ZAJ NYEEM HNUB TIM 13 LUB 6 HLI 2024
HNUB NCO TXOG LEEJ NTSHIAB TUAM NYOB PAS DUAS
COV LUS NYOB HAUV MAS TAIS NTAWV MOO ZOO (MT 5: 20-26)
Kwv tij Hmoob sawv daws, nyob hauv lub Moo Zoo hnub no nej hnov Huab Tais Yes Xus hais txog lo lus tias ‘ua siab ncaj’. Lo lus no txhais tias ‘ua xis Tswv Ntuj siab’. Li ntawd, Huab Tais Yes Xus cov thwj tim lub siab ncaj thiaj txawv cov kws ntawv ntshiab thiab cov Fas Lis Xais lub siab ncaj. Cov kws ntawv ntshiab thiab cov Fas Lis Xas mas lawv saib tias tus neeg muaj lub siab ncaj yog tus coj txoj cai nruj, lawv ua neej raws nraim li txoj cai txiav, ces lawv tsis nco pom tias lawv lub neej xis los tsis xis Tswv Ntuj siab nyiam. Tswv Ntuj yog kev nyiam, Tswv Ntuj lub siab nyiam thiaj yog kom neeg sis nyiam sis hlub.
Lub Moo Zoo qhia peb ntau zaus txog kev ua xis Tswv Ntuj siab, yam li cov Yus Das caiv hnub xas npas tos ces lawv pom ib tug neeg raug mob yuav tuag los lawv tsis kam nqes tes pab, lawv yuav tos mus txog thaum lub hnub siav tu tso lawv mam pab tus neeg ntawd, ntshai thaum lub hnub siav tu ces tus neeg mob txoj sia twb tsis nyob lawm!
Huab Tais Yes Xus tsis ua li ntawd, Huab Tais Yes Xus saib neeg txoj sia, saib neeg kev txom nyem loj dua tej cai hais kom caiv ntawd.
Hnub no, Huab Tais Yes Xus thiaj nthuav txoj cai rau cov thwj tim kom to taub tias lawv yuav ua li cas thiaj yuav yog tus neeg siab ncaj. Cov thwj tim tsis yog ‘txhob tua neeg’ xwb, lawv tsum txhob pub lawv lub siab chim los npau taws rau lwm tus thiab. Cov thwj tim txhob cev txim rau Tswv Ntuj yog tias nyob hauv lawv nruab siab tseem muaj kev chim kev ntxub lwm tus.
Kwv tij Hmoob sawv daws, peb puas yuav ua tau tus neeg siab ncaj? Yog peb ua peb xwb mas peb ua tsis tau, tab sis yog peb vam txog Huab Tais Yes Xus mas Huab Tais Yes Xus yuav pub lub siab ncaj rau peb. Li ntawd, niaj hnub peb thiaj yuav thov Huab Tais Yes Xus muab lub siab ncaj los hloov peb lub qub siab, thiab peb yuav niaj hnub ntsia Huab Tais Yes Xus dai saum tus Ntoo Cuam, ces peb yuav pom tias lub siab ncaj zoo li cas.
