Txoj Cai Ob. (We talk about the book of Deuteronomy)
Hnub no peb rov ua tib zoo xav thiab peb los pib nyob hauv phau ntawv Txoj Cai Ob. Yog phau ntawv kawg ntawm Phau Tsib los yog Txoj Cai Ob. Yog phau ntawv kawg nyob hauv Ntawv Ntshiab Torah. Txoj Cai Ob yog los ntawm “Deuteros nomos” txhais tias : “Txoj Cai nqe Ob. Txoj Cai Ob yog Mais Xes cov lus hais nyob hauv lub caij cov His Xas Lais tab tom pib mus rau thaj av cog lus. Li ntawd, thiaj zoo li daim ntawv pov thawj kawg ntawm Mais Xes. Txoj Cai Ob yog Mais Xes xaus tas cov lus uas Tswv Ntuj muab rau nws nyob saum lub roob Xis Nais. Thiab yog txoj cai teeb tseg nyob hauv phau ntawv Les Vis. Yog cov lus tseem ceeb zaum kawg uas nws hais rau cov His Xas Lais.
Cov lus no sau tseg nyob hauv Txoj Cai Ob zaj 18. Muaj ib lo lus uas ntxim siab kawg thiab txawv me ntsis. Vaj Qhia Npes Nes Dis ua kom lo lus no yog qhov nruab nrab hauv kev mem Yes Xus cov lus. Yog koj ua zoo saib zaj hais txog Tswv Ntuj nyob hauv 3 phau, mas lo lus nyob hauv Txoj Cai Ob zaj 18 yog lo lus mem txog Yes Xus cov lus.
Kuv thov nyeem lo lus tseem ceeb no rau nej mloog. Mais Xes hais tias :
“Tswv Ntuj yuav tshoj ib tug neeg hauv nruab nrab nej, hauv koj tsoom kwv tij, kom nws sawv ua yaj saub zoo li kuv. Nej yuav mloog nws hais.” Vim li cas kuv thiaj hais tias lo lus no yog lo lus txawv ? Tus hais cov lus no yog Mais Xes, Mais Xes yog tus neeg nto npe tshaj nyob hauv ntawv Cog Lus Qub. Tswv Ntuj hais lus rau Mais Xes nyob hauv tauv pos uas muaj hluav taws cig. Mais Xes tau txais Tswv Ntuj cov lus kom ua tus daws tso cov His Xas Lais. Mais Xes thiaj coj cov His Xas Lais hla teb chaws suab puam mus txog lub roob Xis Nais, ces Mais Xes tau txais Tswv Ntuj 10 Lo Lus qhia nyob ntawd. Mais Xes tau lus tso cai kheev nws mus ntsib Tswv Ntuj txawv heev yam tsis tau muaj los dua nyob hauv Ntawv Ntshiab. Nws tau pom Tswv Ntuj tim ntsej muag thiab nrog Tswv Ntuj sib tham zoo li phooj ywg. Mais Xes yog tus muaj hwj chim tshaj nyob hauv cov His Xas Lais.
Yog Tswv Ntuj muab Ntawv Ntshiab Torah rau Mais Xes, mas Mais Xes yog tus tau txais lub hwj chim. Li ntawd, zim txwv no koj yog xib hwb, yog kws kos duab thiab yog Las Npis nyob hauv cov His Xas Lais, koj yuav thov rov hais dua txog Mais Xes lub hwj chim. Tej zaum koj tau hnov cov lus hauv Ntawv Ntshiab hais txog Tswv Ntuj thiab Mais Xes. Tswv Ntuj yog Tswv Ntuj, tab sis tus muaj hwj chim tshaj hauv cov His Xas Lais yog Mais Xes. Koj puas paub tias Las Npis hais tias : “Kuv tau txais nws los ntawm kuv tus xib hwb. Tus Las Npis ntawd thiab tus Las Npis no. Kuv tau txais nws los ntawm nws tus xib hwb.” Hais rov mus rov los thiab qhov kawg peb tau txais nws nyob hauv Ntawv Ntshiab Torah uas Tswv Ntuj muab rau Mais Xes. Torah yog phau Ntawv Ntshiab 5 phau nyob rau hauv los sis yog Txoj Cai Ob.
Li ntawd, Mais Xes thiaj hais tias : “Tus yaj saub zoo li kuv, Tswv Ntuj yog tus tsa sawv thiab mloog nws.” Koj puas pom tias qhov ntawd txawv npaum cas ? Vim li cas Mais Xes ho tsis hais tias : “Mloog kuv mus txhua tiam txhua txheej, ces koj yuav noj qab nyob zoo. Vim Tswv Ntuj muab 10 lo lus cog rau kuv, ces kuv muab rau koj.
Li ntawd, koj yuav mloog kuv, vim kuv yog tus muaj hwj chim loj tshaj, ces koj yuav tau noj qab nyob zoo.” Tab sis Mais Xes tsis hais li ntawd, Mais Xes hais tias :
“Nyob ntawm no muaj tus loj dua kuv”, Mais Xes kuj hais tias : “Mloog nws”.
