Zaj nyeem hnub tim 13 lub 5 hlis 2026
Hnub niam Mab Liab yees tawm nyob Fas Tis Mas
Cov lus nyob hauv Zam Ntawv Moo Zoo (Z 16: 12-15)
Kwv tij sawv daws, kev qhia Ntuj kev cai rau cov neeg uas tsis paub Ntuj mas yeej tsis yooj yim.
Yav thaum ub, Huab Tais Yes Xus qhia tej yam tob nyob rau hauv Tswv Ntuj rau Haiv His Xas Lais, uas lawv yeej ib txwm paub Tswv Ntuj lawm, muaj qee yam lawv twb lees ntseeg tsis tau. Nyem no yog yuav qhia tej yam tob nyob rau hauv peb txoj kev ntseeg mas haj yam nyuaj. Li ntawd, peb yuav tsum ua siab ntev, maj mam qhia tej yam yooj yim ua ntej, zoo xws li yus tu ib tug me nyuam mos ab, nyuam qhuav yug los tshiab, yus yuav cia li pub tej mov uas yus niaj hnub noj rau nws noj thaum nws yug los tshiab tshiab tsis tau, yus yuav tsub xub pub mis rau nws haus ua ntej, thaum nws loj zuj zus tuaj thiab muaj hnub nyoog txaus lawm, yus mam li cia nws noj mov.
Nyob rau hauv zaj no, nqe lus uas Huab Tais Yes Xus hais rau cov thwj tim tias : tseem tshuav ntau yam kuv xav qhia rau nej, tiam sis, kuv yuav hais qhia tsis tau rau nej tam sim no, nyob tsam neej lees txais tsis tau. Li ntawd nej yuav tsum tos cia Leej Ntuj Plig Ntshiab nqes los tso, ces nws maj mam qhia kom nej to taub thiab paub txog qhov tseeb.
Li ntawd muaj qee yam uas tob nyob rau hauv peb txoj kev ntseeg Ntuj, yuav tsum siv sij hawm ntev, ces Leej Ntuj Plig Ntshiab mam qhia kom peb to taub zoo zuj zus tuaj.
Twb tau 2000 xyoo dhau los lawm Leej Ntuj Plig Ntshiab thiaj maj mam qhia tej yam uas tob nyob rau hauv kom lub Koom Txoos kom peb to taub zoo dua nyob hauv Tswv Ntuj.
Yam li kev ntseeg txog Huab Tais 3 Leeg, thiab ntseeg tias Niam Mab Liab yog Tswv Ntuj Leej Niam.
Kwv tij sawv daws, yog tias peb muaj txoj kev ntseeg ruaj thiab tso siab rau Tswv Ntuj, mas Leej Ntuj Plig yuav ua hauj lwm nyob hauv peb, thiab nws tseem yuav pub lub tswv yim thoob tsib rau peb kom to taub Tswv Ntuj zoo ntxiv mus.
Nyob zoo sawv daws.
