ZAJ NYEEM HNUB TIM 18 LUB 6 HLI 2024
HNUB PEB LUB LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 43-48)
Kwv tij Hmoob sawv daws, cov lus Huab Tais Yes Xus hais hauv hnub no yog txuas cov lus nej tau hnov nyob hauv nag hmo. Huab Tais Yes Xus hais tias “Nej yuav nyiam nej cov yeeb ncaub, nej yuav thov Ntuj rau tus tsim txom nej; nej thiaj yog nej Txiv nyob saum ntuj cov me nyuam.”
Yog nej nco tau, mas cov lus Huab Tais Yes Xus hais txog cov tau txoj hmoov zoo mas Huab Tais Yes Xus qhia tias “Cov tau txoj hmoov zoo yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.”
Huab Tais Yes Xus cov lus hais kom peb nyiam peb tus yeeb ncuab, thov Ntuj rau tus tsim txom peb; mas thiaj yog lo lus nthuav txog nqe lus cov tsim kev thaj yeeb.
Peb tus yeeb ncuab yog leej twg, tus tsim txom peb yog leej twg?
Peb tus yeeb ncuab yog tus muaj kev xav tsis thooj li peb, tus tsis nyob peb tog, tus cov nyom peb, tiv peb. Txhua hnub peb niaj hnub ntsib tus yeeb ncuab, thiab lwm tus koj saib peb yog lawv tus yeeb ncuab thiab. Tsuas yog peb tsis nco pom xwb, peb pheej xav tias tus yeeb ncuab mas yog tus yus ntxub, tus ua rog nrog yus. Peb pheej xav li no ces muaj ntau zaus peb thiaj ua ib siab nyiam tsis tau nws. Hnub no kom peb sim xyaum ua siab nyiam tus yeeb ncuab peb nco tsis txog xws li tau hais los saud; peb ua siab nyiam tus ntsib tom tog kev, peb ua siab nyiam tus hais lus cav peb, peb ua siab nyiam tus niaj hnub hais lus tiv peb. Peb xyaum li ntawd.
Hais txog tus tsim txog peb ne, tsis yog tus niaj hnub ntaus peb, niaj hnub hiam peb xwb, tseem yog tus hais lus tsis zoo rau peb, tus hais lus ntsw peb, saib tsis tau peb thiab. Nws yog peb tus yeeb ncuab ntag. Hnub no peb sim thov Ntuj rau nws, tag kis peb kuj yuav thov Ntuj rau nws, neeg kis. Sim thov Ntuj rau nws ib hnub, ob hnub, peb hnub, ib lis piam, ob lis piam, peb lis piam sib law. Tsis yog ib yam ceeb laj dab tsi.
Xav kom peb cov Hmoob ntseeg txog Yes Xus, sim thov Ntuj li hais, saib nej tus yeeb ncuab puas tsim txom nej lawm, saib nej lub siab puas hloov nej tus yeeb ncuab los ua nej tus phooj ywg, saib tus tsim txom nej cov lus puas yog lus tsawm nej los yuav yog ib cov lus pab thiab nej kom loj tuaj.
