ZAJ NYEEM HNUB TIM 11 LUB 12 HLIS 2025
HNUB NCO TXOG LEEJ NTSHIAB VAJ QHIA DAS MAS XUS
COV LUS NYOB HAUV MAS TAIS NTAWV MOO ZOO (MT 11: 11-15)
Nyob rau hauv zaj no, Huab Tais Yes Xus kuj tau qhuas txog Zam Ntxuav Plig, uas nws yog tus tuaj ua Huab Tais Yes Xus ntej, nws tuaj npaj kev tos Huab Tais Yes Xus. Nws hu kom tsoom pej xeem tig los yuav lub siab tshiab, kom npaj siab tos tus Huab Tais cawm neeg yuav tuaj.
Lub caij thaum ntawd, cov His Xas Lais raug kev ntxom nyem, lawv tseem niaj hnub tos ntsoov tus vaj pleev uas yuav tuaj cawm lawv. Li ntawd, Zam Ntxuav Plig thiaj tuaj txhib kom lawv npaj siab, vim tus vaj Pleev yuav tuaj lawm, ua rau tsoom pej xeem coob leej tig los yuav lub siab tshiab thiab tuaj txais kab ke ntxuav ntawm Zam.
Kwv tij sawv daws, txhua txhia xyoo thaum txog lub caij Tos Huab Tais lub Koom Txoos kuj pub ib lub sij hawm zoo rau peb tsoom ntseeg sawv daws, kom tig rov los nrhiav Huab Tais Yes Xus. Peb los npaj siab tos txais Huab Tais Yes Xus yug los, zoo yam li Huab Tais Yes Xus yug los dua ib zaug ntxiv nyob rau hauv lub xyoo no.
Kom xwv peb rov tau txais koob hmoov ntawm hnub Huab Tais Yes Xus. Thiab peb rov muaj kev zoo siab dua ib zaug ntxiv nyob rau lub caij no, yog lub caij uas ntiaj teb neeg yuav muaj kev zoo siab hom khaj. Li ntawd, thov kom peb tsoom ntseeg sawv daws, npaj siab thiab tu peb lub siab kom kaj kom huv tos Huab Tais tuaj nyob rau hauv peb lub neej, kom nej sawv daws tau lub neej nyob kaj lug kaj nrig.
Nyob zoo sawv daws.
