ZAJ NYEEM HNUB TIM 12 LUB 12 HLIS: HNUB NIAM MAB LIAB YEES TAWM NYOB KUAS DAS LUS PES
COV LUS NYOB PHAU NTAWV HIS XAIS (HX 41: 13-20)
LUB MOO ZOO RAWS LI MAS TAIS (MT 11: 11-15)
Kwv tij Hmoob sawv daws, thaum cov His Xas Lais tsis pheej xeeb rau Tswv Ntuj, ces Huab Tais Tswv Ntuj cia lwm haiv neeg tuaj ntaus lub teb chaws tawg thiab coj lawv mus ua qhev nyob pej kum teb. Cov His Xas Lais tag kev tso siab tias muaj ib hnub lawv yuav rov tsa tau ib lub teb chaws yog lawv tug. Cov His Xas Lais ua tsis ncaj rau Huab Tais Tswv Ntuj, tsis kav Huab Tais Tswv Ntuj tseem hlub lawv thiab nco txog cov lus cog, mas Huab Tais Tswv Ntuj thiaj tshoj tus Yaj Saub His Xais kom hais Huab Tais Tswv Ntuj rau tsoom His Xas Lais tias Huab Tais Tswv Ntuj nrog nraim lawv thiab tuav lawv tes cia, Huab Tais Tswv Ntuj yuav txuag lawv thiab muaj ib hnub twg lawv yuav tau lub neej twj lij; yog tias lawv zoo siab nyob hauv Huab Tais Tswv Ntuj mus li.
Kwv tij, peb yuav zoo siab nyob hauv Huab Tais Tswv Ntuj li cas?
Huab Tais Yes Xus qhia tias tus neeg zoo siab nyob hauv Huab Tais Tswv Ntuj, mas nws yuav ua neeg siab ceev txeem Ntuj lub Ceeb Tsheej.
Lo lus ‘siab ceev’ no txhais tias yog tus neeg ua tiag nyiaj txeem.
Yog li tus neeg zoo siab nyob hauv Huab Tais Tswv Ntuj thiaj yog tus neeg ua tiag nyiaj tej kev iab kev khwv, txeem tej kev txom nyem kom nws chaws tau mus hauv Ntuj lub Ceeb Tsheej.
Hnub no, peb hnov Huab Tais Yes Xus hais txog tus Ntxuav Plig Zam tias nws yog tus Es Lias yuav tuaj, xwv sawv daws yuav mloog Zam cov lus ntuas kom hloov siab tshiab.
Cov His Xas Lais ntseeg tias ua ntej Leej Pleev yuav los, mas Es Lias yuav xub los tso, vim tias Es Lias yog tus tuaj ua Leej Pleev ntej.
Kwv tij, Huab Tais Yes Xus hais li ntawd, yog nws xav qhia lawv kom ntseeg tias tus Pleev lawv tos yog Yes Xus ntag.
Hnub no Huab Tais Yes Xus kuj ntuas peb sawv daws kom ntseeg li ntawd; kom peb ntseeg Zam cov lus ntuas kom hloov siab tshiab, tig rov los npuab Tswv Ntuj, los nrog Huab Tais Yes Xus tsim Ntuj lub Ceeb Tsheej ua ke nyob hauv lub qab ntuj no.
