ZAJ NYEEM HNUB TIM 18 LUB 6 HLI 2025
HNUB PLAUB, LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 6: 1-6, 16-18)
Kwv tij Hmoob sawv daws, hnub no nej hnov cov lo lus li tias ua ncaj, pub rau luag, teev Ntuj, yoo mov thiab cov neeg zoo sab nraud.
‘Ua ncaj’ yog ua cov hauj lwm zoo kom yus pheej xeeb rau Tswv Ntuj. Tus neeg pheej xeeb rau Tswv Ntuj, mas nws ua 3 yam hauj lwm zoo; yog nws ‘pub yam nws muaj rau tus tsis muaj’, nws ‘yoo mov yuam nws kev ntshaw’ thiab nws ‘teev Ntuj tsis tseg’.
Thaum peb pub rau luag, mas yog peb tsim kev sib raug zoo nrog luag. Thaum peb yoo mov, mas yog peb tab tom xyaum tswj peb tus kheej kom txhob poob rau kev ntshaw. Peb yuav ua 2 yam no tau mas yog peb tsum nyiam teev Ntuj kom peb tus plig npuab Tswv Ntuj.
Nyob hauv cov Yus Das thiab peb cov neeg ntseeg txog Yes Xus mas yog peb xav ua lub neej nyob hauv Tswv Ntuj txoj kev, peb yuav nyiam pub yam peb muaj rau cov tsis muaj, peb yuav yoo mov yuam peb lub cev kev ntshaw, thiab peb yuav nyiam teev Ntuj.
Hais txog kev pub, mas zoo li nyob hauv peb cov Hmoob muaj ntsis ‘cuaj khaum’ tsis tshua pom tus muaj pub rau tus pluag; qhov pom ntau mas yog pom ‘pub tshav ntuj’ thaum muaj ib tug neeg qaij qaug. Muaj ib txhia tsis yog pub ua tshav ntuj, pub ua txiaj ua ntsig; tseev kom tsev xyom cuab sau npe lo tim phab ntsa cia rau qhua pom los kuj muaj. Nyob hauv cov Mab Sua, pom lawv nyiam pub nyiaj pub txiaj rau luag coj mus txhim ub txhim no, tab sis thaum txhim tau lawm, tsum tshaj tias tus twg yog tus pab. Peb muab xav saib, puas phim Huab Tais Yes Xus cov lus qhia.
Hais txog kev yoo mov, cov hluas hais tias lawv txaus siab yoo tsis yog dab tsi, yog lawv xav tau lub cev ntaj ntsug zoo saib ntxim nyiam, lawv yoo tej yam lawv tsis xis tab sis lawv muab nyiaj mus yuav tej yam lawv nyiam noj, lawv yoo kom txhob tau phob nyiaj vim lawv khuv xim. Tus yoo mov li no puas yog nws ua raws li Huab Tais Yes Xus qhia.
Kev yoo mov raws li Huab Tais Yes Xus hais, yog tswj yus lub siab ntshaw.
Hais txog teev Ntuj, mas pom tias coob tus nyiam teev Ntuj kawg kiag, tab sis cov lus tawm hauv lawv lub ncauj los tsis yog tawm hauv lawv nruab siab tuaj, lawv twb tsis paub tias lawv cov lus teev Ntuj ntawd yog hais txog dab tsi. Muaj tej tus tuav rawv txoj saw Mab Liab zoo nkauj ci ntsa, puag rawv tus ntoo cuam tooj daj lias los yog lawv tsis tsa lub siab nyob ze Tswv Ntuj, mas lawv nkim zog dag teev Ntuj xwb.
Kwv tij, Huab Tais Yes Xus hais txog ‘cov neeg zoo sab nraud’, mas lawv yog cov neeg zoo li cas?
Cov neeg zoo sab nraud yog cov neeg ‘dag siab’; lawv lam ua kom luag tej pom tias lawv yog neeg zoo tab sis lawv xav phem rau nruab siab. Piv li cov neeg hais kam tias lawv ntseeg txog Yes Xus, tab sis lawv lub siab tsis ntseeg, los cov hais ib yam tab sis lawv ua dua ib yam. Cov Fas Lis Xais lawv nyiam ua zoo li ntawd, Huab Tais Yes Xus thiaj hais kom cov thwj tim txhob ua li cov Fas Lis Xais.
Cov neeg zoo sab nraud, lawv ua cov hauj lwm zoo; yam li pub rau tus tsis muaj, yoo mov, teev Ntuj; mas lawv nyiam ua rau sawv daws pom thiab tshaj rau sawv daws hnov, kom lawv tau lus qhuas ntawm zeej tsoom. Tus twg ua zoo li cov neeg sab nraud, tus ntawd tsis nyob hauv Tswv Ntuj txoj kev.
Huab Tais Yes Xus hais tias peb txhob ua 3 yam hauj lwm zoo no, kom tau lus qhuas ntawm luag tej. Thaum peb ua mas ua ntsiag ntsiag, tsis tas yuav pub sawv daws paub. Tus peb yuav cia paub mas yog Tswv Ntuj tib tug xwb ces txaus lawm. Thaum peb ua cov hauj lwm zoo txawm tias tsis muaj leej twg pom los peb yuav zoo siab ua ntxiv mus, vim txhua yam hauj lwm zoo peb ua ntawd, Tswv Ntuj yeej pom, Tswv Ntuj yog tus paub rau peb.
Nej xav saib nej yuav cia neeg pauj rau nej, los nej cia tus Tswv Ntuj muaj txoj sia pauj rau nej.
