ZAJ NYEEM HNUB TIM 11 LUB 6 HLI 2026
HNUB NCO TXOG LEEJ NTSHIAB NPAS NAS NPES
COV LUS NYOB HAUV MAS TAIS NTAWV MOO ZOO (MT 10: 7-13)
Kwv tij Hmoob sawv daws, hnub no peb cov neeg ntseeg, mas peb nco txog Leej Ntshiab Npas Nas Npes. Npas Nas Npes lub qub npe hu ua Yos Xes, nws yog Leej Ntshiab Mas Kos ib tug kwv tij. Npas Nas Npes yog ib tug neeg nplua nuj. Ntawv cov Hauv Pau Xa Lus cov hauj lwm hais txog Npas Npas Npes tias nws yog xeem Les Vis yug los nyob Kws Plos. Thaum Npas Nas Npes tig los ntseeg txog Yes Xus, mas nws muab nws daim teb muag kom tau cov nyiaj los rau cov Hauv Paus Xa Lus coj mus pab cov neeg txom nyem. Vim li ntawd, cov Hauv Paus Xa Lus thiaj hu nws ua Npas Nas Npes, txhais tias ‘tus txawj nplij neeg’.
Cov Hauv Paus Xa Lus cia siab rau Npas Nas Npes, lawv thiaj li tsa Npas Nas Npes ua ib tug tub tshaj Ntuj Lus rau cov pej kum neeg. Leej Ntshiab Lus Kas sau tias thaum lub Koom Txoos nyob Yes Lus Xas Les hnov tias cov Hes Las nyob As Nthias Kias txais kev ntseeg, mas lawv xa Npas Npas Npes mus nyob As Nthias Kias. Npas Nas Npes tuaj txog, nws pom Tswv Ntuj lub txiaj ntsim, mas nws zoo siab hlo, nws pab cov neeg ntseeg nyob As Nthias Kias ua siab loj siab tawv nyob ruaj hauv txoj kev ntseeg.
Lub Moo Zoo hnub no Huab Tais Yes Xus twb ntuas peb tias “Thaum nej mus kev, nej ceeb toom tias Ntuj lub Ceeb Tsheej tuaj txog ze lawm, nej kho cov neeg mob kom zoo, nej tsa cov tuag kom ciaj rov los, nej kho cov mob ruas kom huv, nej ntiab dab kom khiav.” Li ntawd, hnub no peb nco txog Leej Ntshiab Npas Nas Npes, mas tsim nyog peb yuav thov Leej Ntshiab Npas Nas Npes pab peb thov Tswv Ntuj pub Ntuj lub txiaj ntsim rau peb, kom peb muaj ib lub siab dav siab hlob xws li Leej Ntshiab Npas Nas Npes, mas peb thiaj li muaj cuab kav ceeb toom txog Ntuj lub Ceeb Tsheej, muaj siab pab cov neeg mob, cawm cov neeg nyob hauv kev txhaum, coj tau cov neeg txom nyem kom los ntsib tau Tswv Ntuj, kom peb txawj nplij lawv xws li Leej Ntshiab Npas Nas Npes.
