ZAJ NYEEM HNUB TIM 17 LUB 3 HLIS 2025
HNUB NCO TXOG LEEJ NTSHIAB PAS THIV
(DN 9:4-10; LK 6:36-38)
Kwv tij Hmoob, hnub no nej hnov lub Moo Zoo yog Huab Tais Yes Xus cov lus nthuav lo lus tias ‘Nej xav kom luag ua cas rau nej mas nej yuav xub ua li ntawd raug luag.” Huab Tais Yes Xus hais meej thiab tseeb kawg tias “Nej yuav hlub luag tej, nej tsis txhob txiav txim rau luag, nej tsis txhob muab txim rau tus ua txhaum, nej zam txhaum tau tus ua tsis zoo rau nej, nej pub yam nej muaj rau tus tsis muaj. Nej ua li hais mas tsis yog luag yuav ua li ntawd rau nej xwb, Tswv Ntuj tseem yuav ua li rau nej thiab.”
Lo lus hnub no mas peb tsis tas yuav muab nthuav muab hais dab tsi ntxiv, yeek tseeb kawg li lawm.
Tsuav ib qho yog qhov tias peb yuav ua li cas thiaj coj tau raws li Huab Tais Yes Xus cov lus hauv hnub no.
Huab Tais Yes Xus hais tias “Nej yuav hlub luag tej ib yam li nej Txiv hlub nej.” Tsis yog peb niam peb txiv uas yug peb, tab sis yog peb Txiv Tswv Ntuj tus tsim peb.
Tswv Ntuj hlub peb li cas? Muaj ib zaug Huab Tais Yes Xus hais rau Nis Kos Des Mos tias “Vim Tswv Ntuj nyiam lub qab ntuj neeg npaum no, nws thiaj muab nws Leej Tub Twm Zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li” thiab hais tias “Leej Txiv nyiam kuv li cas, mas kuv nyiam nej li cas.” Li ntawd, peb thiaj pom Tswv Ntuj kev hlub peb nyob hauv Huab Tais Yes Xus txoj kev tuag saum Ntoo Cuam.
Huab Tais Yes Xus yeem muab tas nws txoj sia los txhiv lub ntiaj teb neeg, nws tsis cais tias tus twg nyiam nws thiab tuaj nws tog. Huab Tais Yes Xus hlub tas sawv daws, tsis hais tus neeg zoo los tus neeg phem, tus siab dawb los tus muaj txhaum.
Yog peb nyeem Ntawv Moo Zoo hais txog thaum Huab Tais Yes Xus nyob saum Ntoo Cuam, muaj neeg thuam thiab hnyo Huab Tais Yes Xus mas Huab Tais Yes Xus tsis npau taws thiab tsis cib nyeej rau lawv, nws tsuas hais tib lo lus tias “Txiv, koj zam rau lawv vim lawv tsis paub lawv ua dab tsi.”
Thaum lawv ntes Huab Tais Yes Xus mas Pob Zeb tsis lees paub Huab Tais Yes Xus txog 3 zaug, tab sis thaum Huab Tais Yes Xus sawv rov los mas nws tsis chim rau Pob Zeb. Huab Tais Yes Xus tsuas nug Pob Zeb tias “Koj puas nyiam kuv” ces Huab Tais Yes Xus tsa Pob Zebu a tus saib cov neeg ntseeg nyob hauv qab ntuj no.
Tas nrho tej peb hais ua piv txwv no tsom txog Huab Tais Yes Xus lub siab nyiam thiab hlub peb, ces peb thiaj paub tias Tswv Ntuj hlub peb npaum li cas.
Yog li hnub no peb thiaj paub tias Huab Tais Yes Xus qhia peb kom hlub luag tej ib yam li Tswv Ntuj hlub peb, mas yog kom peb nyiam tus ntxub peb; peb txhob txiav txim thiab muab txim rau tus ua txhaum ua yuam kev, peb zam txhaum rau tus neeg ua phem ua tsis zoo rau peb, peb pub yam peb muaj rau tus nws tsis muaj.
Peb ua li no mas yog peb tau nyiam luag tej ib yam li Tswv Ntuj nyiam peb ntag.
Nyob zoo sawv daws.
