Zaj nyeem hnub tim 11 lub 1 hlis 2026
Yes Xus txais lub Cim Ntxuav
Cov lus nyob hauv Mas Tais Ntawv Moo Zoo (MT 3: 13-17)
Cov kwv tij zoo nyiam sawv daws, hnub no peb hwm Yes Xus txais lub Cim Ntxuav. Lub caij Huab Tais Yes Xus yug los tas lawm. Peb nkag mus hauv lub caij Nyob Nruab Xyoo lawm. Txij no mus, peb yuav mloog Ntawv Moo Zoo qhia txog Huab Tais Yes Xus mus tshaj lub Moo Zoo hauv zej zog thiab txawv qhov chaws.
Ua ntej Huab Tais Yes Xus yuav mus tshaj Ntuj Lus, nws txais kab ke Ntxuav ntawm Zam Ntxuav Plig. Huab Tais Yes Xus txais Leej Ntuj Plig Ntshiab thiab Leej Txiv lub suab hais nrov nrov tias “Tus no yog kuv Leej Tub uas kuv nyiam. Nws yog kuv qhov chaws zoo siab.” Kuv xav caw peb sawv daws ras txog cov lus no me ntsis. Huab Tais Yes Xus yog Tswv Ntuj Leej Tub. Huab Tais Yes Xus tuaj ntawm Tswv Ntuj tuaj. Peb thiaj li ntseeg txog nws thiab ua raws li nws tus piv txwv. Yog peb ua raws li Huab Tais Yes Xus qhia peb kom ua peb kuj yog Tswv Ntuj qhov chaws zoo siab thiab. Qhov no yog peb txoj hauj lwm. Thaum peb txais lub cim ntxuav hauv Huab Tais Yes Xus lub npe, peb hu peb tus kheej tias cov ntseeg txog Yes Xus, peb yuav tsum ua raws li Yes Xus tus piv txwv thiaj tsim nyog. Ua li no, mas peb kuj yog Tswv Ntuj cov tub cov ntxhais uas Tswv Ntuj nyiam thiab. Peb kuj yog Tswv Ntuj qhov chaw zoo siab thiab. Yog peb xav ua Tswv Ntuj qhov chaw zoo siab, peb kuj yuav tsum mloog Tswv Ntuj Lo Lus thiab ua tim khawv txog Tswv Ntuj txoj kev nyiam kev hlub hauv peb lub neej. Hauv peb lub neej, hauv peb tsev neeg, ntawm cov nyob ib puag ncig peb, peb yuav tsum nyiam lawv, hlub lawv. Tswv Ntuj txoj hauj lwm tshaj Ntuj Lus yog zoo li no xwb. Huab Tais Yes Xus tuaj qhia thiab ua li no rau peb pom xwb. Li ntawd, hnub no, Leej Txiv hais rau peb thiab “Tus no yog kuv Leej Tub Leej Ntxhais uas kuv nyiam. Nws yog kuv qhov chaw zoo siab.
