ZAJ NYEEM HNUB TIM 11 LUB 10 HLI 2025
HNUB NCO TXOG LEEJ NTSHIAB VAJ QHIA ZAM 23
COV LUS NYOB HAUV LUS KAS NTAWV MOO ZOO (LK 11: 27-28)
Kwv tij sawv daws, Huab Tais Yes Xus tuaj tshaj txog Tswv Ntuj txoj kev nyiam kev hlub neeg thiab kev khuv leej neeg rau peb neeg ntiaj teb sawv daws, uas nws xub pub ntawm haiv His Xas Lais ua ntej, uas yog haiv neeg Tswv Ntuj tau xaiv thiab tau cog lus nrog lawv cov yawg koob los tau ntau tiam neeg lawm. Tiam sis, txij li thaum Huab Tais Yes Xus tuaj tshaj lub Moo Zoo, Huab Tais hais meej tias nws tuaj cawm lub qab ntuj neeg sawv daws kom dim, tsis tas li ntawd, nyob rau hauv Huab Tais Yes Xus lub neej peb yuav pom tias nws hlub neeg sawv daws, nws tsis cais haiv, tab yog lwm haiv neeg uas tsis yog cov His Xas Lais, tsis kav, tsuas yog lawv muaj lub siab ntseeg, mas Huab Tais cawm tas nrho. Nyob rau hauv hnub no peb pom tias Huab Tais tsis tau saib cov txheeb ze nws muaj nqis dua cov mloog Huab Tais lub Moo Zoo. Huab Tais tsis tau muab cai rau nws niam nws txiv los nws tej kwv tij ntau dua luag lwm leej lwm tus.
Vim Huab Tais Yes Xus coj Tswv Ntuj txoj kev nyiam kev hlub tuaj fim rau neeg ntiaj teb sawv daws, li ntawd nws hlub sawv daws sib npaug, kev swm nrog Tswv Ntuj tsis yog los ntawm roj ntsha, tsis yog los ntawm haiv His Xas Lais, tiam sis, yog los ntawm yus txoj kev ntseeg txog Tswv Ntuj, ntseeg txog Huab Tais Yes Xus Pleev. Vim Huab Tais Yes Xus yog “Leej Lo Lus” yog Tswv Ntuj uas tuaj nrog peb nyob, yog leej twg txais Tswv Ntuj Lo Lus, tus ntawd tau txais Tswv Ntuj txoj koob hmoov.
Nyob zoo sawv daws.
