ZAJ NYEEM HNUB TIM 10 LUB 6 HLI 2026
HNUB PLAUB, LIS PIAM 10 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 17-19)
Kwv tij Hmoob, Huab Tais Yes Xus hais tias nws tsis yog tuaj rhuav Txoj Cai thiab cov Yaj Saub lawv cov lus qhia, tab sis nws tuaj qhia ntxiv kom thoob. Huab Tais Yes Xus tseem hais ntxiv tias yog tus twg hla ib txog cai me thiab qhia luag kom hla Txoj Cai xws li nws, mas Tswv Ntuj saib tus ntawd qis tshaj cov nyob hauv Ntuj Ceeb Tsheej, tab sis yog leej twg ua raws Txoj Cai tas huv si thiab nws qhia kom luag ua xws li nws, mas Tswv Ntuj saib tus ntawd yog tus loj nyob hauv Ntuj Ceeb Tseej.
Nyob hauv cov Yus Das Txoj Cai, lawv muaj tas nrho 365 nqe lus txwv thiab ua. Cov nqe lus ntawd yog lawv muab Huab Tais 10 Lo Lus Qhia los nthuav thiab txhab ntxiv rau. Tab sis Huab Tais Yes Xus tuaj qhia, mas nws tsis saib txog tej yam cov Kws Ntawv Ntshiab ntxiv rau, Huab Tais Yes Xus saib txog lub ntsiab hauv 10 Lo Lus Qhia, ces muaj ib zaug Huab Tais Yes Xus thiaj li hais rau tus Kws Ntawv Ntshiab tuaj nug nws tias tas nrho cov lus hauv Txoj Cai muaj 2 lo lus loj tshaj; yog 1) Nyiam Tswv Ntuj tas siab tas ntsws, tas tswv yim tas zog, tas tus ntsuj plig. 2) Nyiam luag tej ib yam li yus rov nyiam yus.
Kwv tij, Huab Tais Yes Xus saib 2 lo lus no yog loj tshaj tej nqe lus qhia kom ua los tsis ua li ub li no raws li cov Yus Das coj. Ntawm peb cov neeg ntseeg, peb yog Huab Tais Yes Xus cov thwj tim, mas peb kuj saib 2 lo lus no loj tshaj thiab. Li ntawd, niaj hnub peb thiaj yuav tsis txhob hla 2 lo lus no. Niaj hnub peb yuav ua raws 2 lo lus no thiab qhia luag tej kom tsis txhob hla thiab.
Peb yuav qhia luag tau li cas, puas yog xuas lub ncauj qhia, los yog yuav ua tus piv txwv qhia?
Nyob hauv ib tsev neeg twg los ib lub zos twg, yog tias leej niam leej txiv niaj hnub qhuab ntuas lawv cov me nyuam, los tus hau zos niaj hnub tshaj lus kom sawv daws ua raws txoj cai; tab sis leej niam leej txiv los yog tus hau zos tsis ua raws li nws cov lus, mas nej xav saib cov me nyuam los yog cov pej xeem puas yuav ua raws.
Lo lus qhia yeej zoo kawg, tab sis ntsia tsis pom thiab xav tsis tawm. Yog tias lub ncauj hais thiab ua tus piv txwv rau pom, mas ntshai yuav zoo dua; cov me nyuam pom ces lawv qog raws, pej xeem pom ces lawv ua raws tus hau zos qab.
Nyob hauv txoj kev ntseeg, yog niam thiab txiv niaj lis piam Hnub Chiv coj lawv cov me nyuam mus nrog teev Ntuj tom tsev teev Ntuj, mas me nyuam hlob tuaj lawv yuav muab siab rau mus teev Ntuj. Yog niam txiv niaj hnub thov Ntuj hauv tsev rau me nyuam pom thiab qhia me nyuam thov Ntuj, mas cov me nyuam yeej yuav nyiam thov Ntuj thiab.
Nyob zoo sawv daws.
