ZAJ NYEEM HNUB TIM 10 LUB 7 HLI 2025
HNUB TSIB, LIS PIAM 14 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 10: 7-15)
Kwv tij Hmoob sawv daws, cov lus hauv hnub no yog cov lus Huab Tais Yes Xus ntuas cov tub tshaj Ntuj Lus tias lawv yuav ua zoo li cas rau txoj hauj lwm tshaj Ntuj lus.
Cov tub tshaj Ntuj Lus tsum ua 10 yam nram no:
- Nej ceeb toom tias Ntuj lub Ceeb Tsheej tuaj txog ze lawm.
- Nej kho cov mob kom zoo.
- Nej tsa cov tuag kom ciaj rov los.
- Nej kho cov mob ruas kom huv.
- Nej ntiab dab kom khiav.
- Nej tau txais dawb, nej rov pub dawb.
- Nej nug kom tau ib tug neeg muaj meej mom.
- Nej nyob hauv tus neeg ntawd tsev mus txog hnub nej rov qab.
- Nej foom kev kaj lug rau lub tsev nej mus nrog nyob.
- Yog lawv tsis txais los tsis mloog nej, mas nej tawm mus rau lwm qhov, ces nej nchos cov plua av lo nej ko taw pov tseg.
Cov tub tshaj Ntuj Lus kuj yuav tsis txhob ua 5 yam no:
- Txhob muab kub muab nyiaj, los muab xim nyiaj qhwv rau hauv duav siv.
- Txhob ris hnab taug kev.
- Txhob nqa ob lub tsho.
- Txhob nqa khau.
- Txhob nrig pas.
Kwv tij, 10 yam Huab Tais Yes Xus hais kom cov tub tshaj Ntuj lus ua, mas muab hais tau li no:
Cov tub tshaj Ntuj Lus tsum nco ntsoov tias lawv txoj hauj lwm yog tshaj txog Huab Tais Yes Xus cov lus qhia rau cov neeg lawv ntsib, lawv kuj yuav ua cov hauj lwm cawm neeg hauv kev txom nyem tsis hais sab cev nqaij los sab ntsuj plig, lawv kuj yuav pab daws sawv daws tej kev nyuaj siab ntxhov plawv, lawv rov tsa luag tej kom rov muaj tsim, lawv qhia sawv daws ua qhov zoo.
Cov tub tshaj Ntuj Lus tsis muab txoj hauj lwm tshaj Ntuj lus los ua lag luam nrhiav nyiaj, lawv txhob muab lub siab lub tswv yim dai rau nyiaj txiag los ntiaj teb lub cuab tam, lawv tsis txhob ua tswv tswj luag tej.
Tag nrho cov lus Huab Tais Yes Xus hais los ntuas cov Hauv Paus Xa Lus, mas kawg muaj tib lub ntsiab xwb; yog kom cov Hauv Paus Xa Lus muab siab rau lawv txoj hauj lwm tshaj kev sib nyiam sib hlub thiab tsim kev thaj yeeb.
Lawv tsis yog tshaj ntawm lub ncauj xwb, lawv tseem ua cov hauj lwm kom luag pom tias lawv ua raws li lawv hais tiag.
Yog li mas niaj hnub no Huab Tais Yes Xus cov thwj tim thiaj yuav muab tas lawv lub neej thiab txoj sia los ua tim khawv tias lawv nyiam sawv daws, lawv hlub cov neeg txom nyem, lawv zoo siab nrog lawv cov yeeb ncuab tsim kev thaj yeeb.
Cov kwv tij, niaj hnub los niaj lis piam peb mus koom lub Txoos Teev Ntuj, thaum xaus lub Txoos, Txiv Plig yuav hais tias “Nej rov mus Yes Xus nrog nej nyob, ua nej siab kaj lug”, los yuav hais tias “Nej rov mus, nej mus tshaj Yes Xus lub Moo Zoo”, los yuav hais tias “Nej rov mus, nej mus coj lub neej raws li Tswv Ntuj cov lus qhia.”
Yog kom peb mus ua cov hauj lwm Huab Tais Yes Xus txib peb ua, raws li Tswv Ntuj Lo Lus peb tau hnov hauv lub txoos.
Li ntawd, niaj hnub peb kav tsij muab peb lub ncauj thiab peb cov hauj lwm los tshaj txog Ntuj lub Ceeb Tsheej; yam li kev sis nyiam sis hlub, kev sib haum xeeb kom tau nyob thaj yeeb.
Nyob zoo sawv daws.
