HNUB PEB, LIS PIAM 10 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 13-16)
Kwv tij Hmoob sawv daws, nyob hauv Mas Tais Ntawv Moo Zoo, ua ntej Huab Tais Yes Xus yuav hais tias “Nej yog cov ntsev las lub ntiaj teb, nej yog lub teeb ci rau lub ntiaj teb”, mas yog Huab Tais Yes Xus hais txog cov tau txoj hmoov zoo; xws li yog cov pluag hauv nruab siab, yog cov siab zoo, yog cov quaj ntsuag, yog cov tshaib thiab nqhis txoj kev ncaj, yog cov hlub luag tej, yog cov siab huv, yog cov tsim kev thaj yeeb, yog cov ruag hiam vim txoj kev ncaj, yog cov ua tim khawv txog Huab Tais Yes Xus.
Kwv tij Hmoob, cov ua li hais, lawv yog cov ntsev las lub ntiaj teb, cov lub teeb ci rau lub ntiaj teb. Huab Tais Yes Xus tab tom hais kom cov thwj tim ua zoo li ntawd.
Huab Tais Yes Xus kuj hais li ntawd rau peb thiab, vim peb ntseeg txog nws, peb yog Huab Tais Yes Xus cov thwj tim.
Ntsev yog ib yam daw thiab ntsim. Yog cov ntsev twg tsis daw tsis ntsim mas tsis muaj nqe dab tsi, kawg muab pov tseg xwb.
Ntsev daw thiab ntsim mas thaum peb rau xyaw tej lauj kaub zaub, tais kuab zaub ntawd thiaj qab kua. Peb muab ntsev nphoo rau ib taig nqaib vom, cov nqaij qaib ntawd thiaj xis ncauj. Tais kua txob twg tsis daw ntsev, tais kua txob ntawd kawg ntsim xwb yeej tsis ntxim ncauj. Daim nqaij twg yog tsis xub muab las ntsev, mas daim ntawd yuav xub lwj ua ntej.
Ntsev muaj qhov zoo yog li ntawd.
Huab Tais Yes Xus cov thwj tim yuav ua raws li cov tau txoj hmoov zoo, mas lawv thiaj yuav ua tau kom lub ntiaj teb qab, lub ntiaj teb tsis lwj.
Lub teeb ci kom qhov tsaus ntuj pom kev tuaj, kom pom tseeb, kom txhob ntog, kom muaj kev sov siab.
Huab Tais Yes Xus cov thwj tim ua zoo li ntawd, lawv ua raws li cov tau txoj hmoov zoo, lawv yuav ua qhov pom kev rau lwm tus, ua kom cov neeg tau pom Huab Tais Yes Xus nyob hauv lawv, ua chaw cia siab rau cov neeg vam txog lawv.
Kwv tij Hmoob, Huab Tais Yes Xus muab nws cov lus rau peb txhua tus, zoo li nws muab lub teeb rau peb lawm, nyob ntawm peb saib peb puas taws coj must so rau saum tus ncej teeb, los peb taws coj mus cia hauv qab txee, los peb tsis taws kom pom kev.
Nyob ntawm sawv daws xaiv mog.
