ZAJ NYEEM HNUB TIM 17 LUB 11 HLIS 2025
HNUB NCO TXOG LEEJ NTSHIAB ES LIS XAS NPES NYOB HOOS NQIAS
COV LUS NYOB HAUV LUS KAS NTAWV MOO ZOO (LK 18: 35-43)
Kwv tij sawv daws, tus dig muag thaum nws hnov luag hais tias, Huab Tais Yes Xus tab tom hla tuaj mus, ces nws qw qw tias “Yes Xus, Das Vis Leej Tub thov koj khuv leej kuv thiab os!”
Tus dig muag no, nws raug kev txom nyem, nws nyob rau hauv kev tsaus ntuj nti nws ua dab tsi tsis tau, nws tsuas thov khawv ntawm tej ntug kev xwb, thaum nws hnov luag cav zom zaws txog Huab Tais lub koob lub npe, Huab Tais Yes Xus tus uas sawv daws cav nroog tws tias nws kho tau neeg mob coob leej zoo hlo lawm, ces nws tus dig muag muaj kev cia siab, thaum nws hnov tias Yes Xus tuaj txog ze, ces nws tsa suab hu Yes Xus nrov nrov, tab txawm muaj neeg cem nws thiab txwv tsis pub nws qw, tiam sis vim Huab Tais yog nws txoj kev cia siab ces nws yim qw nrov dua qub, Huab Tais Yes Xus khuv leej neeg, thaum nws hnov li ntawd, nws thiaj kom lawv coj tus dig muag los, Yes Xus hais tias, koj xav kom kuv ua dab tsi rau koj, tus dig muag teb tias “Huab Tais thov kom kuv qhov muag rov pom kev.”
Huab Tais Yes Xus kho tus dig muag tam sim ntawd, ces nws qhov muag rov pom kev, vim tus dig muag lub siab ntseeg ua rau nws qhov muag pom kev.
Peb tsoom ntseeg sawv daws, peb rov tig los ntsia peb tus kheej saib, peb xav kom Huab Tais Yes Xus pab peb dab tsi?
Thiab peb muaj txoj kev ntseeg zoo npaum li cas lawm, niaj hnub peb puas tseem hu Huab Tais tuaj cawm peb.
Nyob zoo sawv daws.
