ZAJ NYEEM HNUB TIM 11 LUB 6 HLI 2024
HNUB NCO TXOG LEEJ NTSHIAB NPAS NAS NPES
COV LUS NYOB HAUV MAS TAIS NTAWV MOO ZOO (MT 10: 7-13)
Kwv tij Hmoob sawv daws, hnub no Huab Tais Yes Xus hais rau cov Hauv Paus Xa Lus ua ntej yuav xa lawv mus tshaj Ntuj Lus tias “Nej ceeb toom tias Ntuj lub Ceeb Tsheej tuaj txog ze lawm. Nej kho cov mob, nej tsa cov tuag, nej ntiab dab. Nej pub dawb rau lawv, nej txhob nqa dab tsi. Nej foom kev kaj lug rau lawv.” Lo lus no yog lo lus cov tub tshaj Ntuj Lus yuav khaws cia nruab siab thiab coj rawv thaum lawv leg Tswv Ntuj txoj hauj lwm.
Hnub no lub Koom Txoos nco txog Leej Ntshiab Npas Nas Npes, ib tug Hauv Paus Xa Lus rau cov pej kum neeg xws li tus Hauv Paus Xa Lus Paj Lug.
Npas Nas Npes muaj lub npe Hes Nplaws hu ua ‘Yos Xes’, nws yug los nyob hauv lub pov txwv Kws Plos, yog ze ntawm xyoo tim 10 tej. Nws yug los nyob hauv ib tse neeg Yus Das coj Mais Xes txoj cai. Lawv tis npe rau nws hu ua Yos Xes. Lub npe Npas Nas Npes txhais tias ‘Tus txawj nplij thiab qhuab qhia.’
Npas Nas Npes muaj ib thaj teb nyob hauv lub pov txwv Kws Plos. Npas Nas Npes muab nws thaj teb muag, nws nqa cov nyiaj los rau Pob Zeb lawv. Pob Zeb siv cov nyiaj los pab cov neeg pluag kom lawv tau mov noj.
Npas Nas Npes muaj Leej Ntuj Plig Ntshiab puv nws siab. Thaum Xauv ntseeg txog Yes Xus thiab tuaj cuag Pob Zeb thawj zaug nyob Yes Lus Xas Les, cov Yus Das ntseeg txog Yes Xus tsis tso siab tias Xauv ntseeg txog Yes Xus tiag. Npas Nas Npes qhuab qhia cov ntseeg kom lawv tso siab rau Xauv.
Thaum Npas Xas Npes tshaj Ntuj Lus nyob As Nthias Kias, Xis Lias teb, mas Npas Nas Npes mus nrhiav Xauv nyob Tas Xis thiab coj Xauv tuaj pab qhia Yes Xus lub Moo Zoo nyob As Nthias Kias.
Npas Nas Npes thiab Xauv mus tshaj Ntuj Lus thawj zaug rau cov pej kum neeg. Nws coj Xauv mus tshaj lub Moo Zoo nyob Kws Plos. Nkawd tshaj Ntuj Lus 3 xyoos nyob Tws Kis teb.
Npas Nas Npes mus nyob Kws Plos. Cov Yus Das coj Mais Xes Txoj Cai muab Npas Nas Npes tua tuag nyob ntawd..
Kwv tij Hmoob sawv daws, Npas Nas Npes siab loj siab dav, nws muab nws ib daim teb muag los pab lub Koom Txoos, nws pub Ntuj lub Ceeb Tsheej rau cov neeg pluag txom nyem. Npas Nas Npes ua tus nres Paj Lug thaum cov thwj tim tsis tso siab rau Paj Lug, nws tau kho thiab tsa Paj Lug xws li sawv hauv kev tuag rov los. Npas Nas Npes hu Paj Lug los pab tshaj lub Moo Zoo vim tias Tswv Ntuj tau pub txoj hauj lwm no dawb dawb rau nws, ces nws yuav pub txoj hauj lwm no rau Paj Lug dawb dawb thiab.
Kwv tij Hmoob sawv daws, peb ua neej nyob mas Tswv Ntuj pub txhua yam rau peb, Tswv Ntuj xav kom peb pub rau lwm tus thiab. Peb thim xav saib nyob hauv peb, muaj yam twg Tswv Ntuj xav kom peb pub rau lwm tus. Peb xav saib nyob hauv peb rab peev xwm muaj yam twg peb yuav ua los pab lwm tus tau. Peb xav saib niaj hnub no peb puas tau pab tshaj Ntuj lub Ceeb Tsheej rau lwm tus, peb puas tau pab coj Ntuj lub Ceeb Tsheej mus rau lawv, los niaj hnub no peb tsuas hais cov lus foom phem rau luag tej xwb.
