Txhais tias tsis muaj dab tsi yuav cais tau peb ntawm Tswv Ntuj. Kev tuag, txoj sia thiab txhua yam muaj txoj sia tsis muaj leej twg yuav cais tau peb kom tawm ntawm Tswv Ntuj txoj kev nyiam kev hlub. Peb tua Tswv Ntuj, mas pom tseeb kawg tias peb muaj txhaum, tsis kav peb kuj tau txais kev zam txhaum.
Dab tsi yog kev khuv leej ? Kev khuv leej yog Tswv Ntuj txoj kev nyiam kev hlub uas muaj rau cov neeg ua tiag nyiaj kev txom nyem. Leej twg yog tus nyiaj thiab tiv kev txom nyem, tab sis peb yog cov neeg muaj txhaum ? Peb pom Yes Xus cov qhov txhab zoo li yog peb cov qhov txhab. Nyob hauv cov qhov txhab ntawd, peb hnov lo lus Shalom. Yog kev khuv leej ntshiab huv, yog tas nrho txoj kev ntseeg.
“Leej Txiv xa kuv tuaj li cas, kuv kuj yuav xa nej mus li ntawd.” Yes Xus tshuab pa rau saum cov Thwj Tim, nws hais tias : “Nej txais Leej Ntuj Plig Ntshiab mas !”
Yes Xus raug xa nqes los ua neeg nyob ntiaj teb xws li tus sawv cev kev khuv leej ntawm Tswv Ntuj. Li ntawd, puas yog Tswv Ntuj xa peb tuaj ? Tswv Ntuj nyiam thiab hlub lub ntiaj teb neeg, ces nws thiaj xa nws Leej Tub Twm Zeej tuaj cawm peb. Tswv Ntuj xa nws Leej Tub tuaj, kom tau ua tus sawv cev ntawm Tswv Ntuj txoj kev khuv leej.
Ib qhov tshwj xeeb tshaj ntawd, yog qhov tias tib tug Tswv Ntuj ua pa nyob hauv peb, ntawd yog hais txog Tswv Ntuj pub Leej Ntuj Plig Ntshiab rau peb.
Txawm yuav zoo li cas kuj xij, txhua hnub thaum koj sawv los koj yuav hais tias : kuv cov hauj lwm hnub no, tsis yog kev nyeem ntawv kom tau hauj lwm zoo ua, los yog kev nrhiav nyiaj ntxiv kom tau raws li lub hom phiaj nyob ntiaj teb no. Tab sis yog txhua hnub koj sawv los thiab koj hais tias : kuv lub hom phiaj hnub no yog kev ua tus sawv cev ntawm kev khuv leej. Coj Shalom Tswv Ntuj txoj kev thaj yeeb mus rau qhov chaw uas muaj cov neeg pluag txom nyem. Ntawd muaj cov neeg ntseeg, muaj cov thwj tim, cov neeg muaj txhaum mas koj zam rau lawv lawm.
Nod yog qhov uas Yes Xus tau muab lub hwj chim rau cov Txiv Plig hauv lub Koom Txoos, kom lawv muaj cai daws txhaum nyob hauv lub Cim Ntshiab. Yog muaj tej tus neeg muaj txhaum nyob ntawm koj thiab nws xav tau txais kev zam txhaum. Koj tuaj yeem ua tus sawv cev zam txhaum rau nws, ces nws yuav tau txais Tswv Ntuj kev thaj yeeb. Yog koj tsis cev lawv lub npe, koj tsis khuv leej, lawv kuj yuav tsis tau txais kev zam txhaum.
Qhov kawg no, peb rov los xav txog zaj no ntxiv mus, yog hais txog qhov Tos Mas ua xyem xyav thiab kuv pom tias : ntau xyoo dhau los hauv kev nthuav ntawv Moo Zoo, muaj coob leej txaus siab rau zaj hais txog Tos Mas. Tos Mas uas yog ib tug nyob hauv Yes Xus cov Thwj Tim, tab sis lub sij hawm Yes Xus yees tawm tuaj rau cov Thwj Tim pom Tos Mas tsis nrog lawv nyob.
Lwm tus Thwj Tim hais rau Tos Mas tias : Yes Xus sawv hauv cov tub tuag rov los lawm. Tos Mas hais tias : nws tsis ntseeg, yog tias nws tsis tau xuas ntiv tes kov Yes Xus lub qhov txhab. Yog vim li cas Tos Mas thiaj tsis ntseeg ? Vim nws tsis nrog lawv nyob. Lub lis piam tom qab, Yes Xus rov yees tawm tuaj rau lawv pom, Yes Xus hais rau Tos Mas tias : “Muab koj ntiv tes mus kov kuv lub qhov txhab”. Ces Tos Mas thiaj ntseeg, vim Yes Xus hais tias Shalom “Kev thaj yeeb muaj nyob hauv nej”. Tos Mas txhos caug hawm Yes Xus tam sim ntawd thiab nws hais tias : “Kuv tus Tswv Ntuj”.
Cov neeg nyob hauv ntawv Moo Zoo nkag siab sib txawv hais txog Yes Xus. Tej tus hais tias Yes Xus yog tus tshaj lub Moo Zoo, Yes Xus yog xib hwb, Yes Xus yog kws kho mob thiab Yes Xus yog Mes Xias. Vim Tos Mas tau kov Yes Xus lub qhov txhab thiab hnov Yes Xus hais tias Shalom, ces Tos Mas thiaj ntseeg.
Yog tias koj yog Tos Mas, mas koj yuav xav tias Yes Xus yog tus Leej Ntshiab pab koj. Txhob swb, txhob cia kev ua xyem xyav ntawm koj coj koj mus ntsib Yes Xus. Vim Yes Xus tuaj yeem chaws los tau ntawm cov qhov rooj qhov rais uas kaw nti thiab tej phab ntsa zeb. Yes Xus yeej peb txoj kev ntshai thiab Yes Xus yeej txoj kev tuag. Koj yuav nrog koj cov txhaum sib tham, yog tias koj coj txoj kev ntseeg uas cawm neeg, koj yuav paub tias muaj qee yam tsim nyog tau txais kev cawm. Vim Yes Xus lub qhov txhab zeem tseeb txog qhov ntawd. Shalom ntawm Yes Xus, yog kev txhiv peb. Yog peb txoj sia, yog txoj kev cawm peb. Qhov ntawd yog peb chaw cia siab thiab yog peb txoj kev khuv leej uas ua tawm los. Tswv Ntuj kev khuv leej muaj nyob hauv peb tej kev txom nyem. Ntawd yog lub Moo Zoo uas ua kom peb paub txog Tswv Ntuj txoj kev khuv leej. Thov Tswv Ntuj foom hmoov zoo rau koj !