Thov sawv daws saib yam no seb, nws muaj dab tsi tshwm sim ? Kuv yuav xub hais qhov tsis zoo ua ntej. Yog ua kom muaj kev kub ntxhov nyob hauv cov His Xas Lais, vim lawv xav tias : “Kuv mem tias muaj ib tug loj dua tab tom tuaj. Tab txawm peb hwm Mais Xes, tsis kav saib zoo li tseem muaj lwm tus loj dua uas Mais Xes tab tom tuaj thiab.” Txhua zaus uas cov yaj saub tawm tuaj, xws li His Xais, Yes Les Mias, Es Xes Kias, Das Nias, Ntxas Kas Lias thiab Os Xes, mas sawv daws xav tias :
“Tej zaum tus Mais Xes hais txog yog ib tug ntawd ntag.” Tab sis phau ntawv Txoj Cai Ob sau nyob hauv kwv yees xyoo 500 ua ntej Yes Xus yug los. Yog xyoo sau tiav tas txhua yam. Txawm li ntawd kuj xij, peb tseem pom lo lus txhais no nyob ntawm no. Muaj tus loj tshaj kuv tab tom tuaj nrhiav nej thiab nej tsim nyog mloog nws. Qhov uas lub Koom Txoos kom peb nyeem zaj no hauv Txoj Cai Ob, yog vim yuav ua kom peb nkag siab txog yam uas tshwm sim nyob hauv lub Moo Zoo uas yog Mas Kos ntawv Moo Zoo. Li ntawd, tam sim no peb thiaj pom Yes Xus nyob hauv peb txoj kev ntseeg thiab Yes Xus tab tom ua yam uas neeg thiab Las Npis yuav ua nyob hauv kev ntseeg.
Leej twg uas nws muaj hwj chim qhuab qhia tau, yog tias nws tsis yog tus loj dua Mais Xes thiab leej twg loj dua Mais Xes. Tus neeg no nws tau pom Tswv Ntuj tim ntsej tim muag thiab nrog Tswv Ntuj sib tham zoo li phooj ywg. Leej twg tseem yuav loj dua Mais Xes, tshwj xeeb tus xub nrog Mais Xes tham. Koj puas paub tias thaum kuv tseem kawm ntawv, yog qhov xwm yeem uas peb hais kam tias :
“Mas Kos ntawv Moo Zoo thiab lwm phau ntawv xws li Mas Tais thiab Lus Kas ntawv Moo Zoo. Txhais tias cov ntawv no yog hais txog Yes Xus lub neej.”
Tsuas muaj Zam ntawv Moo Zoo xwb thiaj hais zoo li nws yog Tswv Ntuj. Thaum cov neeg pom, mas lawv poob siab txog nws cov lus qhuab qhia, vim nws qhia zoo li nws yog Tswv Ntuj. Muaj ib tug txiv neej raug dab tawm tuaj nyob ntawm lub tsev Txoos thiab hais rau Yes Xus tias : “Yes Xus Nas Xas Les, koj xav tau dab tsi ntawm peb ? Puas yog koj xav ua phem rau peb ?” Thawj tus dab phem uas Yes Xus pom nyob hauv thawj phau ntawv Moo Zoo yog nyob hauv tsev teev Ntuj. Ces sawv daws xav tias nov yog tus yeeb ncuab loj nyob ntawm lub Koom Txoos sab nraud. Tus neeg phem nws ua kom muaj kev sib tawg. Nws yog tus ua kom muaj kev sib ntxub ntxaug thiab rhuav kev sib haum xeeb ntawm Tswv Ntuj.
Yes Xus hais tias : “Koj ntsiag ! Koj cia li tawm ntawm tus txiv neej no mus.”
Yes Xus tsis tau thov Mais Xes thiab nws tsis tau hais tias : “Tswv Ntuj, thov koj pab kuv ntiab tus dab phem no kom nws tawm mus.” Yes Xus ntiab dab nyob hauv nws lub suab thiab yog nws tus kheej. Ces tus dab phem cia li tawm mus lawm. Yes Xus ntiab dab phem tau thiab cov dab phem kuj mloog nws. Leej Ntshiab Zam hais tias :
“Leej Lo Lus yog neeg thiab nws nyob nruab nrab hauv peb.”
Yes Xus hais tias : “Kuv thiab Leej Txiv yog ib tug. Tus tau pom kuv, mas kuj yog nws tau pom Leej Txiv.”
Tas txhua yam no zeem tseeb txog Yes Xus txoj kev ua Tswv Ntuj. Tus neeg hais tsis yog thov Mais Xes, tab sis nws hais thiab nws qhuab qhia. Nws hais zoo li tus hais rau Mais Xes thiab ua rau Mais Xes. Nws yog Yes Xus tus txuag kom txhob muaj kev sib tawg. Cov sau ntawv Moo Zoo, lawv xav qhia koj tias Yes Xus yog leej twg. Tus neeg uas txawv thiab loj dua Mais Xes yog leej twg ?
Lawv xav qhia kom peb paub tias Yes Xus yog Tswv Ntuj. Tus loj dua Mais Xes yog Yes Xus. Yes Xus tsis yog tus xib hwb qhia kev ntseeg. Kev lees tias Yes Xus yog tus yaj saub loj dua Mais Xes, yog qhov uas lub Koom Txoos hais txog tas li.
Kwv tij Hmoob sawv daws ! Hnub no peb muab cov lus hauv phau ntawv Txoj Cai Ob los tham xaus li no xwb. Lwm hnub peb mam rov sib ntsib dua !
Nej sawv daws nyob zoo !
